قصــــة واقعيه بعنوان " جــــــرح الايــــام " حصريا ً

مرحبا بنات شخباركم عساكم بخير

راح انزل لكم قصه روعه قليل فيها واحداثها واقعيه ومانزلت قبل كذا بالمنتديات غير

بمنتدى عرايس وكاانت بقلم الاخت مزون وهي اخت بطلة قصتنا

اتمنى اشوف تفاعل معيا من الكل وحياكم

راح ابدا بالجزء الاول من القصه

هذه قصة حقيقية بقلمي دارت احداثها سنة 1996 وحتى 2006 دامت قرابة عقد من الزمان.. فيها الحزن والمراره وتمثل قسوة الأيام على الإنسان وتبرز أنه مهما كانت قوة الإنسان يبقى ضعيف بداخلة ومكسور..لن اطيل الحديث سأبد كتابة القصة على امل ان يعينني الله على ان اكملها بكل مصداقية ودون مبالغة حتى نعرف معنى كلمة وفاء اخلاص وقوة حب وحتى نعرف ان ليس كل مثل وحكمة تقال صحيحه..احداثها راح تبين الكم الفرق بين حياتنا هالايام والحياة قبل عشر سنين ...وبما انه القصة انتهت قررت اكتبها.عشان الكل ياخذ العبرة من واقع حياة انسانه..يمكن البداية تكون عادية لكن نهايتها اقسى من القسوة.. القصة طويلة جدا ..صعب اختصر عشر سنوات في صفحات ...وأرجو الامانه في النقل اذا تم النقل فالقصة باسمي انا مزوون ...

القصة بعنوان ( جرح الأيام )..
الساعه 11.30 مساءا ...فطامي الي عمرها توه 14 عام تدرس قرب ابوها ناصر ريال كبير فالسن ..وبينما هو قاعد قربها يدعي لها وهيه تدرس اذا بتلفون البيت يرن ..
ناصر: الو الو ..
لكن محد يرد..
ويرد التلفون ويرن مرة ثانية ..
ناصر : الو الو..
وماحد يرد..
ناصر: فطامي أبوية قومي ردي يمكن هذي وحدة من ربايعج تبى تتخبرج عن شي ومستحية مني ( الابو على نياته في زمن التسعينات ماكان هناك موبايل ولا سوالف هالايام ..)
فطامي بكل براءة عمر الزهور : ان شالله ابوية يوم بيدق مرة ثانية برد أشوفه.. بعد تعرف تيلفونا مافيه كاشف ..
ناصر : بارك الله فيج يابنتي .. ( ماكمل رمسته الا والهاتف يرن مرة ثالثه ..)
فطامي : الوو مرحبا ..
المتصل: هلا ..
فطامي : ( تسمرت في مكانها وجحظت عيونها قلبها يرجف وجسمها قشعر من الخوف ) وقبل لا تكمل..
ناصر : هابنتي شفتي قتلج هذي وحدة من ربايعج زين يابوي رديتي عليها الله يوفقكن يارب..
فطامي :بعدها ساكته مش عارفة تتخذ قرار
المتصل : الوو
فطامي : نعم شو بيغيتي ..
المتصل بغيتي هاهاها ماشي ابا اسولف
فطامي : ( بكل خوف ولا ارادية ) طيب طيب الحين بخليج انا برمسج ان شالله عقب الامتحانات , وتصك التلفون بسرعه ...
وترجع لابوها تدرس وقلبها من الخوف بيشق صدرها وبيظهر مش قادرة تركز
الافكار تلف وتدور في راسها ياربي انا شو سويت وليش سويت جذا ياربي شو هالمصيبة ..اخاف يدق مرة ثانية ..ياربي انا والله صغيرة حرام حرام شو يبون فيني ... وبين هذي الفكرة وذيج ..يغلب فطامي النعاس وتروح وتنام..وتصحى عشان تروح الامتحان متناسية الي صارامس وتمر الايام وتنتهي الامتحانات على خير ويبدى أول يوم فالإجازة الصيفية ...

البيت ربشة والكل يخطط كيف بيقضي الإجازة ..
وبما انه الأب كبير والأخ الاكبر متوفي مافي غير اخو صغير لفطامي (سالم ) والثاني الي اكبر منها مايشفونه غير فالمناسبات ( فهد ) اساسا لانه اخوهم من الام .. والباقي بنات ثلاث من الاب متزوجات و اربع من الاب والام.. اصغر من فطامي ..
نشت فطامي بعد نوم عميق عقب آخر امتحان على صلاة المغرب صلت وتجهزت على اساس تطلع , تروح بيت جيرانهم الي تعودت تقضي اغلب الوقت عندهم ..وصايرين كانهم عايله وحدة مابينهم أي حواجز..
فطامي وهيه طالعه من حجرتها رايحة صوب باب الصاله عشان تطلع (يرن التلفون)
ركضت فطامي عشان ترد :
فطامي : الوو
المتصل : هلا
فطامي : اهلين ... منو بغيت ..أزقرلك ابوي .. والا اخوي..
المتصل : لا ولا واحد ..
فطامي : اوكي عيل مع السلامة..
المتصل : لحظة
فطامي : انا مااكلم حد غريب اذا كنت حد من ربع اخوي والا تبى ابوية بزقرهم لك..
المتصل : انتي قلتي لي دق..
فطامي ترتجف : انا متى كيف لا تتبلى عليه انا مااعرف احد..
المتصل : نسيتي ايام الامتحانات يوم دقيت وقلتيلي بكلمك عقب الامتحانات ..هذاني دقيت ..
فطامي : والله والله حرام عليك .. (وتبكي) .. ليش تسوي جيه انا ماكنت اقصد ابوي كان قربي ماعرفت اتصرف ..خلاص سكر دخيلك ولا تدق بيتنا مرة ثانية.. ابوي لو يدري بيجتلني دخيلك دخيلك ماتدق علينا..دخيلك ماتقول انا قتلك ..والله والله حرام ..
المتصل: شوفي يافلانه ..انا ورب البيت ماابي اضرج .. ولا ابا منج شي ..
فطامي : تجهش بالبكاء خايفة مش عارفة تتصرف : انت منو دازك عليه والله حرام
المتصل : محد دازني كنت العب بالارقام ودقيت بيتكم ..
فطامي :وانت ليش تلعب هاه بعدين خلاص انا مابكلمك اكثر والله بيجتلوني حرام عليك ..خلني اعيش بسلام دخيلك والله اني صغيرة ..وهلي مربيني ومب راعية هالخرابيط..
المتصل : بخليج وماراح ادق بيتكم ..بس بشرط ..
فطامي : (بدون لاتعرف الشرط ..على طول ان شالله ..)
المتصل : وعد ..
فطامي : وعد
المتصل : شوفي انا اسمي محمد ويمكن انتي ماتعرفيني بس اهلج يعرفوني ..عشان تتاكدين اني مابا اضرج والا ماكنت قتلج منو انا ... وشفتي البيت الرابع الي عدال بيتكم من اليمين هذاك بيتنا ..وتعرفين فلانه وفلانه الي يدرسون عندج هذولا خواتي..
فطامي : (بعد مارتاحت شوي ) بل بل شوفيك انته تحكي قصة حياتك ... انا ماعرف حد يادوب يرانا الي بيتنا لاصق بيتهم وبسسس..
المتصل : انا قتلج عشان تتاكدين اني مب ياي ابا مشاكل ..
فطامي: أي مشاكل أي خرابيط ..ايه انته ترانا يهال تعرف شو يعني يهال انا توني 14
المتصل : وانا توني 17 ..
فطامي: يلا قول الشرط وفكنا من الحشرة ... والا ترى بزقرلك اخوي..
المتصل : بدينا فالتهديد..
فطامي : يلا
المتصل : ولاشي عندي مشكله وفي خاطري حد يسمعني..ويوقف عندي يلين ماتنحل ..واوعدج ماعاد ادق عليج بعدها..
فطامي : قدددددددديمة ..أقوول ...يلا اجلب ويهك..
محمد: ارجوج ..مب كل كلمة نقدر نقولها لربعنا او اهلنا انا محتاج لانسان اشكيله ويسمعني.. واوعدج من تنحل المشكله ماتسمعين صوتي..
فطامي : خلاص خلاص يصير خير ..دق بعدين عقب لانا نحن بنروح مكان كم يوم مادري متى نرجع ( فطامي تجذب عشان تفتك منه )
محمد ان شالله ..مع السلامة..
فطامي : طرااااااخ بالتلفون ماصدقت ترتاح.. كملت طريجها لبيت جيرانهم..
:::: ومر اول اسبوع من الإجازة عادي ..وكالعاده فطامي عقب هذاك الخوف نست السالفة للمرة الثانية..
نفس الوقت المعتاد بعد صلاة المغرب.. وقت مايكون البيت فاضي تقريبا ويكونون اهل فطامي برى يرمسون عالمنامة .. واخواتها الصغار يلعبون برى ..
يرن التلفون ..
كالعاده فطامي ترد..
فطامي: الوو ..
محمد : هلا والله ..
فطامي : منو
محمد: مسرع مانسيتي
فطامي: اوهو علينا انت متى انا بفتك منك ..
محمد: شو نسيتي الوعد .. وترى وعد الحر دين
فطامي: زين زين خلص فكنا فلسفة وقولي شو المشكلة ماادري جني ام خليفة ..وانا مادري
محمد : شوفي يافلانه انا مابا منية من حد ولاتمين تسوين فيني جي ..ترى والله لو مب الحاية ومذله الحال جان ماشكيته لغير الله..
فطامي: محد قال اشكي ولاحد قالك دق
محمد: انتي ليش قاسية جي..
فطامي: بتضيع مستقبلي وتقولي قاسية ..افرض حد درى عني ..شو بيكون مصيري وانا توني فاول عمري وانت توك صغير ..يامحمد ارحمني وارحم نفسك نحن بعدنا صغار وصغار وايد على هالسوالف والدنيا ماترحم..
محمد : شوفي انا حتى اسمج ما سالتج عنه ..بس دخيلج اسمعيني وبعدها ..اتركيني وانتي مسموحة..
يافلانه انا اخاف اليوم علي نفسي وعليج ..بس بعد لو تركتيني في هالحال اخاف اضيع صدقيني اسمعيني ماراح تخسرين شي..
فطامي : خلاص بسمعك .. ونحل المشكلة وبنتفارق على خير شو قلت ..
محمد : ان شالله يلا عاد اسمعي
فطامي: اسمعك..
محمد : شوفي يافلانه ..السالفة اني الحين صف ثاني ثانوي ادبي ..وممشي فالدارسة مب ذاك الزود بس تقدرين تقولين حمدالله ماارسب بس انجح بالدز .. والمشكلة انه ابوي مايتفاهم ..انا الحين اكلمج من البيت لانه هو طالع ساير العزبة والا والله والله يا فلانه اني مااقدر اكون فالبيت وهو موجود .. دوم يروغني من البيت شكله يبى يطفشني شرات ماطفش اخوي.. وانا ماسويت شي ..صلاة اصلي ودراسة ادرس.. كل السالفة انه انسرق سيكل ولد يرانا .. ويارنا قال لابوي اونه انا الي سارقنه وانا والله لا شفته ولاصكيته حتى..
وامي مابيدها شي ساكته لو حاولت تدافع عنا بيضربها حالها حالنا ..يافلانه انا يمكن اكون صغير بنظرج بس بنظر ربعي انا كبرت وعيب اكون فهالعمر وابوي يضربني احاول ارضية بس ماشي فايدة ..والسنة الياية بتكون اخر سنة لي واذا ماكنت مستقر كيف بيب نسبة ..وكيف كيف.. وهذي هيه مشكلتي باختصار ..
فطامي : اها عاااااااااااااادي جدا تصير في كل بيت..
محمد: شوفيج انتي اقولج ادخل بيتنا جني حرامي اشوف امي واخواني بالدس وتقولين عادي..اقضي ليلي ونهاري بالسكيك ..
فطامي: شوف هذا ابوك سرت فوق والا رديت تحت.. وماله بد منك .. واكيد مهما كان الغلط الي سويته ارحم من هالغلط الي قاعد تسويه وهاي الهياته برع البيت
محمد : والحل
فطامي: شوف استسلم للواقع .. ورد البيت اذا تكلم ابوك فالموضوع عادي قوله انك ماسويت شي واصّر على رايك صدقك كان بها ماصدقك تحمل ردت فعله المهم يسوي الي فباله ..وحتى لو ضربك تحمل المهم تعرف النهايه ماتظل معلق
محمد :شورج جي يعني ..
فطامي :هيه
محمد : ان شالله ..والله اني ارتحت تصدقين..
فطامي: حمدلله ..يلا عاد انا بصكر..
محمد : لحظة..
فطامي: ها شو بعد
محمد: لا ولاشي ... تصبحين على خير..
فطامي: توه المغرب مع السلامة..
محمد: وداعة الله ..

كالعاده طلعت فطامي صوب بيت يرانهم بعد ماصكت التلفون..
في بيت جيرانهم كانوا ما شالله وايدين بنات واولاد وكان تعامل فطامي مع اربعه منهم فقط
راشد (اخوهم العود ) ..مهرة(اختهم العوده) ..خالد ( ربيع اخو فطامي فهد) وربيعة فطامي مها..
فطامي تدق الباب..
خالد : هلا هلا فطااااااااامي وينج نترياج من الصبح ..
فطامي : أي صبح الله يخليك ..
خالد: يلا تراهم كانوا بيلعبونا عنا كيرم وانتي محد وتعرفين مهرة تلعب ويا مها وراشد محد وانا حليلي بروحي فريق..
فطامي: ماعليك ماعليك منهم الحين انا وانت نسوي فريق عن عشرة..
تدخل فطامي الحجرة على مهره ومها ..
مهرة مها مع بعض : هلا هلا لو مايتي..
فطامي: شو هذا انا احتج مخليات اخوي العزيز خلودي بروحه هاه صدق انكن ما تتامنن على احد
خلودي تعال ايلس مناك ..
يلا نلعب وننتقم حق خلود وبتشوفن
مهره: الحين ماعرفنا انتي الكبيرة والا خلود..
فطامي وانتي شوعليج ..مسكين يحليله يوم محد راشد تستغلن الوضع..
ويظلون يلعبون لحد وقت متاخر ..بعدين يدخل فهد اخو فطامي مع راشد يقعدون شوي وياخذ اخته ويروح البيت..
كان بيت جيران فطامي ..كانه بيتها..اهلها واهلهم واحد وكلهم يحسبون بعض على انهم اخوان ..رابين مع بعض..
مرت الأيام على فطامي عادية جدا والروتين اليومي.. ماتغير شي فيه..
وماكانت تعطي أي اهتمام للتلفون ..كان التلفون يرن ويرن وهيه طبعا مش موجودة طول الوقت في بيت جيرانهم
محمد نسته اصلن ماحطت في بالها انه ارح يدق..ولا حتى قالت له انها كانت اخر مكالمة لانها تدري انهم متفقين تسمعه وانتهى..لكن محمد كان يدق يوميا .. عشرات المرات .. وبعد اسبوع..

فطامي ناشة تصلي الفير .. بعد ماوعتها امها..
بعد ماخلصت فطامي من الصلاة قعدت شوي...
ياتها امها :
موزة: امي فطامي تعالي فديتج اباج شوي..
فطامي: لبيه امايه شو بيغيتي هالحزة مبوني سايرة بكمل رقادي..
موزة : يابنتي قبل لا يوعي اخوج .. تعال شوفي هالبلية ..
فطامي : (قلبها وقف ) بليه شو امايه خير .. حد مات
موزة : بعيد الشر.. لا يابنتي توني وعيتج وصليت وتريت شوي النور يبين سرت بشغل الطوي اسقي الزراعه ...واشوف باب الحوش الي ورى مب مصكر زين ..وسرت بقفله وجان احصل ورقة مخشوشة فالباب..
وتعرفيني ماعرف اقرى ولا اكتب..وقلت يمكن هذا سعيد الي ورى بيتنا تعرفين سالفته ويا بنت يرانهم قلت بيكون مطرشلها شي ..الله يهديهم بس خذي شوفيها..
فطامي: الله يهديج لو بيطرش الها رساله بيحطها فحوشنا انتي بعد ّّّ؟؟ ترى باب حوشهم يدله..
موزة : انت اقرى هالقرطاسة..ويوديها عن حد يشوفها بعد مافينا على مشاكل للبنت ..
فطامي : ان شالله اماية بغيتي شي .. قبل لا اسير اوطي راسي..
موزة سلامتج فديتج ..

دخلت فطامي غرفتها ..وبكل فضوول تبى تعرف شو مكتوب فالورقة .. وتقول في خاطرها هيه والله بنات يرانا مب هينات ثرهن سوالف حب هاه ومنو عاد سعوود ماغيره .. المهم فجت فطامي الرساله .. وكانت الصعقة ..
رساله مضمونها دموع ..حزن ماتحملته الاحرف ولا استوعبه الورق ..
" وينج .. حرام عليج وينج ..ردي علي .. انا انا محمد يافلانه ...جي تخليني ..ليش شو الي سويته انا ضريتج؟!
كل الي طلبته منج وقفة توقفين وياي..ردي عليه دخيلج بدق اليوم على تلفون البيت الظهر الساعه ثنتين ونص .. من الدوام لاني داومت صيفي فالبلدية ودخيل روحج ردي عليه ...
محمد "
فطامي : خييييييييييييبة شو هذا زين محد قرى الرساله ..شو هالانسان الغبي ..يبى يوديني ورى الشمس اف اف
غبي صدق غبي يعني شو ضمنه اني بقرى الرساله ..بعدين ياخي نحن صغار ..اوهو شفيه هذا تراني سمعت مشكلته ...اففففففف يعله عووق متى بفتك منه ..الحين شو اسوي انا يالله ماصدقت افتك منه لا قام يطرش رسايل ماادري وين عايشين نحن ..ماعليه الظهر يوم بيدق بادابة ..
رقدت فطامي عقب.. نشت صلت الظهر وتغدت في انتظار اتصال محمد...
الساعه 2.30 الظهر بالضبط والتلفون يرن ..
فطامي : الوو
محمد : اخيييييييييييييييييييييرا حرام عليج انتي وينج شوفيج انتي ماتحسين..
فطامي : خيبة تخيبك ان شالله ..
محمد: حوو شوفيج
فطامي : شوشوفيني بعد نحن مش قايلين اني اسمعك وماتتصل شو تبى انت بالضبط .. وليش تطرش رساله انت وين عايش ..قول قول تبى هلي يجتلوني انت شو ناوي علي.. ايه انته شو تتحرى عمرك تراك توك ياهل وانا اصغر منك بعد ..شعدنك عووق..
محمد :حشى يابوج خفي علي..بس بغيت أقولج انها مشكلتي ويا ابوي انتهت حمدالله بفضل الله وفضل شورج..
فطامي: وخير ماطلب منك تقولي يلا فارج عاد وياويلك لو تطرش رساله والا تدق مرة ثانية ( وطراااخ تدفن التلفون قبل لا يقول محمد كلمة )..
يرن التلفون مرة وثنيتين وعشر وفطامي بولباس..
وتمر ثلاث ايام عادية على فطامي ...وهيه عكس هالشي على محمد .. محمد بالرغم من صغر سنه الا انه بكل عفوية وصدق تعلق في فطامي بالرغم من قسوتها.. بدون لا يعرف شو معنى الي يحس فيه ..وكان يقضي الايام بين المواويل العراقية ..وفطامي ولا فالبال ولا عالخاطر.. لاهيه ويا خالد ومهره ومها ..كالعاده اذا مايلعبون كيرم ورقة ..وهذي كانت اجازة الناس المساكين امثالنا الي عايشين منعزلين عن العالم في وسط البر ..

موزة...: فطاااااااااامي ..فطاااااااامي ...
فطامي توها متسبحة وسايرة بتصلي الجمعه ...: لبيه امايه شو بيغيتي اساعدج في شي والا اوعي.. خواتي..
موزة: خلي عنج هالسوالف الحين تعالي بغيتج في حايه ...
فطامي: ان شالله امي..
موزة : شوفي ( وتطلع رساله من مخباها )
فطامي : تستهبل ..شو ها امي بعد لا تقولين سعيد كان سكران وبالغلط عقها في حوشنا بدل حوش قوم عفرووة ..
موزة: هذا مب سعيد ..
هنيه وقف قلب فطامي ..
فطامي : كيف ليش شو من قال شو دراج انت قريتيها..
موزة : شوفيج شدراني انا ماعرف اقرى تدريبي
فطامي: هيه صح عيل حد قرالج..
موزة :شوفيج تخبلتي منو بيقرالي غيرج والا انا خبله اعطيها اخوج عشان يقتلني وياكن..سمعي يابنتي..
البارحة ناشة الساعه ثلاث بصلي ركعتين .. واسمع يافطامي شرات الونين ..
عقب سرت بطالع من دريشة المطبخ اسمع الصوت ياي من السكة .. واشوفلج واحد اصغر من اخوج فهد ويبغم بغيم من الخاطر..وتم يلين الساعه خمس الفير وانا اطالع له متى بينش من هذا ..قلت سعيد بس هذا صغير وين هو وين سعيد..
فطامي: شهقت ها وعرفتي منووه ..
موزة : هيه يابوج هذا عرفته ولد يارتنا شيخة محمد ..ابوه مطفربه من كثر مايروغه من البيت ..
وفطامي تقول في خاطرها ( مسكين يحليله يعني ماكان يجذب ...)
موزة تقطع حبل افكار فطامي ..:
موزة : فطامي..
فطامي : هاه هاه امايه ..
موزة : بتخبرج محمد ليش يحطي رسايل في حوشنا ويخشهن من باب الحوش الي ورى ..
فطامي : هاه انا شو عرفني شو دراني.. ماعرف ماعرف شي انا ماعرفه ماعرفه ..
موزة : زين محد قالج تعرفينه انا سالتج ..زين امايه قريلي شو مكتوب فالرساله ..
فطامي في خاطرها ( حسبي الله على بليسك بتوديني ورى الشمس ..)
موزة يلا اقري سمعيني..
فطامي : ( في خاطرها شو هالبلشة الحين شو اقرى حق امي ..والا ليش اصلن امي ماتعرف تقرة بقرى من عندي وبقطع الرساله وبعقها وهذا بيشوف دوااه ..)
موزة : يلا شوفيج..
فطامي لا ماشي ... وتفج الرسالة ..
وقبل لا تقرى حرف منها .. تقول لامها
فطامي: امي تعرفين هذي هذي مش رساله .. انتي ماتعرفين شي ..
موزة : عيل شو هذي يابنتي شو مكتوب فيها ..
فطامي : ماادري امي هذي ورقة وكاتب فيها آية الكرسي ...يمكن يخاف اييه شي هاهاه ...اقولج شي احسن احرقها حرام هذا قرآن ..
موزة : ( مندهشة )قرآن..ها..الى تشوفينه يابنتي ..
وتركض فطامي صوب غرفتها عشان تقرى الرساله ..
موزة : فطااااااامي امايه وين تبين بطيحين ...
فطامي : لا اماية .. انا ناا قتلج سايرة احرق الورقة..
موزة انزين حرقيها فالمطبخ ..
فطامي: هيه انزين انا رايحة رايحة المطيخ..
موزة : أي مطيخ المطيخ وراج ..
فطامي : هيه هيه برد بسير الحمام..
موزة: حمام والقرآن فايدج موب زين..
فطامي تركض بدون لاترد على امها..
موزة : الله يهديها هالبنت
فطامي تصك عليها الباب وتقرى الرساله

