انتهت الامتحانات ..وبدت الاجازة مابين الكورسين... كان مدتها اسبوعين بس عالاقل كافية انه الواحد ياخذ نفسه ويعيد حساباته..
اتصل محمد لفطامي..
محمد: مرحبا طمطومي اشحالج
فطامي: حمدالله بخير... انت شحالك
محمد: حمدالله انا بخير دامني اسمع صوتج بخير..
فطامي: شو ماعرست بعدك
محمد: ونحن ما بنفتك من هالسالفة..كم مرة اقولج مابي اتزوج ماابي .. غيري الموضوع والا ترى بسكر
فطامي: خلاص انزين.. ليش متصل
محمد: شووو ..شو بعد هذي ليش متصل.. متصل اطمن عليج
فطامي: خلاص انزين اطمنت شو تبى؟
محمد: فطامي ليش تكلميني بهالطريقة انا شو سويت لج
فطامي: ولاشي... سلامتك.. بس كل اللي انا فيه محد السبب فيه غيرك
محمد: وانا شو سويت عشان اكون السبب فطامي بلااااااااج والله حرام عليج حسي فيني تعبت من اهاناتج وانا ساكت.. ممكن اكون غلطت بحقج في يوم من الايام ..بس الي قاعده تسوينه انتي اضعاف الي سويته انا ملايين المرات
فطامي: اففففففففففف منك
محمد: شو سويتي عشان الليسن
فطامي: ولاشي ماراح اكمل
محمد: عقب كل هذا مابتكملين ليش؟
فطامي: اخاف بصراحة بعد الحادث الي صار لصالح خفت ماابي ليش اخذ ليسن عشان اموت والا اقتل الناس
محمد: ياسلام لو كل الناس تفكر مثلج بتحصلين محد يسوق.. الحادث قضاء وقدر وماله دخل بالي يعرف يسوق او لا ..
فطامي: طيب انا اخاف وخلاص كيفي
محمد: ياويلي منج ومن خوفج هذا الي ما راح يوديج مكان
فطامي: كيفي.. وبعدين انا مش فاضية اتعلم سواقة الحين بروحي تعبانه من الدراسة والبيت وكل شي..
محمد: فديتج... احبج... ياروحي.. اقول فطامي اريد اغنيلج.. ممكن
فطامي: خخخخخخخخخخ من زين صوتك عاد..
محمد: الحين من زين صوتي وين الي قبل يقولي حبيبي صوتك احلى صوت مر علي..
فطامي: هذاك اول .. وتحول يانظر عيني..
محمد: انزين يلا سمعي
فطامي: ان شالله..
محمد: " أبكي عليك..أبكي عليك ..من كثر مااأشتاق لك.. أبكي عليك أبكي عليك من كثر ما أحتاج لك..أبكيك أنا وقلبي الذي ..مايبغي هالدنيا يبيك..أبكي عليك أبكي عليك..من كثر مااحتاج لك..رحت وذب عمري انا ماظل غيري والعنا.. ماغير اناظر صورتك واتذكر ايام الهنا..كيف انت تتركني وتسير.. وقلبي انا بحبك أسير ..يعني انا بكل اختصار... عايش ولكن روحي فيك.."
قبل لا يكمل محمد شهقت فطامي وقعدت تبكي وهيه تقوله الحين هذي الكلمات والاغنية حقي..
محمد: ومن غيرج ياغناتي..
كملت فطامي تبكي.. وهنيه محمد بدى يغني لها..
محمد:" بكاك من يانور عيني يعل من بكاك يفداااك.. دمعك يزيد الحزن فيني مااطيق من هانك وبكاك..مااقدر على شوفك حزيني اكره انا العالم لبلواااك.. ياليت لي جالك يجيلي واشيل همك قبل لا جااك...اضحك وسولف ياظنيني خل الفرح جوك ودنياك .. مادمت بي ميت تبيني ..اموت بك مغروم واهواك.."
فطامي: احم احم خلاااااااااااااص سكت ماببكي مرة ثانية والا "ماغير اناظر صورتك واتذكر ايام الهنا" هههه
محمد: هيه اناظر صورة فطامي الصغيرة الكتكوته الطيبة البريئة
فطامي: آآه الدنيا وقسوتها ماخلت فيني براءة..
محمد: خلااص عاد ياعمري..
فطامي: خلاصيين اهم شي مااسمعك تغني مرة ثانية هههه
محمد: هيه ادري صوتي يخرع ومستحيل تبكين عشان مارجع اغني لج مرة ثانية..
فطامي: تقريبا صح..
محمد: خلاص عيل قومي غسلي ويهج.. وبرايه الليسن يولي وكل شي يويلي المهم مااشوف هالدمعه بعيونج
فطامي: ان شالله..يلا برايك بسكر مع السلامة
محمد: مالحقنا نسولف..
فطامي: مش لازم..
محمد: انزين ابا ايي اخطبج..
فطامي: بعدين بعدين مع السلامة...
تهربت فطامي من محمد وسكرت.. وراحت بترقد..وصحت من النوم متاخرة تقريب الساعه ست المغرب..
تغسلت وصلت وطلعت الصاله..لقت سالم قاعد ع الكنبة وحزين وكئيب وحالته ماتسر..
فطامي: سلووووووووووووم بلاك لايكون بدت مباراة العين وخسرنا حراااااااااااااام بس انا عبالي المبارة الساعه ست ونص..
سالم: أي مباراة انتي بعد ..
فطامي: عيل شوفيك متضايج جي وشكلك شوي وبتصيح..