" عيون محمد ..دامني مااعرف حتى اسمج بزقرج عيوني..شو اسوي بعد..دخيلج لاتخليني ..ادري تواعدنا تتركيني بعد ماتسمعيني ووعدتج اني اخليج..بس والله حاولت مااقدرت حاولت ماقدرت مب بايدي شي اكبر مني يجرفني صوبج..والله ياعيوني مابا اضرج وانا قضيت الليل بطولة ابكي مش قادر ارسل هالرساله اخاف اضرج..بس ارجوج اخر مرة اسمعيني بكلمج مثل كل مرة ونفس الوقت...
عيوني ابا اقولج شي..يمكن ماتصدقينه ويمكن انا نفسي مااقصده بس هو في خاطري ..
احبج والقمر يشهد ونجم الليل ياروحي..احبج تشهد الدمعه احبج تشهد جروحي..
مع السلامة ياعيون محمد.. ووينها عيونك حبيبي سافرت مثلك حبيبي ..
"
فطامي (ناقعة من الضحك) : خخخخخخخخخخخ هههههههههههههههههه شوف هالغبي توه ماطلع من البيضة واونه يحبني يتحراني غبيه والا بيقص علي ..جي شو يتحراني مااشوف مسلسلات مااعرف لعب الشباب ..لا بعد اقول شباب قصدي مراهقين ههههههههه...
ويرن التلفون وتركض فطامي ...تخرطفت بالواير وطاحت على وييهاا..
وردت وهيه تضحك : الو
محمد ساكت ...
فطامي:الوو ...حوو بترد والا اسكر..
محمد : (يشهق ..وبصوت تخنقة العبرة ) هلا..
فطامي : خخخخخ ياللوتي هيه سويلي فيها حزين ..اقول شورايك تصيح شرات امس بعد ..مشكله اليهال..
محمد : الحين انا ياهل..
فطامي : ياهل ومراهق بعد ..اونه يصيح مثل البنات امحق رياييل ..
محمد : انتي ليش جي قاسية .. انتي قريتي الرساله
فطامي: مالت القمر يشهد خخخخخخخخخخخخخ صدق انك غبي جان تحراني بصدقك..
محمد : مش لازم تصدقيني المهم انا اصدق مع نفسي.. يمكن يوم يصيرلج قلب وتحسين بتعرفين انا شو احس
فطامي: شوف انا ماعندي قلب ولا بيستويلي قلب لاني صغيرة بعدني وبعدين انا مااحبك وانت ماتحبني الحين نحن في سن مراهقة يوم بنكبر بنضحك على عمارنا....خخخ
محمد : يشهق وتخنقة العبرة ..يافلانه رحميني مايهمني اضحك او تضحكين المهم تكونين قربي احساس فيني قوي مااقدر اوصفة ارجوج لا تخليني ..
فطامي: يالله شو انا امك اونه لا تخليني لا يمكن ولدتك ونسيتك وانا ماادري..
محمد: عطينا فرصة ارجوج..خلينا نتقرب من بعض اكثر ..ماتدرين الله شو كاتب..
فطامي: شكلك مصختها ..بس مب منك مني انا الي آخذ واعطي وياك... يافلان لاتسويلي مشاكل وخلنا نفترق على خير ..لاحقين على هالسوالف..
محمد:: ما مااقدر والله لو اقدر جان ماذليت عمري..
فطامي: ياااااااااااااإبني افهمني انت تعرف كم عمرك ..تعرف كم عمري..تعرف لو دروا هلنا شو بيكون مصيرنا كم مرة اعيد هالرمسة..انت الي ارحمنا ارحم طفولتنا بلاااااااك
محمد : نحن مب صغار ولا اطفال نحن صرنا شباب..
فطامي: ارمس عن عمرك..
محمد : يلا عاد خلاص انزين اوعدج ماادق انتي دقي على بيتنا وقت نحن نتفق عليه وانا برد وبرمس ..
شوقلتي ولابطرش رسايل.. وبنتم مع بعض فترة وبرايج لا تحبيني المهم انا اجبح..
فطامي: خخخخخخخ جنه حد قاله بحبه ..انزين انزين..خلاص اوكي
محمد: فديييييييييت روحج والله
فطامي: انخبص وييها ( اوووووووف شوفيك )
محمد: ماشي سلامتج مستانس فيها شي
فطامي : نو مافيها شي دوم ان شالله ..يلاعاد متى بتجلب ويهك
محمد ( مبوز ) : حشى انتي ماتعرفين تقولين شي زين ..الحين بجلب ويهي..يلا حياتي ديري بالج على نفس..
فطامي : هيه ماعليه حياتك مرة وحدة انزين عرفنا عرفنا يلا عاد مع السلامة.. وطرااااااااااااااخ قبل حتى لا يقول محمد مع السلامة ..
:::::::::::::: نهاية الجزء الأول ::::::::::::::::

وتمر الايام ..ولكن كل شي يصير بحدود فطامي ومحمد متفقين ..يعني كان يكلمها يوم هيه ويوم لأ ونص ساعه بعد صلاة المغرب عشان مايسبب لنفسة مشاكل ..ولا يسوي لفطامي مشاكل..
وفي يوم من الأيام ...فطامي ترمس محمد..
فطامي: محمد شخبار ابوك ..
محمد : حمدالله زين وياي يعني مب ذاك الزود بس هذي طبيعته ..
فطامي : يلا الله يهديه ويخليه الكم ..
محمد: وانتي.؟
فطامي: وانا شوو؟
محمد: ماقلتيلي شي عنج .. أحس ورى هالسوالف والضحك والقسوة تخفين أشياء..
فطامي: كيفي محتفظة فيها لنفسي ..ماطلبت منك تشيل همي انا قده مب ياهل شرات بعض من الناس..
محمد : فطامي انتي مابتودرين هالطبع لين متى بتكابرين كلنا عندنا هموم..خلينا قراب من بعض افتحيلي قلبج..
فطامي: قتلك مابحبك لاتحاول..
محمد: ماقتلج حبيني بس صارحيني..
فطامي: شو تبى تعرف هاه تتحسب كل الناس مشاكلهم سخيفة مثل الي عندك ..
محمد: خلاص انا مشكلتي سخيفة.. انت قوليلي مشكلتج يمكن اقدر اساعدج..
فطامي: محد يقدر يساعدني غير ربي الي خلقني..
محمد: يلا عاد غناتي قولي..
فطامي : لو سمحت لاتم تقول كلام المغازل هذا
محمد : ان شالله بس قولي..
فطامي : ولاشي ..الحال مثل ماتشوفة ..ابوي ماخذ حرمة قبل امي وهيه وبناتها معاملتهن النا زفت في زفت..
وانا اكبر بنات امي..واحاول اشيل هم امي واساعدها بالرغم من اني صغيرة بس شلت هم خواني شو تباني اسوي..
ابوي ريال كبير الله يعطيه طولت العمر وحرمته الثانية نفس الشي ونفس العمر وامي عايشة حياتها تربيهم بالرغم من فرق العمر بينهم لاهيه فيهم اكثر عنا ولو بتسال علينا ابوي بيحتشر ..وهذولا اخواني مالي بد منهم لازم اربيهم ..واكون قربهم عالاقل ماباهم يحسون بالحرمان الي انا حاسة فيه.. واااااااايد محرومين من اشياء يعني تشوف اخوي فهد عند ابووة ونحن مافي ريال فالبيت غيرة ابوية وبروحة يبى حد يوديه واييبه وكل شي عراسي..وياليت ياليت بنات ابويه يعاملنا بالزين..كله بس يواشن على امايه وعلينا ..الله كريم..

محمد: آآآآآه ياعيون محمد ...فذمتي انج ماتستاهلين..بس ماعليه غناتي..تحملي باجر تكبرين انتي واخوانج وتعوضون نفسكم وامكم عن كل شي..
فطامي: ان شالله خير بس متى بيي باجر؟؟
محمد: أقوول..الحين كملنا شهرين نعرف بعض..وانت ماقلتيلي شو اسمج..
فطاامي: وبعدين شو بيجدم والا بياخر اسمي تراني ارمسك مب هذا الي تباه..
محمد: ادري ترمسيني من ورى خاطرج..ولا اقدر اقولج خليني لاني والله مااقدر..بس قوليلي لو تجذبين المهم اسم ازقرج فيه..
فطامي: انزين اسمي مي..
محمد :عاشت الاسامي..
فطامي: أقول محمد..
محمد: عيون محمد قولي..
فطامي..: انا شو قايله ..المهم اسمع انا بسجل في مركز صيفي شاورت هلي وافقوا الدوام السبت الياي شو رايك فكرة حلوة..
محمد : اكيد بالتوفيق فديتج ..
فطامي: خلاص عيل يلا بخليك انا الحين..
محمد :وووووووووين .؟؟
فطامي: شو وين هذي بعد كملنا نص ساعه وفوقهن خمس دقايق يلا برايك مع السلامة ..( كالعاده طراخ فالويه )
محمد في خاطره ( يااااربي من هالبنت متى بيصير عندها اسلوب ..متى بيّحن قلبها ..بس والله احبها..)

مرت الأيام وقلت الإتصالات بين فطامي ومحمد ظروف الاجازة.....وفي يوم من الايام..
موزة: فطامي امايه تعالي تيلفون حقج..
فطامي: منو امايه ..
موزة : مادري جنها وحدة من ربايعج..
فطامي: الوو
سلمى : الوو مرحبا فاطمة صح؟
فطامي: هيه انتي منو اختي..
سلمى: انا سلمى بنت فلان (هنيه وقف قلب فطامي ..امييييييي هذي تستوي اخت محمد الي فالجامعه بل شو صاير ..حد ماات)
فطامي: هيه انزين هلا اشحالج ..شو بغيتي..
سلمى : سلامتج بس دريت انج مسجلة في مركز صيفي..والمشرفة الي عليكم تستوي ربيعتي..وتدرين انا انشر مقالات بس تعرفين عاد منطقتنا بعيده وراعي الجرايد مايي ..فماعليج امر يوم بينزلي مقال ربيعتي بطرشهن عندج وانتي طرشيهن صوبي
فطامي : ( عقب مابرد فوادها ) بس جي فالج طيب ..بس شقايلج اوصلج اياهن..
سلمى : بسيطة اخوي جاسم يعرف خالد ولد يرانكم وياه فالصف ..وصليها عندهم وهو بياخذها..
فطامي : ان شالله مع السلامة ( ماعندها وقت )
سلمى : مع ( ماكملت الا فطامي مسكرة )
موزة: ها امي من هذي شو تباج..
فطااااامي: اخيييييييج امي هذي بنت شيخة يارتنا تباني اسوي جي جي ..شكلها خقاقة بس طيبة
موزة : كيف بعد جي
فطامي : ماعرف بس جي..يلااااااااااا سلااااااام مامي ..
فطامي فيها شي مب صاحية ...
ردت دقت بيت محمد .. عشان تخبرة عن اخته .. وبالصدفة رد جاسم ..وهيه اساسا ماتعرف جاسم ولاتعرف انه قد خالد واصغر من محمد بسنة وانهم متشابهين في كل شي حتى نبرة الصوت..

جاسم : الوو
فطامي: هلا هلا ويييييييييينك يالقاطع اونه حبيبتي قال...
جاسم :شوو
فطامي : اقولك انا ماادري شوفيني اليوم ياي على بالي اسولف ممكن تسولف ..
جاسم : ممكن ليش لا..
وقعد جاسم يتكلم ربع ساعه وكله عن كاس الخليج سنة 94 وفي وسط رمست جاسم فطامي بينها وبين نفسها ياخي شوفي هذا مااحسه حمودي.. ماادري ليش (صح النوم!! )
فطامي : أقوول ودر هالسوالف عنك وقلي شو استعداداتك للثانوية العامه..
جاسم : أي ثانوية توني اول ثانوي ..شو شاربه انتي
فطامي رقعت بالتلفون ... والعثرة والخيبة شو سويت انا الحين ياهاي نشبة ..
ويرن ويرن التلفون ولاترد والغبية كان محمد الي يدق..
على طول ماشي وقت تركض بيت جيرانهم ..
وهناك كان راشد محتاس وماله خاطر في شي قاعد يقنع اهله بزواجة وهم رافضين ..يبونه يصبر سنه..
عقب يومين دق محمد
ردت عليه فطامي: الوو منو
محمد : شو بعد هاي منوه يديدة..
فطامي: اوووووووف اشوى يعني انت مب جاسم..
محمد : ياسلام ياسلام اشوف تطورت العزبة من جاسم هذا
فطامي: ياغبي جاسم اخوك
محمد: ياغبية انتي انا مب غبي..وبعدين من وين حضرتج تعرفين اخوي..
فطامي: جي جي السالفة ... وبعد اختك جي جي السالفة..
محمد: لا والله ...لحظة لحظة تعالي منو هذا خالد الي بتعطينه اوراق اختي
فطامي: خالد ولد يرانا ربيع اخوك جاسم الي وياه فالصف..
محمد: وانتي من وين تعرفينه..
فطامي: شوهاي بعد من وين تعرفينه. خلودي يستوي اخوي..
محمد: السالفة فيها خلودي بعد وتدلعينه..
فطامي.: اوهو اونه بيبدى يغار...لاتنسى اني مااحبك هذا شي الشي الثاني خلودي شرات اخوي رابيه وياه في بيت واحد واكل معه من نفس الصحن مب انته ولا عشرة مثلك يفرقونا..
محمد: ماعليه يا مي جي يعني خلاص هب مشكله هذي حياتج وانتي حرة فيها..
فطامي: ادري..

وتمر الايام ..جاسم كان يروح ويرد بين بيت فطامي وبيت قوم خالد على اساس ربيعه وعشان الاوراق بالمرة وكان يتحجج بصحبة خالد عشان يشوف فطامي بدون لا يدري انها هيه الي رمسته في يوم من الايام..

انتهت الاجازة وفي ليلة الدوامات..
فطامي: اقول محمد ..شد حيلك..اباك تيب نسبة وتدش كلية الشرطة واشوفك وكيل نيابة قد الدنيا وعقب كم سنة انا بلحقك ان شالله وبدش طب وبشتغل عندك فالطب الشرعي والجريمة ها شرايك..
محمد : والله هذا حلمي كلية الشرطة هيه كل احلامي..
فطامي: الله يوفقك ان شالله..بس اسمعني زين عاد مابنرمس وايد فالويك اند ووقت الضرورة وفالمناسبات انزين..
محمد: ان شالله..
فطامي: يلا عيل خلنا نروح نرقد عشان باجر ورانا دوامات..
محمد: يلا غناتي..تحملي على عمرج ..ماوصيج وتصبحين على خير..
فطامي : وانت من اهله ..وداعة الرحمن ...

داومت فطامي وداوم محمد وكلهم امل بعام دراسي جديد وحلوو
محمد هذي آخر سنة له فالمدرسة ..وفطامي آخر سنة الها فالاعدادية...
::::::::::::::
فطامي: هلا بنات..
آمنه : هلا فطامي..شوفي شوفي هالمعلمه اليديدة..
فطامي: أخييييييييييج اسميني مااحب المعلمات اليداد عالاقل الجدام عارفيلهن شغلهن..
آمنه : صدقج والله خاصة انها مواطنه وعاد بتشوف عمرها علينا..
دخلت المعلمة..
السلام عليكم ... اعرفكم علي واتعرف عليكم ... انا فلانه بنت فلان .. وووو الخ
فطامي( في خاطرها ....شييييت يلعن ابو الشركة ... من وين طلعت هذي اخيييييييييج ياربي هذي اخت محمد ياربي ليش تدرسني وانا مااطيح الا ويا خواته...خيبة لو عرفت اني اعرف محمد ياهاي نشبة ..)
وتنتظر فطامي اليوم يخلص عشان ترد البيت عشان تدق على محمد وتاخذ منه الخبر اليقين..

تدق فطامي.. وهيه مرتبشة..
فطامي : الووو
جاسم : هلا
فطامي :اهليييييييييين اوووووووووووف انت وينك بخبرك شي ضروري..
جاسم: انتي الي وينج من عد هذاك اليوم مابينتي..
فطامي : أي يوم أي خرابيط.. وفجاة ( خيبة لايكون سويتها مره هذا جاسم اخييييييييييييج والعثرة ) وعلى طول طراخ فالويه..
جاسم في خاطره حمدالله والشكر من هذي شو سالفتها..
وبعد عشر دقايق رن التلفون..
رد محمد..
محمد : الوو
فطامي: محمد
محمد :هيه غريبة ليش داقة حمدي ربج اني انا الي رديت بالصدفة ماتوقعتج تردين.. ( فهاللحظة كان جاسم يتسمع بدون لا يدري محمد ..)
فطامي : كنت بسالك عن شي ..اختك..
محمد : هيه.... هي الي تدرسكم..
فطامي: بسسسسس
محمد : عادي خلج طبيعيه ..محد يعرف شي ومحد يقدر يقولج شي..وانا موجود.
فطامي: ان شالله ..
محمد : يلا برايج عيل بسير اجلد كتبي..
فطامي: اوكي وانا بعد مع السلامة..
في هذي اللحظة..كانت الافكار تروح وتي في راس جاسم.. اخيرا عرف من هذي الي كلمها مرتين وعرف انها كانت تتحراه محمد ...بس بدون لا يعرف ان البنت الي يشوفها في بيت خالد هيه نفسها الي يحبها اخوه..

مرت الأيام..بدون لا تحمل أي جديد كل شي على ماهو عليه ..وبعد شهر من بداية الدراسة..كانت اخت فطامي رقية عندهم فالبيت ( اختها من الاب ..) وكانت تشك في رمست فطامي لانها كانت تكلم محمد بالتلفون وبدال لا تقوله اقولج قالت له اقولك.. ونست كملت السالفة وسكرت عن محمد وراحت تدرس..ومحمد بعد دخل غرفته وراح يدرس..
قامت رقية تبى تمسك أي شي على فطامي خصوصا انها تعرف انه دلوعة ابوها..
شلت التلفون وعادت الرقم..
رقية:الوو
جاسم : مرحبا..
رقية منوو وياي
جاسم : جاسم منو بغيتي اختي..
رقية: انت جاسم ولد فلان..
جاسم هيه..بغيتي شي..
رقية : لا غلطانه...مع السلامة..

صكت التلفون وعلى طول سارت صوب ابوها..ابوها كانت تعبان وبالرغم من هالشي كان انسان حااااار وعصبي وكله ولا الشرف عنده ..وهيه سايرة تواشي على فطامي وتدري انه ممكن ابوها يقتل فطامي لو درى..وهذا ابسط شي يسويه ...

رقية : أبوووووي ...الحق الحق عليه تعال شوف بنتك تعال شوف سواد ويها هاي بنتك الي مدلعنها ..يوم قتلك حرمتك ماتعرف تربي بنات ..الله يستر بس ماتيبلنا العار..
ناصر : وعيونه جمر... شو عندج شو هناك بلاها فطامي..
رقية هكيه عندك اسألها..
ناصر : فطاااااااااامي وعثرة فطامي وصمخ تعالي..
فطامي من سمعت طريقة ابوها وهو يزقرها وقف قلبها ويات تركض ..
فطامي :ها ابوي ( تبلع ريقها ) خير ؟
ناصر: أي خير بينا وانتي هنيه من عاف البنات ؟؟
فطامي ::ابوو..
ناصر :جب لمي ثمج لا المه لج بهالخيزرانه.. رقية .. يلا قولي شو شايفه على اختج
رقية : شو اختي مايشرفني هاي تكون اختي..

فطامي..تتمنى الدنيا تبلعها في لحظة... يارب شو هالقسوة... وعيونها تناظر في كل الوزايا يمكن تشوف بصيص امل يقولها امج موجودة بتساعدج ولكن هيهات لاحد يسمعج ولا يشوفج بين جبروت ابوج وظلم اختج..

ناصر : يلا رمسي شو عندج
رقية : ماشي ابوي لقيت بنتك ترمس فلان فالتلفون..
ناصر: بكل برود..فطامي..
فطامي :تشهق..نعم ابويه..
ناصر : انت تعرفين فلان رمستيه..؟
فطامي: ابوي والله والله مابيني وبينه شي اصلن مااعرفه مارمسته حرام تتبلون عليه..
وهنيه تدخل موزة..
موزة ..: ناصر انت شفيك تعرف كم عمرها بنتك عشان تتهمها بهالشي
ناصر :هيه اعرف ..ودام فطامي قالت انها مارمست الولد انا مصدقنها ..وانت رقية يلا شلي ريلج وعيالج وبيتج تدلينه ...خربتي بيتج بعد تبين تخربين بيتنا ...

فطامي تحضن امها ويدخلن في غرفة ..وتقعد تصيح ..
فطامي: امي اول مرة احس ابوي مايظلمنا ...اول مرة يوقف معانا
موزة : ابوج طيب بس هن ضاحكات عليه..بس انتي صدق ماتعرفين جاسم يابنتي قولي لاتخبين عليه عسب باجر يوم بيستوي شي نعرف نتصرف..
فطامي: امي والله مابيني وبين جاسم شي...
هدت فطامي..ولافكرت تدق حق محمد ..كانت وايد خايفة ..راحت بيت جيرانهم.. ودقت الباب فتح الها خالد
خالد: فطااامي بلاااااج..ويعج معفوس وعيونج حمرا..مريضة ؟ ..حد زعلج فالمدرسة..والا مايبتي درجة زينه ..احيدج دحاحة لوتنقصين نص درجة تشلين الدنيا.هاهاها..
فطامي: خلوود..
خالد : شوفيج ...يلاعاد مب انتي تقولين انا اخوج العزيز يلا رمسي والا تخبين علي..
فطامي : ( تغير الموضوع ) عيل وين مهره ومها..
خالد: سارن السوق يتشرن ..
فطامي: وليش ماقالولي اسير عندهم ..
خالد : الصراحة كانت مهره سايرة بيتكم تخبرج بس شافت هناك رقية وتحيدينها ماتدانيها وردت.. المهم قوليلي انت شوفيج..
فطامي: خلوود..تعرف جاسم ..
خالد :جاسم ماغيره هيه اعرفه ربيعي..انتي الي من وين تعرفينه؟!
فطامي : انزين جي جي السالفة..
خاااااالد: افففففف يوم ماارقص في بطنها هاي رقيه هاي كيف تفكر..
فطامي: ماادري ماادري عن شي ياخالد ابا الدنيا تنشق وتبلعني اموت أي شي يصير فيني وارتاح..
خالد: فطامي لا تقولين جيه..خل عنج وقومي امي تزقرنا حاطين العشا ..يلا عاد..
قامت فطامي عند خالد..تعشوا رمسوا وعقب كل حد راح يرقد.
:::::::::::::::::::::::::::::::.
بعد ايام ..لما هدت السالفة .. دقت فطامي على بيت محمد..
ردت عليها بنت..فطامي مارمست سكتت..فقالت لها البنت الي ردت
ردي ياقليلة الادب ردي قولي منو تبين...؟؟ تبين محمد هاه..
هنيه انصعقت فطامي بندت التلفون ..وهيه مش عارفة شو تسوي كيف عرفوا انزين يدرون منو انا ومحمد شو صارله..
تفكر وتفكر وهيه خايفة تبى تعرف شو الي صار..
وسط هالافكار رن التلفون وهيه ترتجف ردت ...
محمد : مي مي
فطامي: بس خلااااااص عاد مب مي مب مي شفيك..
محمد : خلي موضوع مي الحين ..انا ادري انه ماكان اسمج ولا تتوقعين انا جيران وماعرف اسمج ..بس احترمت رغبتج..بس بغيت اقولج انه جاسم ..خبر ابويه وقاله ولدك يرمس بنات.. وابوي كالعاده راغني من البيت .. وانا الحين في بيت واحد من ربعي..بس بغيت اطمنج اني بخير واطمن عليج,..
فطامي: بس انا مب بخير ياحمودي..
محمد : حمودي؟!! فديت هالكلمة يوم تظهر من ثمج..
فطامي : محمد متفيج تتفدى ونحن فهالحال انا جي وجي صارلي اليوم ..
محمد: حتى فالحزن مشتركين ماعليه حياتي تحملي ..نحن بنبعد شوي ليما تهدى الاوضاع ..عقب يصير خير ..
يلاغناتي لاني اكلمج من كابينه..
فطامي : اوكي عيني ربي يحفظك مع السلامة..

وفي طريقة الرجعه من المدرسة ...خالد يكلم جاسم
خالد : اقول جسووم ..
جاسم : نعم شو عندك ..
خالد : شوف نحن ربع ومانخبي على بعض ولا بينا اسرار وانت تدري انا نحن اقرب من الاخوان البعض..
جاسم : هيه والله تصدق حتى انا احسك اقربلي من اخوي محمد ..
خالد : ليش بينك وبينه شي..
جاسم : لا لا ماشي
خالد : المهم بغيت اسئلك انت تعرف بنات..
جاسم : انا لا ليش سمعت عني رمسه..
خالد : قول الصدق انته تعرف فطامي بنت يرانا ..اذا تعرفها ابعد عنها ولا تم تسويلها مشاكل تراها شرات اختي وماارضى عليها لو سمحت يعني والا اعتبر صداقتنا منتهيه..
جاسم : عوذ بالله من فطامي هاي شو لي فيها انا ليش شي صاير..
خالد: هيه في بيت فطامي صار جي و جي السالفة...
هنيه جاسم فهم وربط وعرف انها البنت الي يشوفها في بيت خالد هيه نفسها الي يكلمها محمد والي كلمته وهيه نفسها فطامي..لكن سوى نفسة مايعرف..وهالشي ذبحه قهر معقول البنت الي كان حاط عينه عليها تصير حبيبة أخووه..

وبعد فترة وبعد ماهدت الأوضاع..حاول جاسم بكل الطرق انه يوصل لفطامي باي طريقة .. كان يتصل يقلد محمد كان يسوي كل شي ..ومحمد مايدري عن شي..
ومرة اتصل على بيت فطامي..
ورت امها..وصك التلفون...
موزة: ..اول مرة حد يدق بيتنا ويصك..؟.
رن التلفون مرة ثانية ..
رديت فطامي..
الوو
جاسم : الوو
فطامي: مااسمع الصوت هب واضح ..
جاسم : احبج..
فطامي : شوووو؟؟!..وصكت التلفون

بعد فترة ...
موزة..: فطامي.. منو كنتي ترمسين
فطامي: امي بلاج هذي ربيعتي..
موزة : انا امج قولي ..
فطامي: قتلج ربيعتي..
موزة : انزين يوم تفكرين تقوليلي تراني موجودة..

مرت الليالي بكل حذر العلاقة بين جاسم ومحمد صارت متوترة .. وجاسم تقرب من خالد بشكل فضيع ..في الوقت الي فيه فطامي قللت زياراتها لبيت جيرانهم...وصار محمد بالنسبة الها كل حياتها بالرغم من بعده....

::::::::: نهاية الجزء الثاني :::::::::::

... مرت الأيام...بحلوها ومرها ..وتحسنت الاوضاع وهدت الامور.. وفي ليلة كانت فطامي ومحمد يرمسون ..

فطامي: حمودي..
محمد : لبيه..
فطامي :: حمودي باجر ارمضان ,, وهذا اول ارمضان النا مع بعض... احب ارمضان... يخبل جووه غير. بس ها تحمل ترمسني لين تفطر ترى مافينا على ذنوب..
محمد : ان شالله غناتي ...والعمر كله نرمض ويا بعض واشوفج دوم مستانسة جي... بس اقول فطامي..
فطامي: ها عمري شو هناك..آمر
محمد : الحين بنكمل ست شهور ومب شايفنج.. حتى ماعرف شكلج..
فطامي: محمد نحن شو قايلين ..
محمد: خلاص انزين..
:::::::::::::::::كملوا سوالف وتسحروا باول ليله من ارمضان وارقدوا..

رجعت فطامي من المدرسة ... سيارة غريبة موقفة جدام البيت..
ريال يدق الباب..
فطامي ياية من ورى ..
قربوا تفضوا داخل...
الريال: لا ماعليه بنتي بس ممكن تناديلنا الوالد
فطامي : بس ابوية اكيد راقد تعرف ارمضان وصايم..
الريال: يابنتي وعيه .. السالفة ضروري
فطامي : ان شالله
وتدخل فطامي البيت ..تروح غرفة ابوها..
فطامي: ابووووووووي نش نش في ريال برع يباك...
موزة : انا مب معلمتنج ماتوعين ابوج لو شو مايصير
فطامي: انا قلت للريال بس قال موضوع وسالفة خطيرة..
تلبس ناصر وطلع ..ركب السيارة مع الريال وراح..

موزة تنتظر وفطامي كالعاده قربها..
مرت الساعه ثنتين ثلاث اربع خمس خمس واربعين ..اذن المغرب ..وناصر مابين..
فطامي: امي فطري لو تمرة مب زين..
موزة مايهنيلي الفطور بدون ابوج..
ويرن التلفون ..
ردت موزة ... قعدت تبكي بحرقة ..
فطامي: امايه شوفيج ..ابوي صارله شي ابوي بخير ..امايه دخيلج ردي عليه..
موزة : بخير ابوج مافيه شر....
وفجاة يدخلون عيال عم فطامي وعمها البيت ..
فطامي خذ خواتج ودشي غرفتج..
ويرمسون ويا موزة...
فطامي ماتسمع شي كل الي قدرت تسمعه كلمتين...لاتخبرون فطامي لانها وايد متعلقة في ابوها ..
فطامي تظهر من الغرفة تركض..: امي امي كيف تقولين ابوي بخير هاه كيف شو صاير خبروني ابوي بلاه..
موزة : يابنتي هدي فهالشهر الكريم.. ابوج بخير بس صاير سوء تفاهم في قضية وبيدخل السجن كم يوم وبيظهر ان شالله...
فطامي: انا ابوووووووووووي سجن لالا اميه حرام امي دخيلج قولي غير هالرمسة..
امي انتي تعرفين منو ابوي امي لاااااااااا ارجوج امايه دخيلج ابوي والله مايسوي شي حرام ينسجن ..وسمعته بين الناس امي حرام عليج.قولي غير هالرمسة..امي هذا ابوي مالنا ريال غيره امي انا احبه ابوي وااااااااايد مااتخيل حياتنا من دونه امي دخييييييييييييلج..
موزة ( تتقطع من داخلها ) ..يامايا صكتي بيسمعنج خواتج ... بعدين قتلج سوء تفاهم وبيظهر ان شالله..

وفي هالوقت اظضرت موزة انها تدق لولداها فهد الي عايش في بيت ابوة .. عشان يقعد وياهم فالبيت على طول بما انه ناصر مش موجود..

غابت البسمة عن فطامي ..نست كل شي كل تفكيرها كان في ابوها ..

وفالمدرسة ..الكلام يتوجه لفطامي من كل صوب مثل السجاجين..
البنات : فطامي ليش ابوج سجنوه..انزين الحين منو يصرف عليكم هاهه..
واخت محمد صايرة قاسية كانها عارفة شي ..والدنيا قايمة على راس فطامي وماقعدت ..حتى يوم الاثنين ..فطامي كانت ماتداوم عشان تروح تزور ابوها..وبدل لا يكون رمضان هذا احلى رمضان ..صار أقسى رمضان مر في حياة فطامي..

رن التلفون: وترد فطامي..
محمد : هلا
فطامي : اهلين ..
محمد : شحالج غناتي..
فطامي :بخير..اقول محمد تقدر ماتدقلي في هالفترة (وهيه قلبها يقول محمد ارجوك لا تخليني خصوصا في هالفترة)
محمد :خير عسى ماشر حد قالج شي..
فطامي : لافديتك بس ابوي مسافر..وماريد اسوي شي غلط بعد حد يقول يوم سار ابوها قامت تلعب..
:::::::::::محمد يدري انه ابوها مش مسافر ويعرف االسالفة بس ماحب يحرجها..
محمد : خلاص غناتي الي تشوفينه وان بغيتي شي تعرفين رقم بيتنا.. وع فكرة اول مااخلص ثانوية بظهر موبايل ان شالله..
فطامي: ان شالله ...مع السلامة..
مر رمضان ..وفطامي بعيده عن ابوها..وحتى فرحة العيد مافكرت فيها..وقبل العيد بيومين.. دقلها محمد
محمد :هلا فطامي اشحالج فديتج..
فطامي: حمدالله عايشة..انا مب قايلتلك لا تدق..
محمد: هيه غناتي..بس لاتنسين اليوم يوم ميلادج..
فطامي: انا؟
محمد:هيه انتي شو تحريني نسيت هاليوم ..ماانسى شي يخصج..غناتي دخيلج ابا اشوفج انزين يلا دخيلج لو تظهرين عند الباب انا ساير صوب الدكان مشي ..
وفجاة..
موزة : فطامي ..منو ترمسين يلا سكري التلفون وسيري سكري الكراج توه ولد عمج يايب السيارة من الصناعيه..

صكت فطامي عن محمد حتى بدون لا تودعه...دخلت ولبست شيلة الصلاه وطلعت عشان تسكر الكراج ..الدنيا برد وظلام والساعه 11.30 المسا..وريح باردة خفيفه..والدنيا مغبرة..
فطامي مش قادرة ترفع رموشها من ثقل الدموع الي في عيونها كل شي يذكرها بابوها مااتتخيل العيد بدونه وهو سندها الوحيد..وفالوقت الي كانت فطامي تسكر باب الكراج.. تسمع صوت من بعيد..."شو تسووين هاه "
التفتت فطامي وتشوف واحد في نص الشارع متلثم بالغترو ولابس جاكيت بني بدون كم..
فطاامي: ( من بعيد ..) حموودي..
وخطفت تركض البيت وسكرت البيبان وبندت الليتات..وفي خاطرها تقول اميي الحين هذا حمودي جي شكله يووة يروع شكله ريال كبير مش ياهل مثل ماتوقعت..وانتظرت باجر ايي وترمسه.. وبعد الفطور على طول

فطامي: الوو محمد بسم الله
محمد: بسم الله من شوو
فطامي: بسم الله من ويهك..هذاك انته اميي كيف تروع وفيك لحيه كيف جي .. اخافك انا.
محمد: هههههه حلوة هاي كبير وفيك لحيه تراني عادي الحين كملت 18 وشي مب ياهل شوفيج انتي بعدين انا جي بنيت جسمي ضخم.. والا عاد انتي توقعتج كتكوته بس ما شالله عليج حرمة ..
فطامي : ويا ويهك استحي جب عاد..البارحة تراني كبرت ..
محمد :لا والله ...
وبين هذي السالفة وذيج مرت الايام لاجديد فيها يذكر غير بكاء وحرقة قلب يوم وليلة العيد كيف العيد بدون ابوي والله الدنيا مالها طعم ولا ريحة كله غير غير..تدخل غرفته تشم ريحة ثيابه ..والميلس فاضي بدوونه...آآآه يالحزن وقسوة الأيام.. وبعد العيد بشهر وشوي ...وبعد مايئست فطامي من كثر ماتنتظر ابوها خصوصا بعد ماعرفت انه انحكم عليه سنة.. شاء القدر انه يظهر ويا المفرج عنهم بمناسبة عيد الاضحى..
طلع ناصر من السجن لكن مش مثل ماكان قبل خصوصا انه اساسا كان ريال كبير وتعبان والسجن ماخلى فيه حيل..ومع الايام عاودت فطامي حياتها الطبيعيه..
بس محمد ماكانت تكلمة الا نادر عشان امتحانات الثانوية قربت.. فكانت تشغل نفسها مع جيرانهم وتجهز حق عرس راشد..
ام راشد : يلا عاد عقب مانفرح براشد دور خالد وفطامي ...
خالد: انجلب ويهيه ( في خاطره ..امي شو تقول فطامي مثل اختي ...)
فطامي: ههههه لو مايتم حد ماخذت خالد اخي العزيز خخخخخ

نش خالد عنهم وسار غرفته وقعد يفكر ويا نفسة ..معقول فطامي الي تعزني جي معقول احبها حب معقول تصير زوجتي... لالا ياخي شو هالخرابيط مش معقول ..وليش لا فطامي مستحيل حد يراعيني ويخاف عليه مثلها وهيه تعزني واعزها وعالاقل نعرف بعض من ونحن صغار.. الافكار تروح وترد براس خالد .. طلع من غرفته.. ولقاهم بعدهم يسولفون..
فطاااااامي : ياااااااااااااااممييي الساعه 12.30 بل بل الحين كيف برد البيت كيف جي راشد وفهد ما يوو انا منو بيردني البيت..
خالد : شوفيج هدي الحين بدق اشوف فهد وين
مهره: شوفيج ماكله قرصج ني فهد بيي الحين وبنكمل سهره مثل كل مرة..
فطامي زين..
خالد : اقول فهد بيرقد في بيت ابوه ..
فطااااامي : شيت يلعن ابو الشركة كيف يعني انا وين انام اليوم ..هذا الغبي مايعرف ان ابوي يصكر الباب الساعه 11 الحين كيف بدخل ولو بدق تلفون يفجولي الباب بيذبحوني مرتغدة برى بدون فهد لين هالحزة
خالد : خلاص باتي عندنا والصبح يصير خير..
فطامي: شو تقول انته ..
خالد :عادي انا يوم ازعل انام فبيتكم
فطامي: هذاك انت ريال بعدين انا كبرت
خالد: ايووووووووة عاد بتذلنا كبرت وكبرت..
مهره: خالد قوم نش بنوصلها..
خالد: ماستمعتي تقولج الباب مسكر
مهره: شوف يالغبي دريشة المطبخ فالسكة واكيد انت تقدر تفجها..بندخل فطامي مناك وعادي تدخل البيت هاه شو قلت..
فطامي: شوو يعني استوي قوطي تونه تعقوني من الدريشة
خالد افا عليج..قوطي عوال..
فطامي: عوال في عينك..
المهم ظهروا ثلاثتهم ووصلوا عند السكة قرب دريشة المطبخ ..
خالد: يلا انا فجيت الدريشة الحين شوي.. نقزي انزيين ونزلي بشوي شوي لا تقرقعين الصحون عن حد ينش
فطامي: حوو انته شوف الدريشة وين ... وانا وين يبالي اطول متر عشان الحقها..
مهره : شوفي انا بوخي وانتي طلعي ع ظهري وارقي عالدريشة..
فطامي : اوكي
حاولت فطامي تطلع وكانت قريب وبتلحق ..قام خالد ومسكها ورفعها يلين وصلت الدريشة .. وشوي شوي حدرت البيت..
ومن يومها تابت تتاخر..
خالد في عالم ثاني.. وفطامي حاسة بفراغ خاصة انه محمد مشغول بالامتحانات .. وقامت تقضي ثلاث ارباع الوقت عند جيرانهم.. ولمن توصل الساعه 10.30 ترجع البيت.. ومرة..من المرات..

خالد: فطامي..اقولج تبيني اوصلج نتمشى لين البيت
فطامي: خخخ جنه من بعد بيتنا فرة حصاة ماخاف لا تخاف..
خالد : لا مب جيه السالفة ابا اقولج سالفة..
فطامي: هههه لايكون غرت من راشد وتبى تعرس هاه..
خالد :احمر وانحرج وقالها اوديج شو..
فطامي ياويلي عالي يستحي اخي العزيز اوكي وديني..
خالد يمشي ورى فطامي وشوي يتقرب منها اكثر عقب سوى نفسه صدمها..
فطامي التفت صوب خالد تشوف شو صاير وصك ويهها بوية..
خالد : أحبج أحبج أحبببببببببببببببببببببببببببببببببببببببببببببببب بببببببببببببببببببببببج
فطامي : يتها قشعريرة ..مذهوله..(وفي خاطرها تقول..خالد يحبني اخوي ا خ و ي اغلى كلمة في حياتي تجاه خالد تبعثرت لالا..)
ركضت صوب بيتهم وهيه ترتجف..
وقعدت طول الليل تفكر..ياربي خالد في شو يفكر معقول من صدقه يحبني بس نحن مثل الاخوان ..لا خالد مايسويها ..هو دوم يزقرني اخته..وانا بعد..مااقدر افكر فيه ك حبيب ..انا مااحب غير حمودي.. خالد يارب يكون يمزح والله مايهون علي..
وعقب هذيج السالفة فطامي قررت تقلل زيارتها لبيت جيرانهم ..مازارتهم الا بعد عرس راشد.. وفي هذاك اليوم ..
راشد: فطامي شحالج
فطامي : هلا هلا رشود شحالك وشحال الحرمة ..
راشد :يسرج حالها..اقول من زمان مايتينا عسى ماشر عموما يلا الغدى اليوم عندنا شو قلتي..مابترديني.. صح
فطامي: ان شالله
وفعلا سارت فطامي ..وعقب الغدى قال راشد حق فطامي تيي الغرفة عند حرمته تباها في سالفة..
راحت فطامي..
فطامي : هلا شوق شحالج..
شوق: بخير يعلج الخير ..ادري مستغربة شو الموضوع الي اباج فيه
فطامي :اكيد
شوق: شوفي انت تدرين كم انا حبيت راشد.. وكيف قدرنا ناخذ بعض..وتعرفين بعد شقد خالد يحبج ونحن كلنا نباج.. ادري باقلج كم سنة فالمدرسة وحتى خالد ماكوّن نفسة .. بس يعني بغيت اخذ راييج عشان ان شالله تبقون لبعض ها شوقلتي..
فطامي: ماعرف ماعرف يصير خير ... اقول تاخرت بسير البيت.. مع السلامة...
حاولت فطامي تتهرب من الموضوع باي طريقة ..وهذي كانت غلطت حياتها...لانها علقت خالد فيها..بدل لا اتصارحه وتقوله انها تشوفة مثل اخوها.. خافت تجرح مشاعره..ماتدري انها مب بس جرحتها الا حطمت مستقبل انسان...ويبقى جرح الأيام في بدايت مشوارة...

وفي ليلة من الليالي ..
كانت موزة ام فطامي تحوط صوب الحوش الي برع صوب النخل .. وفجاة سمعت مثل حد نقز..
..وتحسب حرامي عفد فالحوش.. وقامت تصارخ فطامي لحقي خبري ابوج حد عفد علينا
ركضت فطامي صوب الميلس محد كان هناك غير ابوها وراشد وخالد..
فطامي: ابوي امي تقول حرامي عفد فالحوش
قام ناصر يركض وياه راشد.. صوب الحوش داخل
راشد: خالد انت اظهر برع صوب السكة شوف اذا حد هناك.. ..
خالد يطالع فطامي..
فطامي: هاه شو لا تقول بتشلني انا ماريد اخاف شو ها الكبار دخلوا داخل ونحن نروح برى لا ماريد اخاف
وييرها خالد من ايدها..شو تخافين وانا هنيه..
فطامي: هيه ماعليه سوبر مان عيل
وكل ساع فطامي تتعثر وخالد يمسكها..
خالد : حووو شوفيج ..
فطامي : شو ماتشوف حفر حفر وانا حافية..حشى مب سكة هذي مستنقع..
خالد : خالد وانتي ليش تطالعين تحت طالعي فوووق
فطامي: شو فوق انت بعده انا مبققة عيوني ومااشوف شي...لين اطالع فوق
خالد: فوق القمر..
فطامي: خالد لا تستوي رومانسي ترى موب وقته..يسد اني بردانه..ويالسه احاوط وياك ..بعدين ماتشوف انه ظلام يعني ماشي قمر لاتم تألف..
خالد :حس انه بينفجر.. على فطامي واسلوبها..
خالد: فطامي احبج..تعرفين شو يعني احبج (ويود ايديها بقوو ) ومابخليج للابد ولا بنفترق ابد..مابي بنت غيرج ولا ابي حرمة غيرج ..وانت تحبيني ادري..
فطامي: اقول مب جنه مطرشينا نشوف الحرامي..
خالد: انا حرامي وبسرقج الحين.. ويمسك فطامي ويضمها وهيه تشوته بايديها وريولها..
فطامي: فجني والا ترى بصرخ ..يلا عاد انسير والله الحين بايي راشد وابوي يلا عاد..
خالد: انا فرحاااااااااان وايد وايد..بطير برقص من الفرح.. ابا اطلع على يبل حفيت واقول احبج فطامي..
ظل خالد على خباله ..دخلت فطامي البيت ترقد وراشد خذ خالد وراحوا يرقدون عقب مااتاكدوا انه محد فالحوش...
وفاليوم الثاني
دق خالد على بيت فطامي..وطلبها
فطامي: هلا خلوود شوعندك
خالد: بسير السوق تبين شي
فطامي :هيه ابا شعرية برتقاليه
خالد :بس
فطامي: هيه بس
خالد:خلاص عيل ..تراني برد متاخر بحطها لج فالدريشة مالت المطبخ
فطامي: اوكيك. ...

مرت الأيام وبدت امتحانات آخر العام.. وفي آخر يوم امتحانات...
المعلمه ( الي هيه اخت محمد ) : فاطمة ممكن تراجعيني فالمكتب بعد الامتحان
فطامي: ان شالله ابله ..

خلصت فطامي الامتحان .. وعلى طول راحت لغرفة المعلمة بدون لاتدري شو يخبيلها القدر..
فطامي: السلام عليكم
المعلمة: هلا وعليكم السلام ...تفضلي قعدي..
فطامي: ها خير ابله شو هناك..
المعلمة: شو في يافاطمة انا مش هبله ولا مغفلة ..عشان مااعرف الي بينج وبين اخوي..عنبو انتي ماتعرفين كم عمرج..انت بعدج صغيرة على هالسوالف.. واخواني انا مربيتنهم وتعبانه عليهم مب انتي الي تخربين كل تعبي في لحظة.. عموما هاج هاي الرساله قريها زين واخوي بعدي عنه..
فطامي: والله حرام عليج ابله انا مالي ذنب هو الي بدى فالعلاقة حاولت ابعد بس مافي فايدة كان يهددني..
المعلمة : انا قلت الي عندي واخوي ماراح يردلج بعد اليوم واتمنى انتي بعد تقطعين علاقتج فيه ..يلا مع السلامة..
فطامي: باي..

رجعت فطامي البيت وهيه حزينه وتتقطع من الحرقة والالم .. خاين فاشل حقير ..وصخ هذا شو الي يسويه اول شي يجبرني اتعلق فيه ..وبعدين بكل سهوله يسمع كلام اخته ويتركني بس هين..طز فيه وفي عشرة من امثاله..عندي خالد الي هو احسن منه الف مرة..
فطامي في قلبها شي وتقول شي ثاني.. كانت تدري انه فالحالتين محمد ماراح يدق لان امتحانات الثانوية على الابواب وهو مشغول فالدراسة ...
فطامي : الحين شو اسوي ماريد اغلط مرة ثانية..ولا راح اعلق نفسي في خالد عناد لمحمد بخلي الامور طبيعيه ..وفعلا ظلت فطامي على موقفها بعيده عن الكل.. وفي يوم 1\6 \1997
يتصل محمد ... على بيت فطامي..
فطامي ترد..
فطامي: الو مرحبا..
محمد: هلا ..
فطامي: لا اهلا ولاسهلن فيك ..شو عندك نعم مسرع ماخلصت امتحانات عبالي مابديتوا بعدكم
محمد: شفيج ترمسني جي بعدهن الامتحانات تاريخ ثلاثة اول يوم تاريخ وتدرين طوويل وايد بس انا داق اليوم عشان شي خاص..
فطامي: مابينا خصوصيات ودربك الي يت منه تدله..
محمد: شوفيج غناتي..
فطامي: جب اقطع ..غناتي اسأل اختك المصون متفق انت وياها خلاص شو تبى داق والا بس انت تلعب وانا انهزب
محمد:شو دخل اختي الحين..
فطامي: انت وين الحين..
محمد: فالبيت..
فطامي: اسمع انزين انا بدق على راعي الدكان بطرشة أي شي وعقب بطرشة صوب بيتكم وبعطيه الرساله الي كاتبنها اختك وساعتها انت اقرى واحكم بنفسك..
محمد: ان شالله
فطامي باي..
::::::

وفعلا نشت فطامي خذت الرساله الي مكونه من ثمان صفحات بالتمام والكمال الي كاتبتنها المعلمه الي هيه اخت محمد والي فيها كلام يسم البدن وطرشتها ويا راعي الدكان يعطيها محمد وعطته خردة
محمد كان برى البيت يتريا راعي الدكان..
خذ منه الرساله وقراها اتضيج وااااااااايد.. وراح صوب غرفة اخته..
محمد: انتي شو فيج ..شو لج دخل فالبنت
المعلمه : وانت كيف ترمسني جي انا اختك العودة ترمسني جي عسب وحدة ماتسوى
محمد: سمعي حياتي وانا حر فيها احب البنت الي ابى ..وفطامي ابعدى عنها احسلج..ويرقع بالباب ويطلع...
دق على فطامي الي كانت تترياه..
محمد: الو هلا فطامي..
فطامي : مرحبا حمودي.. ها شو قريت الرساله..
محمد: هيه فديتج ماعليج منها..انا والله اني ماادري هذي تطبخ على كيفها... نرفزتني..
فطامي : ( عقب ماهدت ) خلاص عيل طبها عنك ولا تقعد تفكر سير ادرس .. يلا ابا اشوف نسبة عاليه..
محمد: شو ادرس انتي بعد ... تتحرين الكلام الي ياج شوية وتتوقعين انا ارضى بهالسهولة..
فطامي : (تبى تغير الموضوع عشان تهدي الوضع ) ..محمد ماقتلي ليش كنت داق..
محمد: فديت روحج والله ...اليوم اليوم اليوم واحد سته..
فطامي: فدييييييييييييييييييييييييييييييييييتك كملنا سنة واووو ما شالله علينا..
محمد : فديت قلبج هيه سنة وان شالله العمر كله ياقلبي..تذكرين حشرتج قبل سنة طلعتي روحي لين طعتي ترمسني..
فطامي: ياسلام وعشان جي اصلن انت وثقة فيني وحبيتني..والا تباني ارمس أي حد..
محمد: واحبج وبحبج العمر كله ..سمعي بهالمناسبة انا يبتلج هديه..
فطامي: يالكحيان..بعد تيب هدايا
محمد : عن الطنازة اوووووووووه تعالي نسيت اطرشها ويا راعي الدكان سكري سكري بدقله اطرشه أي شي وبعطية الهدية ترييه انزين لاحد يظهرله..
فطامي : اوكيك بس ماقتلي شو الهديه..
محمد : يلا انتي بتشوفينها..وانا مابدقلج عاد حياتي بسير ادرس ان شالله ..
فطامي: لحظة حووو كم رقم الجلوس مالك عشان يوم تظهر النتايج..
محمد: حوو جي انا مابموت برمسج عقب الامتحانات
فطامي: مابا يلا قوول
محمد: 619
فطامي : بالتوفيق غناتي بدعيلك وداعة الرحمن
محمد: فمان الله..

طلعت فطامي ركض عند الباب تتريا راعي الدكان..
وفعلا يا راعي الدكان وعطى فطامي ظرف..وراح
فطامي: احيده جنه قايل هديه ..مااشوف شي غير ظرف.. يلا بسير افجة..
راحت فطامي الحجرة..وفجت الظرف ولقت فيه ثلاث اشياء..
الاول : صورة محمد وهو لابسة نظارة شمسية ...
فطامي: شوف الغبي خخخخخ حد يصور جي ..
والثاني : ورقة صغيرة راسم عليها محمد وردة فيها ثلاث اوراق ومكتوب عليها "زرعتك في خفايا الروح وردة ..ولو تعطش رواها دمع عيني.."
والثالث بطاقة ..مكتوب فيها كل عام وانتي حبيبتي..
وكانت هذي اول شي تاخذه من محمد بعد الرسالتين الي قبل.. استانست فطامي وخذت الظرف ويودته فالخزانه ..
وبكذا يسدل الستار على اول سنة ..سنة احداثها كانت قليله ولكن هكذا كانت البداية لجرح الأيام....(1996-1997)

::::::نهاية الجزء الثالث:::

::

مرت أيام الإمتحانات .....فطامي ومحمد ينتظرون النتيجة... محمد يقول انه سوى زين ..والله اعلم..
..وفطامي محتاسة ياااااااربي..شفيه هذا لا دق ولا يرد ومحد ياب لي الجريدة الحين كيف بعرف النتيجة.. وظلت تدور فالحوش من الفير يلين المغر ب..وبعد صلاة المغرب رن التلفون وتركض..هاه الوو
محمد: هلا
فطامي:اهلين بشر شوو سويت
محمد:شو ابشر
فطامي: لاتقول رسبت.......... خيييييبة....... لاحمودي دخيلك لأ
محمد:لا بسم الله شو رسبت نجحت بس النسبة مب لين هناك
فطامي: افففففف منك زيغتني مالت عليك.. يعني تدخلك الجامعه او كلية الشرطة؟ والا لأ؟
محمد :هيه ..يبت 70 بس حرام علي ذيج الدراسة..كنت اتوقع ايب عالاقل نسبة فالثمانين
فطامي: احمد ربك و70 والا 90 ماشي فرق اخر شي بدش كلية الشرطة ان شالله بس لا تضيج بعمرك فديت روحك انا... يلا عمري عاد مبروك ألف ألف مبروووووووك..
محمد : الله يبارك فيج غناتي ..وحمدالله ع كل حال ..أقول غناتي..عاد الحين بنشغل شوي ..فالتسجيل وجي..تعرفين عاد
فطامي: افا عليك خذ راحتك..