هنيه فطامي تسمع صوت هرن.. توقف سيارة ..ثنتين..ثلاث ....عشرة قدام بيتهم الشارع صار فل ..بسم الله شو صار
فطامي: منو هذيلا لا يكون عازمين نااس
سالم : لأ
فطامي: عيل شوو
سالم مايرد..
قامت فطامي وصبت كوب جاهي وشغلت التلفزيون وقعدت تشوف التحليل قبل المباراة
سالم: بندي التلفزيون انتي خبله شوو
فطامي: خيبة شفيك.. ابا اطالع المباراة..
سالم: بندية..
فطامي: اوهو انزين ليش
سالم: سلطان ماااااااااااات (وبدى يبكي..)
فطامي: سلطان منووو؟
سالم: سلطان ولد عمي..
فطامي: شوو تجذب حرام عليك سلطان توه ثاني ثانوي شو ياه مات جي فجاة جذااااااب انته عنبو الظهر كان عندنا فالبيت .. مش هو الي كان عندك بالكراج.. والبارحة فليل متعشي ويانا تجذب تجذب
سالم: شو اجذب والله توه متوفي
فطامي: كيف عنبو انا نمت ساعتين واقوم عشان تقولي سلطان مات .. مااصدق
سالم: كيفج... سلطان خذ سيارة ابوه وراح العزبة وقعد يصيح ويلات (تفحيط) المهم وبلغو عليه الشرطة.. ولمن شاف الشرطة وراه خاف وهو مرتبك بس من اسبوع قاعد يتعلم يسوق.. انقلبت السيارة ولمن حس انها تنقلب راح بينط..بس انقلبت فوقة.. وكل هذا فالعزبة.. ولمن وصلنا لقيناه غرقان بالدم جسمة كله تحت السيارة وراسة الوحيد برى يعني كانها ذابحتنه
فطامي: لااااااااااااااااا حرام مش متخيله صعب اتخيل ياخي توه من ساعتين كان معانا مش قادرة استوعب..
سالم: عيل انا شو اقول.. من الصبح وهو مافارقني..تعرفين شو قالي؟
فاطمي: شوو
سالم: ياني الظهر بعد مارجعنا من المدرسة.. وقالي اريد اروح العزبة .. وابوي مب راضي يعطيني مفتاح السيارة..ورحت له مرة وثنتين وعشر وهو مب راضي..بعدين رحت لامي.. وترجيتها..قلت لها مابروح غير العزبة.. وخبرتها اني حلمتها.. معاي وكنا رايحين البر كلنا انا وامي وابوي واخواني.. ونزل مطر.. وانا غرقت فالوادي.. وامي قعدت تبكي وتقرى قران .."
فطامي: حرااااااااااااااام يحليله هذا تفسير حلمة..
سالم: يلا برايج انا بروح اساعد ابوي لان عزى الريال في بيتنا والحريم في بيت عمي
فطامي: اوكي..دير بالك على نفسك.. وشد حيلك شو نسوي بعد هذا حال الدنيا.. ماعرف هالسنة لين تخلص شو بيصير اكثر.. والله اني قمت اهوجس من كثر البلاوي الي حلت علينا هالسنة
سالم: والله اني قمت اخاف اركب السيارة واسوق من كثر هالحوادث.. خايف والله خايف..حتى فهد مايخليني اسوق
فطامي: سالم دخيلك ماعندي غيرك واحلم باليوم الي تكبر فيه حافظ على نفسك عشاني وعشان امي وابوي..
سالم: ان شالله والمكتوب مامنه مهروب..
فطامي: الله يحفظك..
صورة سلطان ماكانت تغيب عن عين فطامي..خصوصا انه كان ولد عمها وتوه ولد صغير.. وتقول كيف لمن تفتح المدرسة وربعه مايشوفونه كيف حالة امه الحين لاحول ولا قوة الا بالله..
محمد عرف السالفة فالمركز واتصل يعزي فطامي..
منصور اتصل على فطامي يعاتبها.. لانها قطعت فجاة.. قالت له فطامي ان سبب غيابها هو الظروف.. بس قالها انه مب مصدقنها وانها اكيد مشغوله فالنت ..فطامي تضايقت وايد.. من كلام منصور.. اما منصور فكان متعمد وقالها ذا صدق انتي ماتقعدين على النت ومش مشغوله باحد عالماسنجر عطيني الباسورد مالج عشان ادخل اشوف ضايفة شباب والا لا..فطامي ..كانت تركت هالخرابيط من زمان.. عطته الباس ورود وهيه كلها ثقة لانها تعرف انها ماعندها شي تخاف منه..
الاستاذ كان يرسل ايميلات لفطامي.. يسالها شو مسوية فالاجازة وكيف نفسيتها.. اما فطامي فردت على اول وثاني ايميل وبعدين لمن حست السالفة زادت عن حدها طنشت السالفة..خصوصا ان المراسلة صارت عن طريق الهوت ميل مش ايميل الجامعه يعني مافيها تحفظ..
سالم حاليا ثانوية عامه.. ولازم يشد حيله فالقسم الثاني من السنة عشان ياخذ نسبة..
محمد..جاته حاله مش طبيعية وصار متعلق بفطامي بشكل اكبر من كل الوقت الي طاف..
فطامي.. كانت ماتعرف شو تسوي وشو تقول لمحمد..ماتعرف شو هو الصح عشان تسوية وشو هو الغلط عشان تخليه..
صالح..صار شبة عاجز وفطامي تتذكر الايام الي قضوها مع بعض فالروحة والجية للكلية...
مرن الاسبوعين بسرعه البرق ... وبدى الكورس الثاني...
::::::::::::: نهاية الجزء الاربعين ::::::::::::::::
الأحد أغسطس 02, 2009 3:38 pm