فعلا بدى محمد فالتسجيل..::::سجل في كلية الشرطة كان مستوفي كل الشروط بس لان ماعنده واسطة مادخلووه حزن وايد تحطمت كل احلامه وآماله ..فطامي حزنت من حزنه ..فقرر يدخل دورة الشرطة الي في منطقة العوهة وعقب يكمل دراستة فالجامعه في كلية الشريعه والقانون..يعني يشتغل ويدرس وبكذا يوصل لحلمه لكن من طريج ثاني..طريق أصعب المهم يوصل ويصير وكيل نيابه مثل ماوعد فطامي...

وفي ليلة سرمديه من ليالي الصيف..ليلة ماشافت النور..

فطامي ومحمد يرمسون فالتلفون :::::::::
خالد وجاسم يرمسون فالتلفون ::::::::::::
فهد يرمس ولد خالته عوض فالتلفون:::::

المصايب تحل من كل حدب وصوب...

خالد: جاسم بما انك صديقي وربيعي الروح بالروح بقولك شي..
جاسم :افا عليك قول سرك في بير..
خالد: تحيد سالفة فطامي..
جاسم : هيه
خالد: تصدق اني اموت فالتراب الي تمشي عليه.. وخلاص قررت اترك المدرسة واسجل فالجيش المهم آخذها فاقرب فرصة..ماباها ولا اتخيل تصير لغيري.. فديت روحها لو تدري كم أحبها..
جاسم : ( متردد شو يقول .. لكنه انفجر في لحظة قهر..)خالد انت صاحي..؟شوفيك ينيت انت تضيع مستقبلك ودراستك عسب وحدة مثل هذي.. هاه بلاك قول صاحي انته صاحي؟
خالد: ايه جاسم ثمن كلامك واحترم الفاظك ..شفيييك مااسمح لك...تغلط على فطامي..وبعدين انت شو تعرف عنها عشان تقول وحدة مثل هذي..(ويقوم خالد ويزخ جاسم من حلجة)
جاسم: فجني قتلك خوز ايدك.. وبعدين شوف من الآخر فطامي ..تحب اخوي محمد وهو يحبها ..واذا مش مصدق تذكر السالفة يوم قالوا اني ارمسها كانت ترمس اخوي..وحتى دق بيتهم الحين بتلقاه مشغول.. لاني طالع من البيت احيد اخوي يرمس فالتلفوون يعني اكيد يرمسها..
خالد : جب اقطع فطامي مب راعية هالسوالف..بجتلك تعرف شو يعني بجتلك..وبرقص فبطنك تراني..
جاسم: انا قتلك..واذا مش مصدق..روح تأكد بنفسك..
هنيه خالد حس انه بيذبح فطامي وجاسم وكل حد جدامه ..خلاص اسودت الدنيا في عينه..كل شي قدامه صار ظلام.. فطامي فطامي معقوول ...وشل كل حقد الدنيا في قلبه على فطامي..وترك جاسم...ظل بروحة يفكر ويفكر في غرفته المظلمة ..والشيطان يلعب براسه ...كان بيروح بيت فطامي..بس كان يكره حتى يشوفها فقرر يدق حق فهد..
فهد اخو فطامي في هذي اللحظة كان يرمس عوض ولد خالته
عوض: مرحبا فهد شحالك وشحال خالتي..
فهد بخير يسرك حالهم..انت شحالك..
عوض: بخير يعلك الخير..اقول فهد بغيتك في سالفة...
خالد: سم
عوض : سم الله عدوك ..انت تعرف اني تخرجت من الدورة فالجيش وحمدالله كونت نفسي .. ومابلقى احسن من بنت خالتي فطامي..تعرف انه في حياتي مافكرت في غيرها وامي حاجزتنها لي من يوم عمرها سنة
فهد: افا عليك وهيه وين بتلقى احسن من ولد خالتها..وبسها الحين بتخلص الاعدادية وان شالله بتعرسون ونفرح فيكم..

سكر فهد عن عوض...وبعد ثواني يرن تلفونه ...
خالد: الو فهد انت وين
فهد :بسم الله انزين سلم ..
خالد: مب فايج ..تعال تعال البيت اباك ضروري
فهد :خير عسى ماشر
خالد يوم بتوصل بتعرف..
سكر خالد عن فهد... وفهد مب عارف شو صاير على طول سار صوب بيت خالد يشوف شو عنده..
وفي هذي اللحظة فطامي ومحمد يالسين يرمسون فالتلفون ولادارين بالدنيا..خالد دق على بيت فطامي عشان يتاكد انه التلفون مشغول وانها بعدها ترمس محمد مثل ماقال جاسم عشان يرتب الموضوع قبل لا يوصل فهد..

وصل فهد عند خالد ..ولقى خالد شال سكروب وسلك فايدة ..وسار صوب السكة..
فهد: خالد شو تسوي شو تبى ساير صوب السكة..وشو ها الي شالنه فايديك.. لاتقولي تبى تصلح الدراجة...ياخوك طبها ماتتصلح...
خالد:الحين بتعرف..
قام خالد وفج فيشة التلفون الي مركبة فالسكة ودخل فيها سلك ودخل السلك في سماعه وقال حق فهد اسمع..
فهد : شو اسمع ..تخبلت انت شو قاعد تسوي؟
وشوي وفهد يسمع فطامي تضحك وترمس فالتلفون .. ويا واحد
فهد: خالد شو هذا هذا صوت فطامي..
خالد: هيه هذي اختك المصون الي عادنها وحدة من خواتي ..شف شف منو ترمس محمد.. وهذي اختك..يلا عاد بنشوف كيف بتربيها..
فهد خلاص مايشوف من الضيجة..وماعنده أي شك خلاص كل شي سمعه باذنه.. ونفس الوقت يحاول يجادل نفسة معقول فطامي...يجتلها والله اذبحها..

ودخل البيت وكل شر الدنيا فيه.. خلاص رايج يجتلها..
فطامي فطاامي ..
فطامي: ( وقف قلبها من الخوف )محمد لحظة لحظة يا فهد بشوفة شو يبا برايك بسكر
محمد: يالخبله لا تسكرين بيشوفج مرتبكة لوسكرتي بيشك فيج خلج طبيعيه..
فطامي: ان شالله لحظة لحظة..عيل
فهد ياخذ السماعه من اذن فطامي..
فهد : الو الو رد يالسـبال..
لكن محمد مارد ونفس الوقت ماسكر يبى يسمع شو يصير ..
قام فهد..وضرب بالسماعه على راس فطامي..ووهيه تصرخ.. وتترجاه
فطامي: فهد دخيلك بس دخيلك آآآه فهد بموت حرام..
قام فهد ..وصفع فطامي كم كف ..لين طاحت ..عقب قعد يرفسها في بطنها وهيه تصرخ وتبكي..
فطامي: فهد دخيل روحك توبه والله توبه خلاص مابعيدها بس لاتضربني دخيلك والله بمووت يعور دخيلك ارجووك يافهد
فهد:يعور الضرب..هاه احسن دوااج يوم مااقتلج واشرب من دمج مابرتاح
قام وبطل واير التلفون ولفه على ايده وقعد يضرب فطامي..
فطامي تتجلب يمين ويسار مابيدها غير تتوسل فهد..لكنه كان يتلذذ كل ماتصرخ زادها... وهنيه تدخل موزة البيت الي كان برى وتسمع صريخ فطامي..
موزة : شوعندكم فهد قوووووم قووم لابركتن فيك من ولد قوم ذبحت اختك
فهد : جان زين تموت وارتاح منها..
ويقوم ويمسك فطامي من شعرها ويسحبها فالغرفة ..
فهد: اذا طلعتي من الغرفة لين ارد لا تلومين الا نفسج..
وطلع من البيت ولقى خالد يترياه برى..
فالوقت الي موزة تحاول تعرف السالفة من فطامي ..بس وين فطامي ماعاد فيها حيل تقول شي وهيه ماعاد فيهاعظم صاحي الدم ينزف من خشمها وثمها..وجسمها صاير كله ازرق من الواير..

اما محمد فطلع من البيت ركب سيارة ابووه وهو خايف شو بيصير لفطامي الحين..بدون لا يفكر ان الدور ياي عليه..
وطبعا خالد يبى ينتقم من فطامي ومحمد باي طريقة ..وقاعد على راس فهد..فالوقت الي فهد قاعد يفكر كيف بيوصل حق محمد ...دم فهد يثور يبى يلقى محمد ويقتله عشان يبرد حرته..

خالد : فهد شو رايك تدق على عوض وتخليه ايي هنيه ونادب هالسبـال محمد
فهد: ياريال كيف مايا على بالي..والله انه حتى من الضيج عقلي موقف مااقدر افكر..
قام فهد واتصل حق عوض..
فهد: مرحبا عوض ..وينك
عوض:قتلك تراني توني راد من بوظبي..
فهد: تعال تعال هنيه واحد سبال اباك تادبه ..
عوض : فهد يوز عن المشاكل شو سبال شو مسوي عند منو متضارب
فهد : أي متضارب ياريال.. توني زاخنه يرمس فطامي.. فالتيلفون وتقولي مشاكل ..اذا بتي قول مابتي روحي اعرف اتصرف..
فهاللحظة عوض ..تمنى الدنيا تبلعه ولايكمل فهد
عوض :شووووووووو فطامي..انت شو تقول ...
فهد : هيه فطامي ماتسمع..الحين بتي والا شوو
عوض: ياينك..فالدرب
نّزل عوض العداد على الاخر يسوق بين 180-200 وعلى كبر عوض وضخامته..تم يشهق شرات الحرمة.. بنت خالته..فطامي.. الي توها فاول عمرها تسوي جي.. معقول..تروح بين ايديه في غمضة عين..من هذا الي ضحك عليها ... فطامي الي قاعد يخطط يتزوجها.. فطامي الي انتظرها متى تخلص الاعدادية....معقول..صدق دنيا ..عوض مايشوف والدنيا ليل.. ودموعة تغلبة وعيونه تتطاير شر..صحيح ما عاش قصة حب مع فطامي بس هيه بنت خالته ويباها له ..وهالشي مقرر من زمان..وهاللحظة كل الي فبال عوض انه يوصل للمكان الي فيه فهد باسرع وقت....
مسك خط بوظبي العين لحد ماوصل .. رّكب عنده فهد وخالد وساروا صوب الدكان الي يتجمعون عنده الشباب..
وكانت ليلة جمعه والكل هناك..ظلوا يتراوغون بالسيايير عوض ..يلاحق محمد..لفة وثنتين وعشر اخر شي سكروا الطريج على محمد واضطر انه ينزل من السيارة ..وهنيه وقف عوض السيارة ونزل ومعاه خالد وفهد..
اما محمد فنزل بروحة..مستسلم للواقع..تعلم من فطامي انه لو هرب بيعيش طول عمره هارب لكن لو واجهه بينتهي الموقف بعد لحظات ..ينتهي كيف ما ينتهي المهم انه ينتهي ويعرف مصيرة ..
عوض يرمس الشباب الي متجمعين في هذاك المكان..
عوض: شوفوا ياشباب تراني ماعرفكم بس ادري انكم تعرفونه ..والي بيسوي عمره ريال ويبى يدافع عن ربيعه ايي جان في شاربه خير..
محد تحرك من الشباب..ولا واحد فيهم تجرا يتكلم جدام عوض..لانهم يعرفون انهم مب قده..

قام عوض وزخ محمد من حلجة ..
شو تبى ترمس بنت خالتي هاه..
محمد: احبها
عوض: تحبها يامسود الويه وتقولها في ويهي صدق ماتستحي
انقهر عوض قهر فضيع من رد محمد وقام ... يشوته في بطنه وياخذ حديدة وتم يضرب محمد على ريوله لين ماخلى فيه عضم صاحي.. ومحمد لاحول له ولا قوة يعني حتى ماحاول يدافع عن نفسة..
عوض :هاه ..شو قلت اسمع مرة ثانية
محمد: احبها وبتزوجها بعد..والي تقدر تسويه سووه .. ولاتسوون عماركم قويين عليه وانتوا ثلاثة وانا واحد اونكم رياييل
عوض : تخسي ..وقام يضرب محمد بدون لا يحس ..ومن الضيج مسك الحديده الي بايدة وضرب محمد على راسه..لحد ماطاح محمد مغمى عليه..فهد وخالد قاموا يرفسون محمد يبون يبردون الغصة الي فيهم بالرغم من انه محمد مغمى عليه يعني مايدري عن شي..
وعقب ماشبعوا منه ضرب عقووة فيه دبة سيارته ..
عوض رجع بوظبي وخالد وفهد رجعوا البيت..

رجع فهد البيت.. ودخل غرفة فطامي..
سمعيني زين.. هالسبال الي اونج ترمسينه تراه لايحبج ولايباج قاص عليج
عنبو من اول طراااااااق قال انا ماباها هيه الي تدقلي..هيه ماذيتني
زين جي سودتي ويهي بين ربعي ..بس بتشوفين دواج عندي اذا مازوجتج عوض فاقرب فرصة مااكون انا فهد هذا اصلن اذا عوض يرضى فيج..
والتلفون ان صكيتيه بجتلج..تسمعين والا لا..

فهالوقت.. فطامي ..يغلبها الالم والحزن مش عارفة شو تسوي كل الي تبى تعرفة محمد.شو صار فيه؟. معقول الحين فهد يقول الصدق والا يجذب.. شو اسوي ياربي.. حاولت مرة وثنتين تقوم بس وين تقدر تقوم بعد هذاك الضرب كله ..حالها مش احسن من حال محمد ... الي بعد صلاة الفجر مر عليه واحد من ربعه بعد ماشاف الدم يقطر من دبة السيارة ووداه المستشفى وتحجج باي شي عشان يعالجونه... محمد ماقدم شكوى ولا تكلم قال انه طايح بالرغم من انه الضرب واضح..بس ماكان يبى يسوي فاضيح حق فطامي..كفاية الي صار..

مرن يومين وحالت فطامي كل ماهي تدهور امها تحاول توديها المستشفى بس مش قادرة تخاف يسالونها او يشوفون علامات الضرب وتستوي قضية ..
حاولت فطامي تتمالك نفسها وتوصل للتلفون بالرغم من خوفها بالرغم من انها تدري انه لو شافها فهد بتكون نهايتها... بس الموت ارحم الها من انها تعيش مب دارية عن محمد .. فتشجعت ..خاصة انه فهد طالع من البيت..رايح ياخذ كاشف للتلفون..
وقبل لا ترفع فطامي التلفون.. رن فايدها
وردت الوو
محمد : حبيبتي انتي بخير..
فطامي :انت الي بخير حبيبي..شو صار طمني..
محمد: اطمني فديتج صار جي وجي.. انتي شو صارلج
فطامي : مثل الي صارلك..
محمد:شوفي فطامي حبيبي.. انا بحاول اكلمج من كابينه انزين الساعه عشر كل يوم ..
فطامي : زين تسوي ..لانه فهد بعد رايح ياخذ كاشف للتلفون واخاف يشوف رقمكم وتصير مصيبة..
محمد : وانت بعد لاتدقين بيتنا لان ابوي من صارت السالفة وهو كارهني وشوي وبيروغني.. انا بدق تحملي لين اشتغل..باخذلي موبايل وباخذلج انتي وبنرتاح من فهد وبلاوية..
فطامي يصير خير ..بس انت بخير..
محمد : هيه فديتج لا تخافين..رحت المستشفى وسولي 6 غرز في راسي وباقي جسمي مع الايام بيصير احسن..
فطامي: حسبي الله عليهم جان ضربوك في راسك يعل ايدهم الكسر
محمد:لاتدعين فديتج..مب زين... هاتبين تشوفين الغرز..عشان تعرفين شقد احبج وكم مستعد اتحمل عشانج
فطامي: وعععععع اخاف ماريد.. بعدين اتصالك الحين عقب الي صار اكبر دليل انك تحبين حشى ماتتوب
محمد: حد يحب وحدة مثلج ويتوب.. المهم ياالله انزين سيري ارتاحي وفاقرب فرصة بدقلج فالوقت الي اتفقنا عليه..وبحاول ارمس من كابينه بعيده عشان محد يشوفني..
فطامي: خلاص اوكي وداعة الله..

وفعلا ..كان محمد يراقب فهد وينتظر اللحظة الي يروح فيها صوب ربعه عند الدكان فيروح محمد عند اقرب كابينة عشان يدق حق فطامي..ويطمن عليها..الحال كان صعب محمد حتى ماعنده فلوس ياخذ بطاقة..والبطاقة تظل بالاسابيع بس يدق يطمن على فطامي ويسكر..وابوه مايعطيه مصروف ..والحال متعقد ..وامه كل مايطلبها تقوله ماعندي..ومرة ايام صعيبة عليهم لدرجة انه قامت فطامي تاخذ البطايق وتطرشهن مع راعي الدكان حق محمد عشان يكلمها من الكابية .. واحيانا تتحجج باي شي عشان تاخذ مصروف من اهلها ..وتطرش حق محمد عشان يوم يبى يطلع يروح يسجل للجامعه او شي..عاشوا كانهم شخص واحد بالرغم من قسوة الظرووف..محمد كان يستحي من فطامي ومن نفسة .. بس هيه كان تهديه ..وتقوله مابينا شي حياتي..

وفي يوم من الايام
فطاامي: حمودي ابا اشوفك دخيلك خلاص تعبت عنبو من ست شهورماشفتك ..لو من بعيد لو حتى وانت مار بالسيارة
حمودي: تم فديتج... شوفي انا مااقدر امر من جدام بيتكم .و.الحين قاعد ارمسج من هذي الكابينه وسط المزارع..عشان محد يشوفني ..انزين وانا را د بتشوفيني مارمن الشارع الثاني . الي يودي صوب المزارع...بحط هذي الاغنية مالت عبد المجيد(روحي تحبك غصب عني تحبك والمشكلة حبك بروحي ذبحني..)وبطول عالآخر يوم تسمعينها ظهري اوكي
فطامي: ان شالله يلا مع السلامة..
وظلت فطامي تلمح محمد بهالطريقة ..وكان كل يوم يحطلها اغنية شكل بعد كان يخاف حد يقلد او تنكشف او شي يصير..ورضت فطامي بهالطريقة وكانت تعني الها واايد...صحيح ماكنت تشوف ويهه بس من على بعد اكثر من كيلو..لكن المهم تعرف ان في هذي السيارة حمودي..حبيبي.. وانه بخير..

:::::::::: نهاية الجزء الرابع:::::::::::::::

مرت الأيام وقربت دورة الشرطة.. تبدى وفطامي مش قادرة تتخيل 45 يوم ماتكلم محمد..ومحمد نفس الشي مش عارف كيف بتمر عليه 45 يوم بدون لايعرف عن اخبار فطامي شي هذي اول مرة تصير انهم يفترقون اول مرة يبات محمد برى الحارة..شقد صعب اتخيل الحارة والفريج بدون محمد..فالوقت الي كان الحقد الي قفلب خالد يكبر ويكبر مع الايام كل حبه لفطامي تحول لحقد وكراهيه ماتنوصف...خصوصا بعد مااتاكد انه فطامي تحب محمد ومحمد يحبها..ومستحيل يخليها..بس ماقدر يمسك عليهم شي..وان اجتماعهم قرب لان محمد خلاص بيشتغل وفاي لحظة بيتقدم وبيخطب فطامي..صحيح فهد ماراح يوافق ..بس الشور عند ابوها ..فهد مهما كان اخوها فقط من الام..ولها السبب صارت الدنيا ماتعني له شي الدراسة تركها والتحق بالجيش..وظل ضايع بين البنات..كل يوم يضحك على وحدة كان ..كل مايدمر حياة انسانه يحس انه انتقم من فطامي..ويرتاح ..لكن راحته ماتدوم ويحس انه ما شفى غليلة ويتعرف على الثانية والثالثة وعاش على هالموال..

وفي يوم من الأيام
فطامي: حمودي.. (وتبدى تبكي قبل لا تكمل الكلمة )..
محمد: فطامي خلاص فديتج ..ماتهونين عليه تبكين دموعج غالية يالغالية..يعني تحملتي كل هالاشياء تحملي هالشي الحين وهانت ..الحين بشتغل بنرتاح من اشياء وايد صدقيني.. وحتى لو صارت مشكله لا سمح الله ..بنقدر نواجهاا انا بكون اشتغل واقدر اخطبج من ابوج.. وانتي ماعدتي صغيرة يلا حبيبي..يلاعاد شوفيه الحلوو زعلان
وبعدين نحن ليش نتحمل لما الالم يصيرلنا من الناس ومش قادرين نتحمل في سبيل سعادتنا..
فطامي: (شجعها كلام حمودي وتمالكت نفسها )..بس مااقدر والله ياحمودي مش متخيله ابعد عنك كل هالمدة وايد حمودي فديتك والله وايد..ماعرفك يوعان شبعان والا مريض او صاحي..حبيبي فديتك ..
محمد: ادري عمري لا تصحين ولا تراني بصيح..يلاعمري صدقيني اول مالقى فرصة برمسج اوعدج..حبيتي تعرفين هن بس 45 يوم حجز عقب بتم اداوم وارجع.. الخميس والجمعه ..يلا عاد حياتي اول مرة برجع اجازة اسبوع وبرمسج يلين تملين مني..
فطامي : ان شالله
محمد: فطامي نشي تريي راعي الدكان مطرشلج وياه شريط خالد محمد (عرقوب) تسمعيه وتذكريني
فطامي: ان شالله..
وفعلا راح محمد الدورة الي بدت يوم الاثنين وكانت الايام عند فطامي اطول من شهرها كانت دوم تسمع خالد محمد وهو يقول "توعد وتنسى موعدي وياك يازين هذا الطبع مايفيد وش ياك لول كنت محلاك عرقوب علمك المواعيد "..وتذكر محمد وسوالفهم..قبل..
عقب حطت شريط بالروغه..
"يوم حانت ساعة وداعي..ِشفت عين الخل دماعه..قلت يالمظنون ش الداعي..قال ودي نسفر رباعه..اختلطت فكري واوضاعي..ظن قلبي قامت الساعه"..يووووووووه يامحمد وينك ياشين الدنيا بدونك يانظر عيني..
وجي كانت تمرر الوقت وحيدة بين الغرفة والمطبخ..حتى ماقامت تزور بيت خالد ابد..خالد الي صار وحش من بعد ذيج السالفة ..وكان يحس انه نار الانتقام الي في قلبه ماطفت ..كان يبى يورط محمد باي طريقة المهم عنده انه محمد يطيح من عين فطامي..ولاتعود تحبة..المهم مايحس انه فطامي بدت محمد في يوم من الايام عليه..بالرغم من انه خالد يمتلك جمال ...محمد مايمتلك ربعه..ومع ذلك ..مااثر جمال خالد في فطامي..
امافهد صار يراقب فطامي...ومنكد عليها عيشتها..وخالد كل يوم يالف قصة..ويقولها لفهد..كل يوم كانت فطامي تنظرب اذا مش بالعصى بالواير واذا مش بالوايربالمكنسة..بسبب وبدون سبب..لدرجة انه جسمها صار خلاص وكانه مخلوق للضرب بس..هذا في كوم وفراق محمد في كوم..كله يهون عشان عيون محمد..

فطامي فاول ثانوي والدراسة مب هينه والظروف زفته ولازم تاخذ درجات عالية لانها وعدت محمد تظهر الاولى مثل كل سنة.. بس وين وكيف؟.. الدنيا اصعب من انها تتحملها..صارت فطامي في عالم وحيد بعيد عن اهلها واخوانها وابوها وامها..الي كانت في يوم هيه كل حياتهم وهم كل حياتها..صارت تستحي من الكل عقب ذيج السالفة و45 يوم مب راضيات يمر طلعن روح فطامي وماخلصن..
فطامي تسمع امارات اف ام ومعلقة الراديو فالدريشة.. وتي اغنية..ميحد حمد :ياحبيب الروح بكتب لك وصاتي..ان غديت اليوم في حبك جتيل..انشدك بالله لي طفت برفاتي..لاتخلي دمعة عيونك تسيل..حسبي الله عالذي سبب شقاتي..لي سقاني المر عقب السلسبيل لي بعد مجراك عن مجرى حياتي وابعدك عني بعد عمر طويل..)
مرن الايام وانتهت فترة 45 يوم .. وفالليل الساعه عشر ...في اليوم الي كانت فيه فطامي تحسب الثواني لانها تدري انه محمد اليوم بيدق اليوم بتسمع صووته
رن التلفون:
محمد: فطاااااااااامي فديتج فديتج والله مشتااااااااااااااااقلج ميت ميت عليج ياااااااااااالله مابغت هالايام تمر
فطامي: فديت نصخك..فديت روحك..فديت قلبك .. ياعمري هيه والله مابغت تمر وانا مشتااااااااقتلك اكثر يابعدي..
محمد : شوفي حبيبي انا بتم وياااااااج 10ايام تصدقين قبل لا يبدى الدوام..عشر ايام كامله..مااشوف غيرج ماارمس غيرج حبيتي والله يااااااااااسلام شو بخلي هالعشر ايام كل يوم بيكون احلى من الثاني..وبعد بمر جدام بيتكم ماتبين تشوفيني صااااااااااير اسود من الدورة ههه
فطامي : والله..اكيد ابا اشوفك..عاد انت مبونك اسود الحين صرت فحمة بعد ماتنزاد هههههههه
محمد: هيه عيل شوو..أصيل طال عمرج ..
فطامي : هيه ماعليه
محمد: سمعي الحين بسكر عنج وبسير اتحلق..مستوي مطوع..والحية الله لايراوايج.. وبعبي السيارة بترول وان شا الله يوم برد بمر جدام بيتكم ..وبشغل نفس الاغنية ..وانا ساير صوب الكابينه.. عقب ان شالله شالله برمسج و بنسهر مع بعض يلين الصبح
فطامي : وفهد؟
محمد :ماعليج شفتهم متجمعين عند الدكان شكلهم سايرين شلة شباب صوب صلالة وفهد وياهم ..شو انتي مش عايشة فالبيت..ماتدرين عن شي..توني شايف السيارات بس ظني خالد مب وياهم..
فطامي: صدق والله زين..اوكي عيل عمري تحمل على عمرك اترياااااااااااك مع السلامة
محمد:وداعة الله... فطامي..حسبي يلا ساعه ونص بالضبط وبدق..
فطامي: ان شالله ..بحسبهن لاتتاخر...يلامع السلامة..

فطامي ومحمد الدنيا ماشالتنهم من الفرح مايدرون ..ان الفرحة في هذا الزمن ماتتم خاصة للناس الفقارى مثلهم
مايدرون ان الحقد يقتل وان الحقد الي فقلب خالد ماتشله الدنيا كامله..

خالد كان يعرف وحدة من هذيلا الي ماعندهن ولي..وكان ينتظر رجعة محمد من الحجز بفارغ الصبر ..مش حبا فيه لكن عشان ينفذ الي فراسة...
خالد:الو حبيبيتي ..
سمر : هلا غناتي لبيه .. هاه يا ربيعك الي تترياه
خالد : هيه شوفي الحين..هو توه طالع من البيت ساير صوب السوق.. روحي انتي عن محطة ادنوك..بتحصلينه هناك اكيد بيمر المحطة ..واذا ماوقف فالمحطة..لحقية فاي مكان فالسوق.. السيارة لونها جي جي والرقم جي جي ..سوي نفسج حرمة عادية وطلبي منه يوصلج ..حاولي باي طريقة .. والباقي تعرفينه انتي ما اوصيج..
سمر: هذي شغلتي مب انت تعلمني اياها بسس كم تدفع..
خالد: ياحياتي.. انت سوي هالشي وهو بيدفع مب انا..
فعلا قامت سمر.. تلبست عباة راس ..وراحت صوب محطة ادنوك والساعه قربت على 11
وهناك كان محمد مار..
وقف السيارة وعبى بترول وهو طالع يشوف حرمة تاشرله..
رد ريوس..
محمد: هلا بغيتي شي..تاشريلي انا؟!
سمر: هيه والله ياخوي ينوبك ثواب جان بتوصلني البريمي..انا محنية وتاخرت عند المعاريس..و تعرف الدنيا ليل واخاف اركب في تكسي
محمد: عادي عندج تركبين عندي يعني؟!
سمر: الحاية بعد ..و ولد البلاد اامن من البتاني..عبلت عليك اخوي
محمد: لا افا عليج انا مبوني رايح شارع الصاوري بتحلق...
شغل محمد السيارة وتحرك .. وهو يقول شو بلاني فيها هذي الحين..اوهو بلاني انا يلا بوديها وبفتك عشان أخلص بسرعه و ارد ومااتاخر على فطامي..ادريبها بتذبحني لو خليتها تتريا... راح محمد البريمي..واول مادخلها..
محمد: اقول..
سمر : (بدلع ) نعم
محمد: وين انزلج.. يعني وين تبين
سمر: من قالك اني بنزل
محمد شو من قالي انتي قلتيلي وصلني البريمي وهذا انا وصلتج يلا نزلي شو تترين..
سمر : انا مابنزل اساسا انا شاردة من بيت هلي وانت وصلتني خلني وياك خذني ..مابا اروح مكان
محمد بتنزلين والا انزلج غصب
سمر: مابنزل..انا راكبة عندك فالسيارة وانت شالني من المحطة وكل الي يشتغلون فيها شافوك واذا نزلتني بدق على الشرطة وبقولهم كل شي
محمد: دقي حق الي تبينه ..يلا نزلي اشوف
سمر مش راضية تنزل.. ومر الوقت ومحمد يباها تنزل بس هيه متسمرة عالكرسي..
محمد يدزها وهيه تهدد بالشرطة ..وفعلا طلعت تلفونها ودق على الشرطة... ويات الشرطة وخذتهم للمركز.. محمد ماكان خايف لانه يدري انه مب مسوي شي.. .. وفالمركز..
الشرطي: محمد تعرف فلانه..
محمد:لا
الشرطي عيل كيف طالع وياها ..ليش تجبرها تركب وياك تالي الليل ..هذي بنت ناس كيف تسوي جي بنات الناس هب لعبه..ترضى على خواتك..
محمد: ماطلعت ..هيه قالتلي وصلني والله
الشرطي : لا والله علي هالرمسة..شوف الساعه كم الحين وانت تحوط ابها في سيارتك وماطلعت عند حد ..ماشي الحين تثبت عليك قضية بتنسجن شهرين .. وعقب لازم تدفع مبلغ حق البنت تعويض..
محمد:شو تعويض شو سجن..اقولك والله اني ماعرفها هيه تتبلى عليه..
الشرطي: ماشي نقاش ..والا جي والا تتزوجها..
محمد:لا السجن اهون ولا اتزوجها..
وهذا الحال في مجتعنا فالسوق او فالجميعه أي وحدة ضايعه تعق بلاها على حد من الشباب الامر بغاية السهوله .. والشرطة دايما توقف عند البنت..وفالاخير ينجبر الريال يدفع مبلغ من المال او يضطر انه يتزوجها ومحمد كان واحد من الشباب الي راحوا ضحيت هالنوعيه من البنات..وفعلن محمد دخل السجن....

فطامي فالبيت تنتظر
يااااااااااااااربي هذا وينه مادق ..مالت عليه شو جي انا من الصبح اتريااا.. فطامي تتريا والصبح طلع ومحمد مابين
فطامي: والله والله حرام عليه حمودي يسوي جي عنبو هو وعدني يعوضني ..عنبو توه طالع من الدورة يالله شو اسوي الحين .. ماعليه برقد ويوم بيدق باجرفليل بيشوف شغله عندي..
ونامت فطامي الصبح..وانتظرت الليل ويا الليل لكن ماياب محمد ويااااااه..فطامي سهرانه طول الليل ..بسم الله شفيه حمودي..لو صارله شي بعرف.. الحارة صغيرة ..يمكن صدق مايحبني يمكن تغير لانه اشتغل ويبي يخليني يالله شو اسوي الحين..كيف اسأل عنه..مرت اربع ايام وفطامي على هالحال.. وبعدين قررت تدق على الدوام وين يشتغل محمد..
فطامي: الوو
عبيد: مرحبا اختي عندج المركز بغيتي شي
فطامي: هيه بغيت اسأل عن محمد اذا داوم
عبيد:محمد منو عندنا الف محمد ..وانتي منو
فطامي: محمد بن فلان انا خالته
عبيد: هييييييييييييييه محمد عرفته هذا يستوي ربيعي....لا ياختي نحن بروحنا نسالكم عنه ماندري عنه شي اذا عرفتوا خبرونا ..
فطامي : ان شالله مع السلامة..
قعدت فطامي تبكي من الخاطر..ياربي محمد شو صارله شياااااااااااه ليش يسوي جي... عنبو وين اختفى انشقت الارض وبلعته عنبو ربيعه مايدري عنه..مستحيل اكيد اكيد محمد مايبى يكلمني اكيد يتهرب..
وفاليوم الثاني الظهر..كان فهد رجع من صلالة ..وقاعدين يتغدوون.. وعلى الغدى
فهد : أقول عمي ناصر مادريت عن ولد يرانا
ناصر : لا والله شو ياه... منو منهم
فهد: (وهو يطالع فطامي) ..هذا الهايت محمد ياريال يقولك زخووه فالبريمي شارد عند وحدة من هذيلا الي ماوراهن ولي
ناصر : قول غير هالرمسة محمد ماغيره مايسويها الولد محترم
فهد : محترم !!انت ماتعرف شي عن هذيلا كل يوم عند وحدة وبعده لو من زينها خادمة وامها هندية
فهاللحظة فطامي تسمع الكلام.. والدنيا من حولها تلف وتدور.. ...تحاول تبلع اللقمة تحاول تخفي تأثرها خلاص بتموت.. بتنفجر تمالكت نفسها ..وقامت بهدوء من على الغدى..ودخلت غرفتها..

وبكل هدوء ..طلعت صورة محمد ..وقعدت تكلمه..محمد ..حمودي .حبيبي...صدق صدق ياروحي..صدق الكلام الي يقوله فهد..طيب ليش ليش ياعمري. تسوي فيني جي ..انا شو ناقصني..انا في شو قصرت معاك ها ياعمري ..ارمسك انا رد عليه..وتشهق من البكي.. حمودي رد قول قول انه فهد يجذب ادري يكرهك ادري يتبلى عليك... لا لا فهد مايجذب ..انت الي تجذب عليه هيه انت الي ماتحبني انت الي ترتكتني...حمودي احبك رد..بموت والله رد حبيبي..حبيبي..كلمني عاد..وفي هاللحظة دخل فهد عليها.. قامت فطامي ويلست على صورة محمد عشان مايشوفها..وهيه مرتبكه وعيونها حمر من البكي..
بس فهد دز فطامي بقوو ..وقالها..قومي شو خشيتي عني..
:::: بعدج تبكين على هالخايس وهو طالع مع وحدة هندية مالت عليج مافيج دم مايباج مبدي هندية عليج..تسمعين مايباج مايباج افهمي..يالغبية ..
وياخذ صورة محمد ويشققها في ويه فطامي وهيه تتوسله يخليها ..
فطامي: فهد فهد دخيل روحك خلاص ..والله توبه مابرمسة بس خل الصورة ..فهد اترجااااااااك خلها..تبى تضربني برايك اضربني بس الصورة لا يلا يافهد لا ....
بس فهد مايسمع توسلات فطامي..وقام ومسك فطامي.. من ايديها وشغل الدفاية .. وحط صبوع فطامي على الدفاية وهيه تصرخ وتترجاااااااااااه
فطامي: لا لا فهد حرااااااام عليك بس مااقدر اتحمل والله تحرق وااااااااااايد فهد خلاااااااااص توبه توبه فهد دخيلك..
فهد: خليني احرق هالاصابع عشان توبين تمسكين صورة ريال مرة ثانية.. .. وفطامي تصرخ بربها الي خلقها..الالم صار يذبح فطامي تتوسل بدون فايدة..واذا صرخت يمكن حد يسمع صريخها..
دخلت موزة ودزت فهد.. عن فطامي
موزة خل البنت في حالها شو فيك انته حشى مب انسان يهودي..
فهد : هيه دافعي عنها محد بيضيعها غيرج بس ماعليه .. انا بربيها..
موزة: ماحد يبالك تربيه اظهر برى..
قامت موزة ويابت فازلين حق صبوع فطامي.. عشان تداويهن لانهن قربن يذوبن من كثر الحرق..
فطامي: خلاص امي انا بخير.. ماابى شي..
وقامت لقطت صورة محمد بصبوعها الي صايرة بنية من الحرق وكل ماكانت تلصق جزء من الصورة كان الجلد الي على صبوعها يتقشر مع جزء الصورة..من كثر ماهو محترق..
لصقت الصورة واحتفضت فيها وعاشت على ذكرى محمد شهر كامل..وهيه ماتعرف عنه شي ولا تعرف شو السالفة بس كل الي فبالها انها تحبه بالرغم من انه طلع مع وحدة ثانية ..ماقدرت تشيل طيفه من خيالها..مانفع معاها ضرب ولاتهديد.. كان كل همها تعرف ليش ليش يبدى عليها وحدة ثانية .. ليش يكذب عليها طول هالسنين ..يوم مايحبني ليش يخليني اتعذب وانضرب جذي ليش..والله حرام مب عدل والله..

وبدى رمضان وصار في نصه ..وفطامي تقول.. كل ارمضان يمر عليه لازم افارق فيه غالي..
رمضان الي طافت مر عليه بدون ابوي ..وهذا مر بدون محمد ..كانت مستغله الشهر الكريم تتصبر فيه..فكانت كل يوم المغرب تقوم وتساعد امها فالفطور وتوصل خيمة المسيد فطور .. وتقول في خاطرها..سبحان الله يمكن الحين يوم انا بفطر صايم ربي بيطمني على حبيبي حمودي .. انه فطر بعيشة نظيفة وزينه..يااااااارب تحفظه يارب..

وهناك بين اربع جدران.. كان محمد مسجون..عاش معذب بين الظلم والقهر..حتى اهله تبروا منه وماعادوا أسالوا عنه.. كل تفكيرة كان في فطامي..ياترى شو قالوالها عني..شو بتكون ردة فعلها..فطامي ماقصرت في حقي..انا مااستاهلها بالرغم انه مش ذنبي..كان يقرى القرآن ويحاول يقضي به وقته.. ختم المصحف تسع مرات على امل الله يصبره ويعوضة في مصيبته خير..محمد مش بس خسر فطامي..خسر الجامعه..خسر الشغل..وخسر حياته..وسمعته..في لحظة انتقام من خالد ..بس عشان يرضي غرورة ..عشان تصفى له فطامي..بدون لا يدري ان السالفة كلها مرتبة..

وقبل العيد بيوم..
فطامي تتذكر..وتقول اليوم عيد ميلادي.. العام كان في نفس الوقت بس تاخر يومين.. وكان حمودي يدقلي وذكرني فيه..واليوم عيد ميلادي ... محمد اوووووووف يالدنيا كيف قاسية.. منو بيقولي كل عام وانت حبيبتي..حمودي وينك دخيلك انفطر قلبي عليك وينك..والله والله احبك ..والله فيني شوق ماتتخيله....مااقدر مافيني حيل ابكي والله..حمودي حمودي ازقرك انا رد علي..

وراحت تركض مثل المينونه صوب الشارع تطالع تقول الحين بيمر من هنيه حمودي..هيه مااهون عليه ادري حمودي مااهون عليه يخليني جي..حمودي مايحب يشوف دموعي اكيد اكيد بيمر مني .. وبيكون لابس جاكيته البني هيه اكيد..وتنتظر..بس وين فطامي وين حمودي..وبعد مايئست من الانتظار..لملمت جروحها..ورجعت الغرفة وحضنت صورة محمد..الصورة الي كانت بدون ملامح من كثر ماهي مقطعه..بس هذا ماكان يهم فطامي المهم انها صورة محمد..صورة الغالي حضنت الصورة ونامت....

..

فاليوم الثاني الي هو آخر يوم في ارمضان
موزة تدق الباب على فطامي..كانت موزة تعرف عن حب فطامي ومحمد.. وراضية عنهم وتبى تساعدهم.. مع انها تظهر العكس..خصوصا انها كانت تحب ناصر ابو فطامي قبل لا تتزوجة لما كانت في عمر فطامي..وتعرف شو يعني حب..

موزة: فطامي امي نشي الظهر قومي صلي..وابا اقولج شي..
فطامي: تنش ها امي شو صاير..بعد
موزة : تضحك..
فطامي: امي شفيج..اكيد عنج شي حلوو
موزة : هيه..
فطامي: يلا قولي
موزة : نشي تغسلي قبل..
فطامي بعدين يلا امي قولي..
موزة : اليوم انا.... انا
فطامي: امي يلا عاد شووو
موزة: اليوم كلمت محمد
فطامي: شوووووووو امي شو تقولين يعني محمد طلع شو كيف وين
موزة: لا ماادري طلع والا لا بس هو دق تلفون عالبيت اول مرة سكر وعقب رد ودق وتكلم
فطامي: انزين من وين داق...وو شو قالج
موزة: خبرني السالفة الي خلته يدخل السجن وماعليج من رمست اخوج فهد كلها جذب السالفة جي جي..
فطامي: وانتي صدقتيه ؟؟ السالفة ماتدش الراس..
موزة:شوفيج ..مهما كان محمد ولد يرانا واعرفه مثل ماعرفكم ..بعدين محمد مايجذب ولو بيجذب جان جذب يوم اخوج وولد خالتج كانوا بيجتلونه من الضرب والا نسيتي..
فطامي: اكيد عيل ظهر مستحيل يعني شو بيكلمج من السجن ياااااااااااااااي بروح اكشخ وباجر العيد بيستوي عيدين يااااااااااااااااي وناسة امي..صح؟
موزة: خفي على عمرج وقومي تغسلي ولا تبينين شي حق فهد
فطامي : ان شالله امي اياحلى ام فالدنيا احبج احبج تعرفين شو يعني احبج ..ماشي بس يعني احبج..
فعلا قامت فطامي عقب الفطور وكشخت وقعدت تتريا التلفون.. وتروح تطالع الشارع وتقول الحين الحين بيمر من هنيه محمد ساير صوب الكابينه..ادريبه وبيشغل الاغنية .."روحي تحبك غصب عني تحبك والمشكلة حبك بروحي جرحني..." حركات انا وحمودي ..فديتنا الله لا يفرقنا..
لكن انتظار فطامي طاااااال..بدون فايدة..مرن الساعات والدقايق وصبح العيد قرب..بس وينه محمد مابين.. انتظرت وهي ماتدري انه محمد طلب انه يتكلم فالتلفون مكالمة قبل العيد..وبدل لا يكلم هله دق على بيت فطامي..ماتدري انه محمد بعده بين القضبان..

الدنيا الصبح واليوم العيد وفطامي يئست..من طول الانتظار...ومحمد لا حس ولا خبر فقررت تروح تسال امها

موزة:شوفيج فطامي قومي لبسي الحين بيونا الناس يسلمون وانتي بكندورتج من البارحة
فطامي: امي تتوقعين محمد وين
موزة: فالسجن يعني ماتدرين
فطامي: بس انتي قلتي انه رمسج البارحة..
موزة:هيه رمسني بس من المركز ماطلع..وعندج الرقم فالتلفون عيديه وسالي
فهاللحظة.. تحطم كل امل كان باقي عند فطامي...ركضت وسكرت على نفسها الغرفة وقعدت تبكي ..والناس تعيد..الناس فرحانه..العيد اليوم العيد الي كل بعيد فيه يقرب..الا محمد.. ظلت تبكي لحد المغرب وهيه خلاص ماعاد فيها حيل ولا قوة تبكي..ماعاد فيها دموع ...والحال ردي والامل مفقود..
قامت وشغلت خالد عبدالرحمن..." يمر العيد وانت بعيد ولاحتى بطاقات عيد...تركت اللهفة في قلبي تزيد.."
ومر العيد كانه يوم عادي...ومرت الأيام ..وهيه ماتدري انه محمد محكوم عليه شهرين..فكانت تنتظر رجعت محمد في يوم ماتعرف تاريخة..
مرت الأيام ومحمد طلع من السجن بعد ماكمل الشهرين وزياد ة ... لكنه مااتصل على فطامي..ولا كلمها..مر اسبوع.. ومحمد موجود..وفطامي تبكيه ولاتدري عنه..
محمد ماكانت عنده الجراة انه يكلم فطامي..كان خايف انها ماتصدقة.. بس كان يتقطع من الشوق تمنى يضمها ويروح عالم ثاني عالم نظيف من الاحقاد..
وفالوقت الي فطامي قاعده فالحوش تتمشى .. سمعت صوت من الشارع حد مار ومطول على المسجل..
الاغنية " روحي تحبك غصب عني تحبك ...."
خطفت تركض صوب الباب ..لكن السيارة خلاص عبرت الشارع ..بس لمحت انها سيارة بيضا..مثل سيارة ابو محمد
وبينها وبين نفسها تقول..معقول محمد الي فالسيارة اكيييد هووه ..اصلن هذا اغنيته الي يحبها..
لالا وين محمد ..محمد محد فالسجن.. آآآآه ياقلبي شكلي ينيت وخرفت من عقبك ياغناتي.. ياليتهم يدرون حالي بليااااااااك شعره الفرق بيني وبين الجنوني..
فطامي قاعده تغني ..هالاغنية العراقية ويرن التلفون..
راحت ترد عادي بكل بروود..
فطامي: ألووو
محمد: هلا حبيبتي..
فطامي سمعت صوت محمد ..وماردت عليه.. صرخت نقزت خلت السماعه وراحت تركض صوب امها..بدون لاتقوله شي ولا حتى كلمة لحظة..
اميييييييييييي اميييييييييييييييييييييي محمد طلع طلع طلع محمد من السجن يااااااااااااااااهو كلولوليش امي لحقيني بموت بموت بتشقق من الفرحة..خخخخ ياربي ابا اضحك كيفي مستااااانسة
محمد ع السماعه يسمع ربشة فطامي ..هنيه ارتاح ..انها مابتصدة
ردت فطامي
فطامي: فديتك فديتك احبك احبك حشى والله اني بتخبل مشتاقتلك موت مالت عليك يالدب احبك
محمد: معقول يافطامي بعدج اصيلة مثل ماعرفتج معقول ماصدقتي فيني الرمسة ولاغيرتج الايام ..فطامي الي صار مب شوية.. وحتى لو قطعتي علاقتج بي بكون عاذرنج
فطامي: حمودي خل عنك هالخرابيط... عمري انا واثقة فيك اكثر من نفسي..
محمد:بعدج تحبيني ..
فطامي: واموت فيك ..وايدين استغلوا الي صارلك عشان يتقربون مني ..مايدرون ..انه مايعيضني فيك البدالي..
وقعدوا يسولفون ويا بعض قرابة الساعتين..
وشوي شوي محمد بدى يرجع طبيعي رغم صعوبة الموقف..
حاول محمد يرجع حق الدوام بس للاسف فصلووة... والجامعه نفس الشي لانه صارلة موقف ثلاث كورسات ورى بعض.. وقعد محمد بطالي.. فالبيت مثل الحريم كل شي في حياته تحطم وتدمر..ماصار لحياته معنى ..غير ان فطامي الشي الوحيد الي مخلي لحياته لون..فكان يتحمل ويراكض يدور شغل مني ومناك ..عشان هالانسانه الي ياما ضحت عشانه.. صارت قصة فطامي ومحمد يعرفونها اغلب اهل الحارة والكلام كثر حد وياهم والاغلبيه ضدهم..
مرت ايام على محمد ما يلقى درهم عشان بترول السيارة.. او حتى عشان يراجع حق شغل..واذا الله فرجها كلم فطامي..متى مايقدر ..ردت حالتهم مثل قبل..فطامي تجمع العشر والعشرين..عشان تدبر مصروف محمد عالاقل عشان يقوم يراجع للشغل..
في حين ابو محمد كان رافض يساعده باي طريقة.. وامه كانت تخاف تعطيه ..لانها لو صار وعطته ريلها ماراح يعطها مصروف..عاش محمد متلته بين بوظبي والعين يدور شغل أي شغل المهم يشتغل..وفطامي تناظر اليوم الي بيشتغل فيه محمد.. وترد نفسيته زينه..كانت تتريا محمد يشتغل عشان يرتاحون من الخوف والمذلة.. لكن الشغل كان لهم مثل الحلم الي صعب يتحقق فهالزمن..اذا الي ماعنده سوابق مش محصل شغل فمابالكم بواحد توه ظاهر من السجن..والحياه ماترحم والمجتمع مايعطيك فرصة سواء كنت ظالم او مظلوم..

:::::::::::: نهاية الجزء الخامس ::::::::::::::

فالوقت الي كان خالد يبنى حياته من يديد..وخلاص رايح ثانوية عامه..بعد مارجع لدراسته الي تركها..وبعد مادمر مستقبل محمد وقرر يكون احسن منه..عشان يقهر فطامي ويقولها الجامعي والي يشتغل الي بديته عليه..الحين ..بطالي مايسوى..شي..ولايقدر ينفعج بشي..

بس هالاشياء ماكانت تحرك في فطامي شي بالعكس زادتها تعلق بمحمد..وحب له..محمد بعد كان كل مايحصل مبلغ يروح يكلم فطامي..او ياخذلها هديه..
نجحت فطامي فاول ثانوي ..وخذت شهادة تقدير ..رغم مرارة الظروف الي مرت عليها..خذت الشهاده واهدتها ..لمحمد..
فطامي: حمودي انا اليوم كرموني... وعطوني شهاده تقدير شفت حبيبي مثل ماوعدتك سويت..
محمد : (بكل برود) مبروك..
فطامي: شوفيك تقولها من ورى خاطرك..
محمد : فطامي نحن بنترك بعض..
فطامي: شوو شوفيك انته ينيت والا ينيت ..اسمع يالمدربح.. عقب يومين بيكون التاريخ 1\6 يعني بنكمل سنتين مع بعض وتقول بتخليني ..صدق ماعندك سالفة اكيد تمزح
محمد: فطامي ارمسج جد..
فطامي:شو جد..شفيك انته تلعب والا تلعب تحملت الضرب والاذية والاهانه عسبك خليت كل الي يبوني وبديتك انته ..انتظرتك وانت مسجون..ورضيت فيك وانت ماتملك فلس احمر ولا مستقبل ولا امل حتى وفالاخير تخليني..
محمد : فطامي انا مااستاهلج..
فطامي: برايك انا اباك جي ..انا احبك جي..
محمد: وانا اموت فيج..والله والله احبج بس
فطامي: بس شوو
محمد: فطامي القضية الي علي مانتهت.. وانا ماعندي مبلغ ادفعه للحرمة ..وابوي مستحيل يدفعلها..يقولي غلطتك تحملها بروحك..والمحكمة حكمت اني اتزوجها وهذا ابسط حقوقها..

فطامي: بس انت انسجنت.. وانت تقول ماصكيتها.. خلاص شو بعد له الزواج..
محمد: كيف افهمج.. والله باجر انا رايح المحكمة وبملج وبطلق عقب سنة..يلا مع السلامة..

سكر محمد عن فطامي بدون لا يودعها .. فطامي بتموت من القهر..شوفيه محمد ..شو يقولي ياربي والله واااااااااااايد وايد علي الي يصير شو بتحمل انا عشان اتحمل بموت ..مااقدر حتى ماعاد فيني دموع ابكي..خلااااااااااص معقول معقول محمد يتزوج غيري..كيف ويعيش مع غيري ليش بموت صعب مش قادرة احس راسي بينفجر مااقدر ياااااااااارب رحمتك ارحمني يارب دخيلك بسني والله الي يصيرلي مب شوي والله حراااااااااام..

قامت فطامي وهيه تحس ان عقلها مايتحمل الي يصير ..مش قادرة تتقبل انه محمد بيتزوج..تبى تموت قبل لا ايصير هالشي..خلاص ماعاد فيها حيل تتحمل من الدنيا اكثر.. .قامت فطامي وراحت الثلاجة.. وطلعت كل الادوية الي فيها..وشربتهن...لانها قررت تنتحر ..عشان تموت قبل لا تشوف محمد متزوج غيرها.. عشان ماتشوف نظرت فهد وخالد والناس الها..
وفي نص الليل ..فطامي تتقلب من الالم كبدها بتنفجر.. وتصرخ مافيها حيل تتحمل الالم وكل مايزيد الالم تقول هانت الحين الحين بتطلع روحي الحين بموت..بس يارب سامحني يارب سامحني ..ادري الي قاعده اسويه حرام..بس لو ماانتحرت بموت من الهم..بموت من الحزن..
موزة تسمع الصريخ..فالليل متاخر ..قامت خايف تشوف مصدر الصوت غرفة فطامي..

موزة: فطامي فطامي شوفيج ..شو يعورج اوديج المستشفى
فطامي: (ماتقدر تتكلم من الألم.).لا يامي.. مافيني امل..امي انا خذت هالادوية وخلاااااااااااص خلاص يامي بروح عنج..ماباها الدنيا عقب محمد...وبعدني صغيرة مافيني حيل اتحمل همها ..هم الدنيا كبير ياماية..كبير خليني امي خليني بلحق اخوي..بموت وبخلي الدنيا لاهلها يامايه بخليها..لاتعبين عمرج ماراح تلحقين عليه..
موزة: حسبي الله عليج من بنت بتنفدين عمرج قومي بوديج المستشفى بتسويلنا بلية ..
فطامي : آآآآآه يامي خليني اموت هنيه..خليني اموت قبل لا يصبح عليه الصبح ..ماابا اشوف الصبح يامي مابااااااااه الشيمة يامي خليني..

موزة: محد بيحس بفراقج غيري انتي مسوية سالفة حق حد مب مسولج سالفة ماتعرفين قلب الام..يابنت انتي قارية وكاتبة وتعرفين هالشي حرام..قومي يامي قطعتي قلبي..
فطامي: وانا مب حرام الي يصيرلي وانا ماتقطع قلبي..امي اموي توني بنت 16 سنة واشوف كل هالمصايب..ياويلي يامايه جان تحبيني خليني اموت وارتاح..وترتاحون من بلايه..

فطامي تحاول تتكلم ..عشان تمرر الوقت ..وماتلحق امها تسعفها لكن موزة..قامت وخذت فطامي عالمستشفى وسوولها غسيل للمعدة ونجت باعجوبة... وعقب ماقامت فطامي دخلوها عند دكتورة نفسية.. حاولت توصل مع فطامي لنتيجة بس فطامي مب راضية تقول شي لاحد..
ولما رجعوا البيت.. دقت موزة على محمد وخبرته كل الي صار.. وطلب محمد من موزة انه يكلم فطامي بس ماتخبرها انه هو..
موزة فطامي قومي تيلفون..
فطامي : منو
موزة : وحدة من ربايعج..
فطامي: الوو
محمد: هلا حبيبتي حمدالله ع السلامة
فطامي: اهلين بالمعرس ها ملجت
محمد: فطامي شوفيج ..مينونه فطامي ورب البيت انه مافي حياتي بنت غيرج..انا صحيح ملجت بس كل شي فالمحكمة كل واحد راح بيته مابيني وبينها غير ورقة والله من تنتهي المدة اطلق يعني لااعرفها ولاشي بس اجراءات قانونيه..
فطامي: حتى لو.. مااتخيل..عقب اكون انا حرمتك الثانية..
محمد: ليش هيه كانت الاولى..
فطامي عيل انا شو قول يلا مثل ماكنت تقول دوم
محمد: انتي الاولى والاخيرة
فطامي: ياسلااااااااام
محمد خلاص الاولى والاخيرة والي فالوسط
فطامي: هيه جي اباك..
محمد: بس اذا سويتي شي في عمرج مرة ثانية بقتلج..كم فطامي عندي..حق منو تبيني اعيش هاه.. يلا شدي حيلج باقي سنتين..وتخلصين ونعرس ..يام سلطان..
فطامي: مسرع ماسويت ولد وسميته..
محمد: كيفي..
فطامي انزين..كيفك كيفك بعد شو اسويلك يالدب مالت عليك احبك..

مرت الايام على فطامي.. ومحمد مثل ماهيه لا تحمل جديد محمد يدور شغل في كل مكان بس بدون فايدة.. وفطامي ..الاجازة رقاد وتلفزيون..

وفي شهر سبعه يوم الاربعا ..العصر..كانت فطامي برع عند الباب ترمس امها.. وقفت سيارة ..عند بيت خالد.. وكانت السيارة لجاسم..
فطامي واقفة عند امها.. نزل جاسم من السيارة وسلم على موزة.. وفطامي تشوفه من بعيد وتذكر سوالف اول.. وطلع خالد من البيت وسلم على موزة وراح
موزة: وين تبون سايرين الحين..ياعيالي
خالد: بنروح انا وجاسم دبي..المهرجان
موزة: هالحزة تسيرون الدب يوم مانشرتوا من الفير..انزين الله الله فالطريج..تحملوا على عماركم.. وداعة الله..
خالد: ماعليج خالتي..الليل طويل..
تحركوا جاسم ..وخالد رايحين دبي..
ودخلت موزة البيت..
فطامي شفتي هذا الي سلم عليه..
فطامي: منو خالد هيه ..
موزة : لا جاسم ولد شيخة اخو محمد
فطامي : هيه بلاه..
موزة: ماشي ما شالله عليه شو غادي غزيل..شكله غير اليوم اول مرة اشوف ويهه منور جي..
فطامي: الله يخليه لاهله..يمكن من زود الصلاة
موزة : حليله يوم اذكر ذيج السالفة صدق ظلمناه
فطامي في خاطرها.. وانا ظلمته اكثر...

وفالطريق لدبي..
خالد: جاسم ..قم قم خلني بسوق عنك عنبوو شو هالسواقة متى بنوصل..
جاسم : ياريال تريا تونا في طريج الشاحنات ..من نتخطى شارع الشاحنات بزيد السرعه لاتخاف
خالد: اوهو وانا شو يصبرني لين نقطع الدرب قم قم
قام جاسم وبدلوا مكانتهم والسيارة بعدها تمشي كانوا متهورين..يبون يوصلون دبي قبل المغرب..
جاسم : خالد شفيك العداد بيصك 200 تبى تذبحنا..
خالد: لاتخاف ..شفيك ديايه..
جاسم: خالد خااااااااالد شاحنه جدااااااااااااامنا خاااااااااااااااااااااالد.خاااااااااااالد

بعد ساعتين ..
ناصر راجع من الصناعيه.. موزة موزة
موزة: نعم ..شو هناك
ناصر: دقي حق فهد شوفيه وين
موزة :خير شو هناك..
ناصر: تونا رادين من الصناعيه انا والدريول وشفت سيارة ضاربة تحت شاحنه.. ومنتهيه امره.. ماظنتي راعيها حي..
موزة: بعيد الشر والبلا..
قامت موزة وتدق على فهد..ها فهد انت بخير امايه...اونه ناصر شاف حادث عند طريج الشاحنات .. ماتعرف راعي السيارة..
فهد: امي هذيلا خالد وجاسم..سايرين دبي..وماادري شو عايلنهم العداد واقف على 200 والحين سعفناهم ونحن في المستشفى برايج عندي شباب خلاف برمسج..
فطامي: هاه امي شو صاير فهد بخير؟
موزة : هيه هذيلا خالد وجاسم.
فطامي: تشهق شووووو ياهم متعورين خير
موزة مادري عن شي شوفي محمد ساليه
فطامي: كيف اشوفه امي ماعنده تيلفون.. والا اقولج لحظة بدق له عالبيجر يمكن يرد
وفعلا دقت له..
موزة: هلا محمد بشر شو حالكم
محمد: مادري توني ياي دخلوا جاسم الاشعة.. يصير خير لاتخافون ارقدوا لاتحاتون..وان شالله خير..اما خالد بخير هذوه عدالي اذا تبون ترمسونه..
موزة: الله يبشرك بالخير ياولدي ماعليه وداعة الرحمن واسمحلنا غثيناك..

وبعد مااطمنوا فطامي وامها على اساس انه ماصاير شي وارقدوا نشت فطامي الصبح وللمرة الاولى عقب سالفة خالد راحت فطامي بيت يرانهم..
وهيه داخله شافت مهره شاله ثياب خالد..
صرخت فطامي ..شو هذا الدم خيييييييييبة..ويقولون مافيهم شي عيل شو هذا الدم..مستحيل تجذبون خبروووووووووني عن خالد وجاسم دخيلج مهره دخيلج..( فطامي نست كل الشين الي سووه فيها .. اساسا ماتعرف انه خالد كان ورى كل بلاويها..تذكرت بس احلى اللحظات ويا خالد.. لما كانت تعزة ويعزها..حاسة انها ظالمتنه ومتلومة فيه ماتردي انه خذ حقه منها وزياده..)

ويظهر خالد من غرفته..
خالد: يعني خايفة علي... اطمني انا ماياني شي بس زجاجة دخلت فايدي والحين ببدل وبروح المستشفى.. جاسم تعبان وبيسوله عمليه في راسة وهذا الدم الي تشوفينه من جاسم..
وقام ينادي مهره يباها تكوي كندورته.. نشت فطامي وخذت الكندورة من ايد خالد ودخلت تكويها وعطتها خالد.. تلبس خالد وطلع ..بدون لا ينطق حتى بحرف..
رجعت فطامي..تبى تدق لمحمد..بس خايفة خصوصا انها حالة جاسم صعبة..
وقامت تذكر جاسم.. كيف كان وكيف وكيف .. وفي لحظة دخل فهد البيت
راحت موزة عشان ترمسه..ها فهد بشرنا عن جاسم
فهد: جاسم..!! شو اقولج بعد الحين بيدخل العمليات.. ومااظني يعيش..جاسم لانه زين يستوي فيه جي لو محمد جان قلت نفاد بس جاسم ربيعنا..ومايغلط على احد..
هنيه فطامي..حست انها بتقتل فهد من سخافة اسلوبه
موزة : بعيد الشر لاتفاول على ربيعك
فهد: امي شو تبيني اقول جاسم الضربة ياية في راسة حتى مخة ظاهر برى وحتى لو عاش بيعيش معوق..

دخلت فطامي غرفتها وهيه تصيح ..جاسم ليش ..حرام مابا يصيرله شي حرااام والله جاسم طيب يااااااااارب تقومة بالسلامة وتخليه لاهله يارب..وكيف جاسم متعور لهذي الدرجة وخالد حتى ماجاسة شي..يارب تحفظ جاسم يارب..وان شالله تنجح العمليه..
::: فهاللحظة مهرة رايحة عند فطامي..

فطامي : منوو
مهره: انا مهره
فطامي: دخلي الباب مفتوح
مهره: فطاامي... (وتبدى تصيح)
فطامي: مهره شوفيج ..شو استوى.زيغتيني قووول شو صاير لاتحرقين اعصابي مهروو شوفيج حبيبتي قولي؟؟.
مهره : جااسم ..جاسم يامهره
فطامي: بلااااااه جاسم رمسي ذبحتيني..
مهره: جاسم جاسم خلاااااااااااااااااااص..
فطامي: لا لا يامهره حرام عليج قولي غير هالرمسة..ماااااااااااااااابا ماريد..لا ياربي دخيلك لالا تجذبين يامهرو جذاابة مااحبج مهرة قولي الصدق قولي انج تجذبين قولي غير هالرمسة يامهره دخيييييييييلج..
قعدت فطامي تصرخ وتصرخ ماتبى يكون الخبر حقيقة تباه حلم كابوس أي شي..المهم جاسم يعيش جاسم..الي اليوم صار تحت الثرى ..جاسم ..هذا الولد الشاب الي توه في اول عمره..رااااااح ..جاسم الي ظلمناه كلنا وعقينا بلانا عليه راااااااح.. في لحظة وبدون سابق انذاااار..راح ماعاد موجود..راحت روحة محد خلاص هالدنيا مافيها جاسم ..كيف بيكون باجر..بدونه كيف؟؟

الساعه اربع العصر ..
أحمد اخو محمد الصغير (فالروضة )يدق باب بيت فطامي..
طلعت فطامي لان اهلها محد كلهم رايحين بيت محمد..يتريون الاسعاف ويساعدونهم فالعزى..
أحمد: بكل براءة ..فطامي دريتي جاسم مات..
فطامي: تشهق دريت دريت يااحمد.. تعال ادخل داخل..
احمد: فطامي هذا ورد وكافور.. تقولج امج طحنيه.. بسرعه عشان الحين الاسعاف بتيب جاسم .. وابوي قال يغسلونه فالبيت..
فطامي.. الموقف اصعب من انها تتحمله .. وتاخذ الاغراض من عند احمد وتطحنها.. وتعطيهم احمد الي كان مايعرف شو معنى الموت حتى..
رجعت موزة من بيت شيخة .. وهيه تصيح..
فطامي: امي خلااااااص عاد شو تسوين مانقدر نرده..
موزة : ياويلي يافطامي ..الله يعين امه في كل قطعة من البيت يتراوالها..
فطامي: كلنا نذكر جاسم ومن يقدر ينساه بس شو نسوي..
موزة: حرام عليهم يغسلونه فالبيت امه بينفطر قلبها عليه بس شو نسوي .. هذي سنتهم
فطامي: امي دخيلج كفاية..
موزة : مااقدر يافطامي.. جاسم هذاك الغزيل..مابقة منه غير قطعة الشاش الي كانوا لافيبها راسه معقوقة فالحووش وامه لافتنها وتصيح..
وتمت موزة وفطامي يصيحن عند الباب وقبل اذان المغرب ..
مرت جنازة جاسم من الشارع رايحين يدفنونه فالمقبرة وسيارة محمد ورى سيارة الاسعاف وفطامي قلبها ينفطر..
امي خلاص خلاص الحين بيحطون جاسم فالتراب.. وبيرجعون بدونه.. جاسم خلاص ماعاد موجود فهالدنيا.. ليش..بيروح للابد للابد يامي..باجر بتطلع الشمس عالدنيا وجاسم موب فيها ليش يامي ليش كل الي نحبهم يروحون.. ليش؟؟ مااقدر اتخيل الدنيا..صعبة والموت صعب..راح امي جاسم ..راح هناك عند اخوي بطي رااااحوا كلهم..

فعلا ..راح جاسم من الدنيا ..وتوه في اول شبابه بدون لا ياخذ من الدنيا شي..راح واندفن في مكان غريب عليه..في مقبرة ..غريبة عليه.. المهم انه راح... مثل ماراحوا شباب كثير غيرة نتيجة الطيش والسرعه..يمكن الواحد يسوق زين..وبالراحة..لكن الناس الي متهورة تضر نفسها وغيرها وتضيع شباب توهم..في اول شبابهم..ومن منا مافقد عزيز وغالي بسبب هالحوادث..
.فطامي انتظرت فترة ماكلمت محمد ..مش عارفة كيف تكلمه والا شو تقوله انتظرته يدق.. ودق عقب اسابيع وتعلقت فيه اكثر وتعلق فيها..وكانت قربة دوم ... تحاول تهون عليه فراق اخوه.. وفطامي تعرف شو معنى فراق الاخو.. حاولت تهون على محمد ..محمد الي صاير مثل الجسد من غير رووح.. متندم على كل لحظة كان فيها قاسي على جاسم..كل لحظة زعله فيها..وفطامي حاسة بالذنب لانها كانت السبب في خلافات وايد بينهم...فحاولت تخفف عن محمد قد ماتقدر...وبهذا يسدل الستار على السنة الثانية من احداث جرح الأيام الأليم ..(1997_1998)

:::::::::::نهاية الجزء السادس:::::::::::::::::::::

مر الصيف بعد موت جاسم لايحمل جديد ..في حياة فطامي ومحمد وفي حياة الجميع بشكل عام..
بدى العام الدراسي وراحت فطامي الصف الثاني ثانوي واختارت القسم العلمي..على امل انه يكون أول خطوة في طريق تحقيق حلمها بانها تصير دكتورة..ومرت الايام سريعه وهادية لاتحمل جديد ..غير زواج المعلمة اخت محمد.. وزواج مهره اخت خالد.. والعجب والصدمة انها مهره تزوجت من اخو محمد بالرغم من العداوة الي بين محمد وخالد..وبكذاعاشت مهره في بيت محمد....فكانت فطامي تتمنى انها مهره تصير وسيط بينها وبين محمد.. لكن للاسف كان محمد يكره مهره من كرهه لخالد لدرجة انه ماحضر زفاف اخووه لمن تزوج مهره..وطلب من فطامي تقطع علاقتها مع مهره وخالد وبيت جيرانهم كامل.. وماكان جدام فطامي غير انها توافق خصوصا مع اصرار ام خالد على انها تزوج فطامي لخالد..
اما محمد لاجديد في حياته بعده يدور شغل..وللاسف بدون فايدة..
مرت الأيام ..وخلصت السنة الدراسية لفطامي..ونجحت بتقدير عالي .. في حين خالد رسب فالثانوية العامه...محمد ارتاح من همه لان زواجة المؤقت انتهت مدته الي حكمت فيها المحكمة وبكذا راح وطلق..والدنيا ماتوسعه من الفرح..

وفالتاريخ الشهير يوم 1\6 فطامي ترمس محمد..
فطامي: حمودي فديتك أحبك
محمد:وانا بعد غناتي..
فطامي: حمودي يلا عاد انا اسوي الي علي انت متى بتشتغل ...بقت لي سنة وأخلص دراسة..ماشي وقت يبالك تكون نفسك يلاعاد عمري تعبت ابا احس بالامان..
محمد:تشوفيني محصل شغل وقلت لا.. حاولت ارد اشتغل فالشرطة بس قالوا لازم ادخل دورة وانا داخلنها قبل والا نسيتي هذيج الايام
فطامي: خلاص خلاص دخيل روحك لاتذكرني فيها..
محمد: فطامي... حبيبي شوفي الحين بييج اخوي الصغير احمد بطرش وياه شي
فطامي: احمد لالا محمد اخاف يرمس يقول حق حد شي طرش راعي الدكان احسن
محمد:شفيج لا احمد مايخبر..بعدين راعي الدكان كم بيتم يسوي جي اخاف ايي يوم ويواشي او شي ماتدرين بعد..او حتى يسافر شو بنسوي ساعتها.. عالاقل احمد لو قال شي بيقولون ياهل محد بيهتم لكلامة
فطامي: انزين شو بطرش وياه
محمد: حبيتي فديتج..ماشي وردة ووياها ورقة صغيرة كتبت عليها اوعدج مااخليج للابد يافطامي ووقعت تحت حبيبج محمد بتاريخ اليوم .. اباج تاخذينها..وتكتبين تحتها نفس الرمسة وتوقعين هيه شو تتحرين عشان يبقى هذا عهد ووعد بينا مانفترق..
فطامي: فديتك ياقلبي..آآآآآه ياكثر شوقي لك ياعمري..وان شالله مانفترق تحملنا ثلاث سنين بحلوها ومرها..ان شالله بنتحمل الياي مهما كان ..واوعدك ياقلبي اذا ماكنت لك اوعدك اني ماراح اكون لغيرك
محمد: اصلن مااتخيلج تكونين لغيري ولا اتخيل اكون لغيرج وانا بعد ياعمري اوعدج اني مااكون لغيرج واكون لج طول العمر..
فطامي: فديتك.. حمودي مممممم ابا شي
محمد:لبية عيوني امري لاتقولين حلاوة بقتلج خفي على عمرج..يابنت الحلال
فطامي: خلاص مابى شي شوفني حتى مبوزة ..وبوزي صاير طريق بوظبي العين هاه شوف شوف
محمد:افا حبيبي امزح ..آمري غناتي انا كلي لج شيئين والا عشرة
فطامي: ابا تولا هذا واحد.. والثاني ابا اشوفك
محمد: الحين تبين تشوفيني الثاني ويا ويهج يالدبه
فطامي: لو سمحت انا رشيقة انت الي دب..ومدربح وكل شي..
محمد: حبيبي مااقدر اشوفج قتلج مااقدر امر جدام بيتكم
فطامي: اوهو علينا يعني شوو..مااشوفك..هاه هاه شو الحين اقتلك..
محمد : تحملي حبيبتي..
فطامي خلاص المهم التولا توصل
محمد:خلاص فالج طيب حبيبتي..يلا قومي انتظري احمد..فمان الله
فطامي وداعة الله...

وهكذا مرت السنة الثالثة بكل هدوء خاليه تماما من الأحداث..في انتظار ان يجد جديد.. وماكان هذا الهدوء طوال سنة كامله الا هدووء ماقبل العاصفة..عاصفة جرح الأيـــام.. (1998-1999)

::::::::::::::نهاية الجزء السابع:::::::::::::::::::::

أوائل شهر سبعه..محمد رايح بوظبي..عشان يسوي مقابله ..وفطامي تنتظرة على أحر من الجمر..حتى مانامت طول الليل تدعي له الله يوفقه ويتوظف..لان الحال صعب ومافيهم حيل يصبرون أكثر..وبعد انتظار طويل لحد الساعه ثنتين الظهر..فطامي فاتحة عين ومصكرة عين خلاااااااااااص الرقاد فعيونها مب قادرة تقاوم بس تتريا محمد ...ويرن تلفون البيت..وطبعا فهد مش موجود.. مداوم لانه خلاص ترك المدرسة والتحق بالجيش..
قامت فطامي بترد على التلفون..
فطامي: الوو مرحبا
محمد:فديييييييييت هالصوت احبج احبج احبج ياااااااااااااازوجتي
فطامي: حوو شو ياك تخبلت اونه زوجتي قال ..ويا ويهك
محمد: هيه زوجتي عندج مانع خلاص باجر ابوي عندكم فالبيت عشان بخطبج
فطامي: شو تخطبني وانت حتى شغل مااشتغلت
محمد: من قالج مااشتغلت خلاااااااااااااااص الاسبوع الياي بداوم
فطامي: لا لا صدق والله حمودي من جد ترمس ووين يلا قول عاد لاتم تحرقلي اعصابي
محمد :شوفي حبيبي برد اشتغل فالشرطة وعشان خاطر عيونج السود هذيلا..بكمل دراسة فالتقنية او حتى في أي جامعه خاصة ببدى حياتي الي تدمرت من يديد خطوة خطوة بس اهم شي وعديني توقفين وياي وماتخليني..
فطامي: ان شالله غناتي.. بس شل فكرة الخطوبة هذي من راسك يلين تكون نفسك اكون انا خلصت الثانوية ساعتها..يصير خير
محمد: لا حبيبي مافيني اصبر بس والله تعبنا من المشاكل
فطامي: حموووووووودي
محمد: انزين سمعي الحين بس هلي يرمسون هلج ماشي رسمي وعقب ماتخلصين ثانوية نسوي الخطوبة والملجة..
فطامي: تصدق حمودي غير مش متخيله انا وانت في بيت واحد ونااااااااسة ياسلام فديت روحك يالغالي..كشخة بينقع البوكــس هههههه
محمد :يعني موافقة انج تتزوجيني اكلم هلي؟
فطامي: اوني استحي خخخخخخخ لا مش موافقة مالت عليك شو ابا فيك كحيان منتف اسود مااحبك
محمد: هههههههههههاي تقصين على منو لو الشور شورج تبيني اليوم قبل باجر ..
فطامي: يلا سكر انزين قبل لا ايي فهد ويسويلنا مصيبة..
محمد: آآه متى بتزوجج وبفتك من التلفون وفهد
فطامي: تريا اقل من سنة ان شالله....يلا كش ...اجلب ويهك
محمد: بجلبه بجلبة...ياهذا الويه كم مرة ينجلب.. يلاغناتي تحملي على روحج مع السلاااااااااااامة
فطامي : وداعة الله..

سكرت فطامي عن محمد..وهي تقول حمدالله حمدالله الي رزق محمد بالوظيفة وأخيرا أخيرا بطمن عليه..فديتك ياحمودي والله ماتستاهل كل الي صارلك بسبتي ..والله انه مب شوية الي شفنااه ياغناتي..

اما محمد فرجع من بوظبي رايح العين ..نام وريح شوي والعصر بعد قام راح عشان يكلم امه..
محمد : مرحبا امي.
شيخه(ام محمد) : هلا بوليدي عنبو دومك منخش في غرفتك محد يشوفك..
محمد: شو اسوي بعد ..مااطيق اشوف مهره فالبيت كارهنها هيه واهلها ومااريد شي يذكرني بالي صار ..والي سووه فيني مش شوية..
شيخة:ياولد الحلال صف النية
محمد: امي انا ياينج في موضوع واذا بتعكرين عليه مزاجي بروح احسن
شيخة: عنبو محد يروم يقول كلمة خير ..خلاص انزين قولي شو كنت ياي تبى تقول
محمد: امي اليوم سرت بوظبي انا وقالولي خلاص ابدى دوام السبت الياي..
شيخة: حمدالله ياوليدي ..الله يسهل عليك امورك ..ويرزقك بنت الحلال..
محمد: بنت الحلال موجودة .. بس اباكم تحجزونها حقي..
شيخة: ليش انت حاط عينك على وحدة..لاتقول فطاامي..
محمد: هيه امي يعني ماتعرفين كل هالمشاكل الي تصير ..وحشرت اخوها امي خطوبوها لي عاد
شيخة: بس
محمد: بس شو يامي يلا عاد كلمي ابوي ..امي طلبتج..
شيخة: البنت مايعيبها شي..بس عقب المشاكل .. مااعرف اخوها شو بيسوي..وبعدين ابوك مستحيل يوافق
محمد: وليش مستحيل يوافق... وبعدين اخوها شو له ..ابوها موجود وهو صاحب الشان
شيخة : والله مااعرف شو اقولك ياوليدي يوم بيرد ابوك من العزبة برمسه..
محمد:خلاص امي يعني اعتمد
شيخة: ان شالله خير..

قام محمد عن امه وهو فرحان ..ياسلام اخيرا الدنيا بيصير لونها وردي عقب ماكان اسود..فديتج يافطامي..والله لعوضج عن كل الايام السودا الي عشتيها في بيتكم بعوضج الامان والحنان..ولابخلي حد يلمس شعره من شعر راسج..

وبعد رجعة ابو محمد من العزبة ..تعشى ..وعقب العشا قاعد يرمس ويا حرمته شيخة..
شيخة: اقول سالم..
سالم: ها شو هناك
شيخة :ماباركت حق محمد اليوم انقبل وبيداوم ان شالله..
سالم: جان زين افتك من عله..
شيخة : انت شفيك هذيلا عيالي حشاشة يوفي واحد شردته من البيت والثاني لقى ربه والحين ياي الدور على محمد
سالم: والله ماقتله يهيت كل يوم عند وحدة...بعد ماسده عند هالهايتات ..حتى بنات الحارة ماسلمن منه..
شيخة: ياسالم انت تعرف انه محمد ماسوى شي غلط..وذيح الحرمة تراه ابتلى فيها..وبنات الحارة مايا صوبهن تراه متعلق في بنت يرانا
سالم: سود الله ويهه لو يدري ناصر يعين الله كيف بقدر اقابله..
شيخة: وليش يدري انا يايه اكلمك في هذا الموضوع..بما انه محمد بيتوظف نروح نخطب له فطامي ونفتك من القيل والقال..
سالم: انتي شو تقولين انا عقلي بعده فراسي مايينيت ..ولدج عندج تبين تخطبين له تدلين الدرب..اما انا والله والله مااسير اخطب له ..شو مافيني دم اخطب للناس وولدي توه ظاهر من السجن متورط ويا وحدة..من هذا الي بيطيع يزوجة..لا بعد وياليت أي حد بنت ناصر...يابنت الحلال نحن وين وهم وين..
شيخة:شوفيك انته ..لين متى بتعقد بالعيال جذا
سالم:اوهوووو محد يقدر يرتاح في هالبيت..
ويطلع سالم عن شيخة..
شيخة كتمت في نفسها..ولاخبرت محمد برد ابووة... كفاية عيالها الي خسرتهم كفاية الي صار لمحمد..ماتبى تخسرة بعد...وكانت كل ما يسألها محمد عن الموضوع تقوله كلمت ابوك قريب ان شالله بيروح يرمس ابوها..ومحمد كان يقول نفس الرمسة حق فطامي..

طبعا محمد اشتغل..وبدى يداوم.. واول شي سواه بعد مااشتغل انه طلع تلفون وبطاقة واحد له وواحد لفطامي..
محمد: هلا فطامي حبيبي..اقول نشي قومي برى تريي احمد
فطامي: حووو حمودي شوفيك عنبو سلم شي شحالج .. أي شي حشى صدق حيري..
محمد: يلا نشي ..وعقب مايروح عنج احمد بدق..يالله سلام
سكرت فطامي..بسم الله محمد شو فيه تخبل هذا شووة... المهم طلعت برى كان احمد وصل وعند الباب عطاها كيس وروح
دخلت فطامي غرفتها تشوف شو فالكيس..
فتحت الكيس لقت فيه كرتون صغير والكرتون فيه تلفون وشاحن وبطاقة وسماعه وورقة.. الورقة كان مشخبط فيها حمودي ..وراسم فيها تلفون وشارح فيها حق فطامي كل زر شو وظيفته وكاتبلها كيف تستخدمة وكيف تسكرة الخ..
بطلوع الروح فطامي فهمت واول ماافتحت التلفون دق الها محمد..
محمد: هلا بروووووووووووووحي واخيرا برمسج على راحتنا..
فطامي: ياااااااااي والله استوى عندي موبايل..
محمد : هيه فديتج بس سمعي ياويلج وحد يشوفة خلي عالصامت تسمعيني وانا بدقلج.. انزين وانتي دقيلي متى تبين.. وبرمسج طول الليل وطول النهار وطول الوقت ...ياسلام يافطامي لو تدرين شقد ارتحت..ارتحت من وقفت الكابينه..ارتحت من خوف انه فهد يتسنط علينا او حتى يلقاج ترمسيني..ارتحت من اشياء وايد..
فطامي: حمدالله ياعمري..ًصدق الحين بنرتاح..
وفعلا بعد ماصار عند كل من محمد وفطامي موبايل.. ارتاحوا من وايد مشاكل ومن وايد خووف..حتى فهد نسى سالفتهم ..وتوقع انها فطامي خلاص تركت محمد بعد ماانسجن .. ونسى السالفة مولية..موزة ارتاحت على بنتها..
وخالد عقب مارسب فالثانوية قام وسجل الجيش ومافكر حتى انه يعيد الثانوية.. اما فطامي فبدى العام الدراسي عندها وكانت مجتهده لانها هذي آخر سنة الها...ولازم تشد حيلها وتاخذ نسبة تدخلها كلية الطب..ومحمد ماكان يقصر عليها بشي كان موفرلها كل جو الامان والراحة عشان توصل لهدفها..مرت الايام ومحمد يلح يوميا على امه ..امي امي متى بتروحون تخطبون فطامي تعبت مرن شهور وانتوا ماتحركتوا...
شيخة تعبت وماتقدر تخبي على محمد اكثر من جذا..وتعبت من كثر ماتناقش ريلها فالموضوع بس بدون فايدة..فقررت تروح بيت فطامي..
شيخة تدق الباب..فتحت الخدامة الباب..
شيخة: ماما موزة موجودة
الخدامة: يس ماما من يقول..؟
شيخة قوليلها حرمة..
الخدامة : اوكي ماما بس ممكن يجلس فالمجلس انتظار شوي..
دخلت شيخة الميلس ويت موزة سلمت عليها وسولفن ويا بعض.. وبعد ماخلصن سوالف..
شخية: اقول موزة.. ما شالله فطامي بتخلص السنة دراسة
موزة: هيه ان شالله هذي اخر سنة الها..
شيخة: ان شالله ..محمد بعد يقول بيسجل فالتقنية تعرفين انتي مشتغل من كم شهر ويوم استقر قرر يدرس
موزة: الله يوفقة
شيخة: ماعرف شو اقولج ياموزة بس انتي تعرفين بسالفة فطامي ومحمد ونحن نبى نلم العيال وعاد انا ييت ارمسج واقولج انا نبى فطامي لولدنا محمد..
موزة: والله ياشيخة انتوا ناس والنعم فيكم.. ومحمد ما شالله عليه ريال ومايعيبة شي..بش البنت شورها عند ابوها..وعني انا ماعندي مشكله..خلي الرياييل ايوون ويتفقون..
شيخة:يابوج ..سالم مب راضي ايي اونه يستحي يرمس ناصر لانه محمد ظاهر من السجن وعسبت المشاكل الي صارن..
موزة: والله عاد بصرفكم ..نحن ماعندنا شور وريلي ماياخذ كلام حريم..يوم بييي سالم ويكلمة يصير خير..
شيخة: الله يعين بس ويهدي هالريال ..عموما اترخص انا..وداعة الله وسلمي على فطامي..
موزة: وداعة الله سلامن يبلغ..

طلعت شيخة من بيت موزة وهيه مفتشلة فالناس..ومثل ماصار بالضبط خبرت محمد.. حاولوا محمد وشيخة يقنعون سالم انه يروح يرمس ناصر مابيخسر شي..بس سالم مش موافق.. مب راضي راكب راسة..
اما موزة فخبرت ناصر باللي صار..وفعلا ناصر قالها انا مااخذ كلام حريم..يوم بيون الرياييل يصير خير..وبالرغم من انه سالم عرف رد ناصر ودرى انه مابيردة لكن سالم كان معاند ومصر انه محمد ماياخذ فطامي..لو شوو مايصير..

مرت الأيام حلووة وهادية نوعا ما بالرغم من حزن فطامي..كانت دايما تقول حق محمد ..انا شو الي ناقصني ليش ابوك ..مايباني ليش رافضني رفض قطعي..محمد تدري ان كل الناس تتمناني وابوك لا..محمد شوفيني انا..
وفعلا من اول مابدت فطامي سنتها الاخيرة فالمدرسة والناس من كل مكان تروح عشان تخطبها..بس هيه كانت ترفض..ناس احسن من محمد واهله سواء من الناحية الاجتماعيه او حتى الاخلاقية ..بس فطامي كانت متمسكة بمحمد لآخر درجة..

وفي يوم من الايام دقت فطامي على محمد
فطامي: حمووووووودي حمودي فديتك انت حبيبي انت
محمد :بدى التقردين..من الآخر شو تبين
فطامي: يعني لازم ابا شي احبك عادي مافيها شي
محمد :هيه ادري تحبين بس اعرفج وراج سالفة
فطامي: احم ابا اروح فلج هزاع
محمد: وليش ان شالله
فطامي: ياااااااااااااربي يالله عاد حمودي وافق
محمد: انزين خبريني ليش
فطامي: اليوم عرس عوض ولد خالتي..
محمد: اها ما شالله بيعرس..شو نسيتي الي سواه فيني بعد تبين تروحين عرسة..يلسي درسي احسن
فطامي: ياحمودي ياغبي..شوف انا لو مارحت بيقولون زعلانه واباه ووو الخ خصوصا انهم مايعرفون الي صار بينا
محمد: حتى لو ماشي طلعه
فطامي: اففف منك انزين
محمد: فطامي حبيبي لاتزعلين فديتج..بس خلاص والله اني تعبت واايد مااقدر اتحمل زود دخيلج
فطامي: خلاص خلاص انزين..يلا بسير ادرس..
سكرت فطامي عن محمد ..وكان خاطرها تحضر عرس عوض..لكنها ماحضرتها.. مش عشان السبب الي قالته حق محمد ولكن ياااااااااحب فطامي حق الهياته والطلعات

مرت الأيام وارتاحت فطامي من شكوك فهد..ارتاحت من الضرب..ارتاحت من المشاكل..

وفي رمضان في العشر الأواخر قبل العيد..كانوا اهل فطامي امها وابوها رايحين العمره.. في حين البيت فيه فهد وفطامي وحرمة ابوها العيوز ويا الصغار..
الساعه 3 بالليل وفهد رايح يرمس ويا ربعه وخوات فطامي وحرمة ابوها نايمين..فطامي فالمطبخ تسوي سحور..
وهيه تسوي سحور سمعت صووت ..التفت صوب دريشة المطبخ على طول صوب مصدر الصوت ..لان مصدر الصوت من السكة والدريشة فاتحة على السكة..بس ماشافت شي..قالت يمكن قطو او الريح او أي شي..وكملت..بعد شوي حست بشي وكانه حد يطالعها..وهيه قريبة جدا من الدريشة..التفتت صوب الدريشة ..وفجاة صرخت ..ولكن شي كتم صوتها وماعادت كملت صراخها ...لانه سكر على ثمها بايدة

فطامي: مم ممم ممممم
تحاول تفج الايد الي على ثمها خصوصا انها داخله من الشباك يعني سهل تفجها لكن ماشي فايدة
ويتكلم

فطامي شفيج سكتي انا محمد ويفج ايدة
فطامي: محمد خيييييييييبة انت محمد ..شو يابنك هنيه بيقتلوني شوفيج يلا روح بيتكم دخيلك اخاف يمر فهد السكة ويشوفك روح دخيلك
محمد: يااااااااااااااااااسلام فديتج والله حبيبتي محلاج لي ربع ساعه اشوفج فديتج والله ياعمري فديتج..شو تسوين
فطامي: بسبوسة..
محمد: الحين بسبوسة انتي بعد
فطامي: ياغبي البسبوسة فيها سعرات حرارية زين تسحر فيها عشان ماتيوع ..يلا عاد روح بيتكم
محمد مابا مابا مابا..
قامت فطامي وخذت قطعة بسبوسة كبيرة بايدها ودخلتها مرة وحدة في فم محمد..
فطامي: يلا بيتكم اشوف ..دخيلك
محمد عيونه بيطلعن يخاف يطلع أي صوت وحد يسمعه والبسبوسة مالية ثمة شوي وبيغص..
عطته فطامي ماي وقالت له يلا اشرب لا تموت بعد وتسويلي مصيبة اشرب ويلا دخيلك دخيلك رووح
لكن محمد مصر انه يتم عند فطامي
محمد: فديتج عمري كم سنه ماشفتج من قريب خليني اكحل عيني ..
فطامي: هيه انت كحل عينك بي وانا بيكحلولي عيني ببكس ورى باجر العيد.. وعيني عيناوية شرايك اشجع العين بدل لا اعيد..
محمد : فديت العين يلا ..فطامي غمضي عيونج فديتج..
فطامي :شو بتعطيني بووووووكس
محمد: لا يلا عاد فديتج
فطامي : هاه غمضت
محمد: هاااااااااااااااااااااااااااااااااج
ويطلع صندوق مربع صغير وملفوف وعليه شريط وردي وفوقة بطاقة صغيرة
فطامي: شو هذا
محمد : هذي هدية العيد..
فطامي: فديت روحك ياعمري يلا عاد روح
محمد : دخلي الهدية فالدرج أي درج فالمطبخ...وتعالي بقولج كلمة وبروح
قامت فطامي ودخلت الهدية فالدرج فالمطبخ ويت صوب الدريشة
فطامي : ها حمودي امر يلا بس بسرعه..
محمد: ماشي بس ابا اقولج احبج ويه بويه أحبببببببببببببببببببببببببببج
فطامي : أ
فهد: فطامي شو تسوين صوب الدريشة
فطامي: هاااااا (شهقت) ااا ا طالع الريح
فهد : أي ريح هذي الحين قومي خليني اشوف
طالع فهد من الدريشة بس ماشاف شي لان محمد مالحق يهرب فيلس تحت الدريشة على طول بحيث لو طالع فهد مايشوفة..
هنيه فطامي حست انها بتموت من الخوف.. على طول دخلت الغرفة وتدق على محمد
محمد: هلا حبيبي تطمني انا بخير وصلت البيت ..حمدالله عدت على خير
فطامي: مالت عليك يوم اقولك روح روح ماتسمع الرمسة ياويلك ان عدتها
محمد: يصير خير..اقول شو رايج فالهدية
فطامي: يوووووووووة نسيتها فالدرج يلا باي باي بروح اشوفها
محمد : زين شوفيها وردي عليه

فعلا راحت فطامي المطبخ وفجت الهدية ولقت محمد ماخذلها طقم ذهب..وعليه بطاقة " عيد مبارك "..فرحت وايد فطامي بالهدية ..واستانست عليها وايد..وحتى انها لبست العقد الي اهداه الها محمد يوم العيد..

::::::::::::::::نهاية الجزء الثامن ::::::::::::::::::::::

وبعد عيد الفطر بدى وقت الجد..فطامي انتبهت لدراستها أكثر..ومحمد كان يحاول بأي طريقة يسجل في كلية التقنية بعد ماانفصل من الجامعه لكن بدون فايده..
اما خالد ..فقرر انه يتزوج بالسر..في حين فهد عارض زواج خالد بكل مافيه من قوة وحاول انه يمنعه باي طريقة ..لكن خالد ماكان يهمه احد تعرف على وحدة وقرر يتزوجها بالسر على امل انه الزواج ينسيه فطامي دام انه اللعب مع البنات مااقدر ينسيه اياها وفعلا تزوج خالد ومحد عرف عن زواجه غير امه وفهد..وانشغل مع زوجته الجديدة لدرجة انه مافكرحتى يعيد الثانوية خصوصا ان هذي السنة فطامي فالثانوية..

مرت الأيام وبدت إجازة ما قبل امتحانات الثانوية العامه... محمد كان بكل مافيه يشجع فطامي..وكان واثق انها قدها.. لان فطامي كانت شاطرة وماينخاف عليها والمطلوب منها تاخذ نسبة فوق ال95,6 عشان تقدر تدخل طب لان في هذاك العام كانت هذي النسبة الوحيدة ولاشي اقل منها ممكن يخليها تدخل طب .... وبالرغم من انها فطامي بدت بكل معنويات عاليه تدرس رتبت وقتها وجدولها..ومحمد كانت تطمنه عليها بمسجات واذا لقت فرصة تكلمة.. ولكن دايما تهب الرياح بما لاتشتهي السفن وبدت أحلام فطامي تبدد ..فكل ماكانت فطامي تفتح كتاب عشان تدرس تسمع امها تصرخ عليها وتناديها
موزة: فطااااااااااامي ...فطامي لحقيني لحقيني ابوج تعبان ماعرف شو اسوي له..
فطامي توقف تناظر امها او تاخذ اخوها سالم عشان تيب تكسي وتوصل ابوها المستشفى والسبب انه فهد..كان ابدا ماله شغل فالبيت متخلي عن مسؤلياته تماما ..عيال عم فطامي.. اذا يبون شي كانوا ايون وغير كذا لا...كانت فطامي تحلم باليوم الي يكبر فيه سالم ويخفف عنها شوي لكن وقتها كان سالم توه ولد 11 سنة..
وبالرغم من صعوبة الظروف كانت فطامي قدها ..والدراسة مش اغلى عند فطامي من ابوها.. واحيانا كان ابوها يتنوم فالمستشفى وامها تظل وياه ومسؤولية البيت والاخوان على راس فطامي.. وفي ايام كان محمد مايقصر يمر على ابو فطامي ويودية السوق او المستشفى والمكان الي يريدة...بدون لا يشتكي او يمل.. مرت ايام الدراسة ماقبل الامتحانات على هالحال.. وقبل الامتحانات بيومين اتصل محمد لفطامي...
محمد: غناتي فديت روحج اشتقت لج
فطامي: وان اكثر ياغناتي..
محمد: غناتي شوفيج احسج مضايجة..
فطامي: ابوي يامحمد تعبان
محمد : ادري فديتج شفته ..ادعيله الله يشفيه وركزي على دراستج
فطامي: ان شالله لو اقدر ووين اقدر اركز في شي وابوي في هحاله ..
محمد : غناتي ادري مب وقته بس مااقدر يمر عليه يوم 1\6 من كل سنة وماباركلج بهاليوم واتمنى لي وليج عمر وحب كبير
فطامي: فديت روحك ياعمري حتى انا مانسيت هاليوم...
محمد: روحي انتي والله عمري وماراح اتخلى عنج لو على موتي..
فطامي : والله ياعمري الي شاف الظروف الي مرينا فيها ..مايقول انا اليوم كملنا اربع سنين
محمد: فديتج ياقلبي مبونه الي ايي بسرعه يروح بسرعه وحبنا اكبر من هالاشياء الله يحفظنا ويحفظ حبنا..
حبيبتي سمعي اهداء..
فطامي ها اسمع
محمد يشغل اغنية طلال سلامة ( حبنا الله عليه ماتغيرة الظروف يسالوني كيف وليه حبنا فوق الوصوف )
فطامي: وانت صادق يا قلبي..يلا حياتي بخيلك بسير ادرس
محمد: بالتوفيق ياقلبي.. وداعة الله وتحملي على روحج مع السلامة...

وفعلا بدت الامتحانات..اول يوم كان امتحان رياضيات.. وهذي المادة الي تكرها فطامي..امتحنت ولمن رجعت فطامي البيت
موزة: هابنتي بشري شو الامتحان
فطامي: يخيييييييييييج يامي اسميني اكره شي اسمة رياضيات لو بفتك منه جان انا بالف خير
موزة: ماعليه يابنتي شدي حليج وباجر بعده رياضيات بتعوضين ان شالله..
فطامي : ان شالله امي ادعيلي..
مرت الايام وكان ناصر ابو فطامي في حاله ماتسر عدوو ولا صديق..توها فطامي بتفتح كتاب وتزقرها موزة تشوف ابوها ..كانت موزة تتلوم في فطامي وتدري انها لاهيتنها عن دراستها لكن شو تسوي هذي بنتها العودة وسندها الوحيد وموزة مثل فطامي بعد ....ترى جد فطامي الي هو ابو موزة متوفي وموزة ماعندها اخوان يعني فطامي ماعندها خوال بس خالات بنات..

وفي ليلة امتحان الكيمياء تعب ناصر وايد..فطامي توها فاتحة كتاب الجزء الاول وموزة تناديها..ويودون ناصر المستشفى ويرجعون بالليل
موزة: فطامي امايه فديتج سامحينا..قومي افتحي كتابج درسي كم كلمة
فطامي: اقووووووووولج امي مالي خاطر بسير العب سيجا..
موزة: يابنتي استهدي بالله قوم قري لو كلمتين بينفعنج باجر
فطامي: امي لاتخافين بعدين شو ظمني انه هالكلمتين الي بدرسهن بيبون منهن فالامتحان باجر.. امي دخيلج خليني بحالي..
موزة: يابنتي الله يهديج ويسمح طريقج
قامت فطامي.. وشغلت السيجا وقعدت تلعب ( الفطر وعقبه السيرك وعقبه سيارات) ولاجنها ثانوية عامه..خلاص تعقدت صارت كل ماتفتح الكتاب... تتخيل امها تزقرها وتفز تخاف ابوها صايرله شي..
وعلى هذي الطريقة مرت امتحانات الثانوية العامه.. وارتاحت فطامي منها ..ولكن .!!

.ناصر ينتظر موزة تنتظر ومحمد ينتظر...نتيجة فطامي شو بتسوي فطامي كم بتيب وهم يدرون انه فطامي حتى ماحاطة في بالها بديل عن الطب..الطب الطب ولاشي غيرة..لكن الي مايدرون عنه هو كيف حلت فطامي فالامتحانات وشو سويت فيهن..

مرت الايام.. وجا يوم النتايج..وفطامي تنتظر النتيجة .... الناس طلعت النتايج من الانترنت.. والي يعرف حد اتصله وطلع نتيجته بس فطامي محد طلع نتيجتها وكانت جداً خايفة خصوصا ان كل البنات الي معاها فالصف طلعت نتايجهم وكانت زفته بالرغم من انه مستواهم اعلى من مستوى فطامي...

محمد اعصابه على نار يتصل على فطامي لكن تلفونها مغلق ..ماقدر يصبر..فقرر انه يروح السوق وياخذ الجريدة..لف السوق كامل لكن الجريدة وقتها ماكانت نازله..مافيه صبر راح على طول المنطقة التعليمية فالعين وسال عن نتيجة فطامي..وبعد ساعه من الانتظار قاللوه نتيجة فطامي..
اما في بيت فطامي ..
فكانت فطامي تبكي من الخوف ..الكل يتصل ويسال كم نتيجة فطامي صارت الدنيا العصر وفطامي محد طلع نتيجتها وناصر..وموزة ينتظروون.. وفجاة ردت فطامي على تلفون البيت وسكرت..وراحت صوب امها وابوها
وقفت قربهم وقعدت تناظرهم بعيونها وكانهن جمر صايرة حمرا والدموع محبوسه فيها... وبعدين ركضت تصيح صوب الحوش..
قعدت تبكي بكاء يقطع القلب..
ناصر كان يناظر فطامي.. في مكانه ..ماله ويه يجابلها حس انه هو السبب هو الي مرض وماخلى فطامي تركز في دراستها ..قعدت شفايفه ترجف من بعيد ويرتجف ويبكي..ناصر الريال العود قعد يبكي كانه طفل صغير من كثر ماهو حاس بالذنب..
موزة: تحبس دموعها..اامي فطامي قولي شو سويتي شو يااااااج حرام عليج تسوين في ابوج جذا

قامت فطامي وسارت حضنت ابوها وتمت تصيح..ابوي ابوي فديتك لاتعور قلبك مافيني شي وانا نجحت ويبت 90 يابوي لكنها ماتدخلني طب ..ابوي ارتاح صدقني انا بخير والذنب مب ذنبك هذا قضاء الله وهذا نصيبي..وخذت ابوها ودخلته الغرفة خصوصا ان صحته ما تستحمل..ودخلت هيه غرفتها وكملت بكي..وفتحت تلفونها الي محمد عطاها اياه..وكان محمد مطرشلها مسج فاول ماوصله تقرير التسلم اتصل..
محمد: الووو هلا
فطامي: اهلين
محمد: شو هذا فطامي انتي كنتي تدرسين والا تلعبين يوم كنت اناصحج ماتسمعين الرمسة عنبو شو يااااااج
فطامي: محمد لاتزيدني يكفيني الي فيني..
قعدت فطامي تصيح..ومحمد كله يهون عنده الا دموع فطامي فتلوم فيها..وقام يهديها
محمد: حبيبي فطامي خلاص فديتج..خلاص حبي..انتي سويتي الي عليج..وبعدين انتي اشطر عني يلا عاد فديتج قومي ابا اسمع ضحكتج..
فطامي: محمد دخيلك مالي خاطر..
محمد: سمعي فطامي ماقتلج انا شفت درجاتج كلهم ..والله يافطامي ان كل المواد درجاتج فيهم عاليه ناقصة درجة او درجتين..
فطامي: عيل ليش ليش مايبت نسبة ليش
محمد: فطامي ترى 90 مب شوية هالنسبة والي ايبون فوق هالنسبة درجاتهم عاليه بشكل مااتخيلينه بعدين انتي نقصتي وايد فالرياضيات تقريبا ناقصة 80 درجة تخيلي من ثلاث اميه وهذا الي نزل نسبتج والا كنتي بتاخذين فوق التسعين وبتدخلين طب..بعدين ماتعرفين عسى ان تكرهوا شيئا وهو خير لكم يلا غناتي عاد..قوم فرحي وفرحي هلج..
فطامي: ان شالله..هو جي والا جي اخر شي بعرس وبربيلك عيالك ويا ويهك
محمد: يوم انج تعرفين جي ..عيل كيف تفكرين بالطب ماتدرين انه الي يبى طب لازم مايفكر في حياته طول سبع سنين خلج واقعيه..
فطامي: بس هذا كان حلمي..
محمد: ماعليه غناتي احلامي واحلامج وحدة وان شالله بنرسم طريج حياتنا واحد وبنمشيه اثنينتا كانا شخص واحد...

هدى محمد فطامي وقامت طبيعيه ..وراحت ويلست ويا ابوها وامها.. وبهالمناسبة قرر ناصر انه يسوي حفله لفطامي لا صارت ولا استوت ووعدها ان حفلتها تكون حتى اكبر من حفلة زواجها.. وبعد كم يوم من ظهور النتايج.. بدى ناصر يوصي عشان يسون حفله حق فطامي خصوصا انها اغلى بناته..
وفعلا جا يوم الحفلة وعزم ناصر كل اهل الحارة حريم ورياييل ..بما فيهم محمد واهله..
وحضر سالم ابو محمد للحفلة و انذهل من الحفله والمعازيم معقول يسوي كل هذا عشان بنتة لانها خلصت ثانوية ..عيل منو هذا المليونير الي بيتزوج بنته ...اذا كذا حفلة ثانوية عيل كيف بيطلب حفلة زواجها..

اما شيخة فدخلت ..البيت وسلمت ع الحريم وسالت موزة عن فطامي ..تبى تشوفها وتسلم عليها خصوصا انها شيخة ماشايفه فطامي بعد ماكبرت
طلعت فطامي من غرفتها.. وكانت مثل القمر الكل انذهل بدخلتها.. مع انها ماكانت مسوية شي بسيطة جدا..
طلعت فطامي وهيه لابسة كندورتها مخورة تلي لونها اسود وفيها لمعه بيضا (ويل) وكانت فاجة شعرها الطويل لحد ركبتها..وعيونها في كحل خفيف..كان لونها وردي يميل للبياض شفايفها وخدودها ورديه وعيونها وروموشها وشعرها اسود سواد حالك..
شيخة يات تسلم على فطامي وهيه تصلي عالنبي..مذهوله من درجة الجمال الي وصلت له له فطامي بعد ماكبرت..
شيخة: مرحبا والله بفطامي مرحبا بعروستنا
فطامي انحرجت..وباست شيخه على راسها وخشمها... وقالتها مرحبه عموور شحالج وشحال البنات
شيخة ( وهيه عيونها مذهوله في فطامي لدرجة انها فطامي قامت تطالع تحت ) بخير البنات يعلج الخير ومبروك يالغاليه مبروك وعقبال عرسج ياربي...
هنيه فطامي انحرجت من الخاطر...وركضت خذت شيله خفيفة وغطت شعرها من فوق والباقي برى ..عقب سارت صوب المطبخ عشان تساعد امها وهيه تركض وهنيه كانت الصاعقة.....

عوض كان داخل صوب المطبخة يسلم على خالته موزة.. وهو طالع فطامي كانت يايه تركض وتصادموو
صدمة قوية لدرجة انها كانت فطامي بتطيح لو مامسكها عوض..
عوض لا ارادي لمن شاف فطامي ارطتمت فيه وخلاااااااص بطيح وقبل لا تلامس الارض مد ايدينه والتقطتها كانها ريشة.. وفطامي تقول في خاطري شوفيني انا اليوم حشى مب عارفة اعقل .. اما عوض
فقام وسلم عليها وكانت متعود دايما يسلم عليها (بالخشم ) بس فطامي مدت له وسلمت عليه ولفت وراحت عنه..عقب قام عوض وزقرها..
عوض: فطاامي
فطامي : نعم عوض زقرتني بغيت شي..
عوض: تعالي خذي هذي هدية نجاحج..وهذي من عندي.. اما حرمتي بتي باجر ان شالله وبتيبلج هديتها الخاصة
فطامي: مشكور عوض وماقصرت..وافا عليك قولها لاتعب عمرها مابا عليكم شي تكفيني زيارتكم
عوض:وانا تكفيني شوفتج..
هنيه فطامي حست انه خلاص مافي داعي انها تقعد تناقش عوض وتاخذ وتعطي وياه ..لانه شكله مصخها خطفت تركض بتسير غرفتها عشان تودي الهدية الي عطاها اياها عوض واول ما التفتت عن عوض رجع وناداها..
عوض: فطاامي
فطامي: نعم
عوض: ماشي بس بغيت اقولج..غطي شعرج لانه برى وتحملي على عمرج لا تركضين البلاط عليه ماي واخاف تطيحين..
فطامي : ان شالله

قلب عوض كان ينفطر .. لدرجة انه حس في لحظة انها ممكن السالفة الي صارت قبل كم سنة كانت كذبة من اكاذيب فهد.. اما فطامي فراحت الغرفة وفجت هدية عوض ..فيها فضول تبى تعرف شو الهدية بالرغم من انها وصلتها ميات الهدايا بس مافتحتهن.. المهم فتحت هدية عوض وكانت الهدية عبارة عن حلق ( شغاب) على شكل قلب مقسوم نصين نصة ذهب ونصة فضة ..وتقول في خاطرها الله مالت عليك ياعوض صدق انه عندك ذووق .. سكرت الهدية ولفتها مثل ماكانت وعقب قامت واتصلت على محمد..
فطامي: حووو انته وين؟ تعشيتوا والا لأ.
محمد: انا صراحة ولاتزعلين هنيه فالسوق فالقهوة
فطامي: مالت عليك وعلى ويهك... كل هالعشيات والذبايح وتقولي فالسوق وليش ماييت تتعشى يالمدمغ
محمد: خبله انتي شو تبين فهد يشوفني عينك عينك في بيتكم ويسويلي بلوة مافي عالمشاكل..
فطامي: اقول انجب احسن بسير برع وين يحطون العشيات وبخبر امي تحطي عشا عشان يودونه بيتكم مالت عليك
محمد: فطامي حبيبي لاتزعلين فديتج..بعدين تعالي شفتي امي..
فطامي هيه... ههههههههههههه شكلها داخت يوم شافتني
محمد: بس بس عن الخقة مداح نفسة
فطامي: شوفيك عليه هههه تعال تعال وين الهدية..هاه يا شحفان القطوو
محمد: اوهو وانتي ماتيوزين الا تخربين مفاجات ..يايبلج هدية عمرج ماتحلمين فيها بس التوصيل كيف
فطامي: هب مشكلة عندي الحل..شوف انا مفصلة ثياب فالخياط الفلاني..انزين امي باجر بتروح تيبهن..اوكي حط الاغراض عنده وانا بقول لامي انها وحدة من ربايعي مطرشتنهن ها شو قلت
محمد: والله زين يلا عيل سيري حق الناس مب زين يالسة ترمسني جي
فطامي: هيه والله صدقك ..يلا مع السلامة وتحمل على روحك وداعة الله..
طلعت فطامي وقعدت تساعد امها.. والمعازيم كانوا مالين البيت من حريم وريياييل ..لكن شخص مهم وشخص غالي جدا هو اساس هذا كله كان غايب..فرحة فطامي كانت ناقصة...لان ابوها الي سوى هذا الحفل كله كان مريض ومريض جدا..وعشان مايفسد حفلة بنته دخل الغرفة وخذ ادويته وقرر انه ينام لحد ماتخلص الحفلة.. تحامل على نفسة وعلى المرض..
وبعد ماخلصت الحفلة وفضى البيت ..راحت فطامي تركض صوب غرفة ابوها ... ولكن
ناصر كان تعبان تعبان جدا..
طلعت فطامي عنده من الغرفة راحة تدور امها ...لقت امها قاعده مع عديلتها ( حرمة ناصر الثانية العيوز ) ومعاها بنات ناصر .. الي من زوجته الثانية
فطامي: امي امي الحقي علي ابوي تعبان تعبان وااااااااايد
رقية (اخت فطامي من الابو ) ويوم انج تدرين انه ابوج مريض جي تسوين حفلات اصلن ابوج عمره ماهمج
فطامي: ممكن تكرمينا بسكوتج ..يلا امي قومي نشوف ابوي نوديه المستشفى
وفعلا قامت فطامي وامها موزة وخذوا ناصر وودوه للمستشفى فالوقت الي بناته قاعدات يناظرن ولاكانه ابوهن ولاكانه عندهن ازواج ممكن يشيلونه المستشفى.. تنوم ناصر فالمستشفى كم يوم وطبعا لانه مافيه شي معين بس تعب الشيخوخة عطوه ادوية ..وطلعوه..

مرت الايام وبدى التسجيل فالجامعه..كانت موزة بتشق نفسها نصين بين مراجعات فطامي وبين زوجها المريض..حاولت تتحمل وياما طرشت فطامي عن جيرانهم او عند وحدة من صديقاتها عشان تخلص تسجيل ياما انذلت فطامي في سالفة الروحة والرجعه.. عشان جي قررت موزة تقنع ناصر يحطلهم دريول..
ناصر تردد وايد مايبى حد غريب فالبيت وسالفة الدريول مش داشة راسه..
اما فطامي فمشت حالها كل يوم عند حد وسجلت فالجامعه وسوت الفحص..ومحمد كان يتابعها من بعيد لبعيد حتى لو يتبع السيارة الي هيه فيها المهم يطمن عليها... وبعد اسبوعين من التسجيل ظهرت النتايج وانقبلت فطامي في الجامعه بكلية تقنية المعلومات..وبدت تجهز للجامعه بدون نفس خصوصا ان الكلية الي انقبلت فيها جديدة وهذي اول سنة تفتح.. وكلت امرها لله .. وخلت الايام تمر مثل ماتبي..لانها مش اول مرة تستسلم للقدر..ياما صارت اشياء غيرت مصيرها وهذا شي من مليون شي..
اما ناصر ففرحته كان بفطامي كبيرة ..وكان يعاملها على انها ولد عطاها كامل حريتها.. ووكلها على كل مسؤولياته فالبيت وبرى البيت.. وصار كل شي على راس فطامي..حتى سالفة السواق شالها من راسه واجبر فطامي انا تاخذ ليسن..لكن فطامي كانت دايما رافضة.. وتتحجج باي شي عشان ماتاخذ الليسن..

وبهذي الاحداث يسدل الستار على السنة الرابعه من جرح الأيـــــام ومازال الجرح في بدايته...(1999-2000)

::::::::: نهاية الجزء التاسع :::::::::::::

الصيف بعده ماانتهى والجامعه ..بعدها مابدت..وفالبيت الساعه 12 بالليل الكل نايم.. لكن فهد بعده مارجع وهذا شي طبيعي لانه متعود يسهر مع ربعه لحد الفجر خصوصا ان الدنيا اجازة..وبعد شوي... الباب يندق بقوة لدرجة انه الي يسمع الدق يقول الباب بينكسر ..في هذي اللحظة فطامي كانت تشوف فلم هندي فالتلفزيون.. سمعت الدق عالباب.. وطت الصوت ..فعلا هذا باب البيت يندق.. خافت ..شو تسوي توعي امها والا ابوها والا شو تسوي.. والباب يندق بقوة.. وطبعا ماشي حتى جرس المهم قررت تطلع تشوف منو هذا الي يدق بهذي القوة لو فهد بيدخل.. بدون لايدق خصوصا ان الباب مفتوح..
طلعت تشوف ولمن وصلت عند الباب لقت خالد عالباب.. موقف سيارته جدام بيت فطامي وباب السيارة مفتوح..ويطلع منها صوت ونين وصريخ متقطع.. وبدون لا تبدى كلام ويا خالد ركضت صوب السيارة لان هالصوت مش غريب هذا صوت فهد..
قربت فطامي من السيارة وفعلا الي فالسيارة كان فهد.. مسكت فطامي فهد وهو فالسيارة وتبي تنزلة بروحها مع انه مستحيل لكنها ماتجرات تكلم خالد او تطلبه يساعدها..
فطامي: فهد فهد فهد اخوي رد علي فهد شو فيك فهد فهد وتصرخ وتصيح..
خالد مذهول يروح يساعدها ينزل فهد والا شو يسوي في هالموقف ..والموقف مش مستحمل خصوصا انه فهد تعبان جدا ومش عارف شو فيه وفالوقت نفسة مذهول معقول عقب كل الي سواه فهد في فطامي بشهادة خالد معقول بعدها تخاف عليه وتتمنى له الخير..ماايدري انها فطامي تعتبر الاخ شي مقدس وانه مها صار يظل اخو.. ويظل غطى وستر لاخته وانه مهما سوى مش من قسوة لكن من خوف على اخته..فطامي تصرخ وخالد بعده يفكر لحد ماجاه الصوت الي يصحية
فطامي: خاااااااااااااالد الحقني فهد بيموت بين ايديني...
في هذي اللحظة بس صحى خالد من الافكار الي كانت تاخذه وتيبه بعد ماقضى خمس دقايق واقف عالباب وهو يفكر.. المهم ركض صوب فطامي وتساعدوو هيه وياه ودخلوو فهد صوب الميلس ..وقامت فطامي توعي ابوها وامها..وراحت تتصل على ابو فهد
موزة: شو صار ياولدي ياخالد.. شفيه فهد شو ياااااااااااه
خالد: والله شو اقولج ياخالتي..ماادري شوفيه يانا جي يرتجف ويصرخ..قلت بوديه المستشفى بس مااظنتي فيه عوق مستشفى بسم الله جنه ملبووس
موزة: بسم الله الرحمن الرحيم لاتقول جيه ياولدي... نتريا ابوة والا كيف الحين
خالد: ماعليه خالتي..انا بسير ايبله مطوع .. لين ايي عمي ابو فهد
موزة سارت صوب فهد تحاول تكلمة بس فهد مايدري عن شي كله يرتجف ويصرخ..وفطامي توها داخله عليهم الميلس عقب ماراحت تسوي تلفون لابو فهد..اما خالد فطلع عشان يروج يجيب مطوع يقرى على خالد.. وصل خالد عند الباب لكنه ما حصل نعاله..استغرب خالد معقول انا جاي حافي مستحيل انا متاكد اني توني فصخت النعال عند باب الميلس..دخل الميلس عشان يسال موزة اذا شافت نعاله..
خالد : خالتي ماشفتي نعالي توني فصختها عند الباب
موزة: لا والله ياولدي ما شفتها....و محد واعي عشان يشلها متاكد انك حطيتها هنيه خذ نعال عمك ناصر..
في هالوقت فطامي على حالها واقفة مثل ماكانت قبل خمس دقايق وهيه تشوف فهد وعيونها مليانه دموع ياترى شو صار في فهد..وفطامي اغلى ماعليها فهد وسالم لانها تعقدت عقب موت اخوها الاكبر.. ومش مستعده تخسرهم لاي سبب كان..
خالد: فطاااااااااااامي!!!
فطامي فزت من صوت خالد بهذي النبرة.. وانذهلت شو يبيها خالد توه طالع..شو الي رجعه
خالد: انتي لابسة نعالي وانا يالس ادور من الصبح..
هنيه فطامي انحرجت وطالعت صوب ريولها شافت نفسها لابسة نعال ريال لونها ابيض..ماعرفت شو تقول
فطامي: انا انا آسفة هاك النعال..مااانتبهت والله كنت مستعيله سايرة بدق حق ابو فهد لبست النعال بسرعه وركضت..
فصخت النعال حق خالد.. ولبس خالد نعاله وظهر بدون لايلفظ حرف واحد..وفطامي من كثر الاحراج مب قادرة تطالع اعلى من ريولها.. مر ربع ساعه ودخل ابو فهد وبعد شوي دخل المطوع وخالد وطلعت فطامي عنهم..
قعد المطوع يقرى على فهد تقريب الساعه..وبعد ماظهر سألهم شو صار بالضبط وقالهم خالد انهم قاعدين عند الدكان يرمسون وفجأة دق الهم فهد وكان مب طبيعي كل الي قدر يفهمه انه في طريجة لحديقة المطار مطار العين.. حاول خالد مع فهد عشان يعرف شو فيه لكن ماقدر.. الله ستر وشافووة حد من ربعه قرب الحديقة وشافو ان السيارة تمشي بدون توازن فحاولوا يلحقون عليه ويوقفونه.. وفالاخير تيبن انه فهد طلع فعلا ملبووس..
صحى فهد الصبح بدون لايدري شو الي صار البارحة... مرت الايام عادية على فهد لكن هذي الحاله كانت ترجع له كل ماعصب..وكان يتعب وايد..ودايما لمن يصحى ماكان يدري بالي يصير حولة..

اما فطامي فبدت سنتها الاولى فالجامعه..وكان دوامها من الصبح لحد المسا حاولت باي طريقة يكون من الصبح للظهر بس بدون فايدة..هذا دوام الاساسي..واجهت صعوبة كبيرة.. فالدراسة بالرغم من انها كانت متفوقة في المدرسة لكن المدرسة شي والجامعه شي ثاني..حاولت تتأقلم ويا الوضع بس كان صعب عليها..خصوصا ان ربعها الي وياها فالمدرسة تفر قوا وكل حد راح بطريج ..الي تزوج والي سافر والي اشتغل والا دخل جامعه ثانية..وهذا حال الدنيا.. وكل هذا كوم..وصعوبة انها فطامي تظل ثلاث ارباع اليوم برى البيت وهيه على نار كوم ثاني خصوصا انها تاركة البيت فيه اخوانها الي كبروا ويبون حد يراعيهم وابوها الي كل يوم وصحته تدهور يوم عن الثاني..مر الكورس الاول على فطامي ثقيل وبدون نفس تطلع من البيت ست ونص بالباص وترجع سبع ونص المغرب بالباص بعد.. واكثر ماعقد فطامي في الجامعه هيه مادة تقنية المعلومات (1) بالرغم من سهولتها بس فطامي ماتعرف تكتب حتى اسمها عالكمبيوتر وعمرها ماكتبت على كيبورد..وهالشي زاد من كره فطامي للجامعه خصوصا انه الكلية الي انقبلت فيها هيه كلية تقنية المعلومات فكيف راح تكمل فيها وهيه مش عارفة حتى الاساسيات..
كل الابواب مسكرة تبي وحدة صديقة تعرفها عشان تشرحلها بس مافي فايدة .. الرياضيات سهله والعربي والانجليزي كذلك لكن المصيبة في تقنية المعلومات.. هنيه قررت فطامي تروح لمدير وحدة المتطلبات الجامعيه وتشتكي على الاستاذ يعني تبرر موقفها لانها كانت تخاف من الرسوب..
حاولت وحاولت لحد ماوصلت عند المدير.. ودخلت عنده ..
فطامي: السلام عليكم
المدير: هلا وعليكم السلام تفضلي..
فطامي: شكرا..
المدير: نعم شو المشكلة الي يايتني عشانها تواجهج مشكلة فلدراسة او شي
فطامي: هيه المادة صعبة والاستاذ مايشرح وانا مش فاهمه شي ابدا ابدا ابدا ومااتخيل ارسب..
المدير: هدي هدي.. هذي المشكلة بس!! وجايه للمدير مرة وحدة كان رحتي عند ستاذ فلان المسؤول عن قسم تقنية المعلومات..وبعدين منو استاذج اصلن عشان اعرف اذا عليه شكوى من قبل..
فطامي: بصراحة استاذي فلان وبعدين..ًصدق صدق هو مايشرح وبعد كل الكلاس فاهم الا انا
المدير: بالعكس هذا الاستاذ سمعته وايد زينه..وبعدين كيف الاستاذ مايشرح زين والكل فاهم
فطامي: لانهم عندهم كمبيوتر فالبيت
المدير: شوفي خلينا نتكلم بالعامية وانتي شكلج بدوية صح والا انا غلطان
فطامي: (عقب مارتاحت للمدير وحست انه يكلمها مثل ابو وبنته ) هيه بدوية
المدير: تصدقين هذا المدير الي تشوفينه جدامج كان في يوم من الايام مثلج..بدوي ..شفتي جهاز الموبايل هذا اول ما شفناه ماكنا نعرف نستخدمة واليوم شوفي حتى الاطفال معاهم موبايلات .. الكمبيوتر نفس الشي صدقيني وبيجي يوم وبتحسين انه ولاشي وانتوا حاليا ماتاخذون الا الورد والبور بوينت والاكسل
فطامي: هيه بس بعد مااعرفهم والقهر انه اساسا كليتي تقنية معلومات
المدير: تبين دروس تقوية؟
فطامي: لا ماابي بس انتوا كلموا الاستاذ يشرح عدل او غيرووه..
المدير: يصير خير ان شالله بس اهم شي لاتحطين في بالج انج ماتفهمين وهذا اخطر شي..حاولي وصدقيني بتنجحين..وبتفوق بعد
فطامي: ان شالله..

طلعت فطامي من عند المدير وهيه كلها يأس وتقول في خاطرها هذا يسايرني بالكلام ..وفاليوم الثاني ماداومت والي بعده ماداومت مر اسبوع وفطامي ماتروح الجامعه والمشكلة انه في جامعه الامارات فالاساسي عندك 10 ساعات وبعدها حرمان يعني مابقى لفطامي الا كمن ساعه وعقب حرمان
بعد اسبوع داومت فطامي وعقب كلاس تقنية المعلومات قال الاستاذ حق فطامي تلحقة المكتب..
قعد الاستاذ ويا فطامي يناقشها..في موضوع المادة ويبي يعرف شو الي مافهمتنه فطامي بالضبط..وفالاخير اكتشف انها فطامي ماعندها خلفية عن الكمبيوتر وفي نفس الوقت خايفة حتى من مجرد المحاولة بانها تحاول تفهم..حاول الاستاذ مع فطامي..ومع الايام صارت فطامي مش بس تنجح فالاختبارات الا تبدع فيهن..لكنها دايما كانت تعقتد ان هذي الدرجات بالصدفة او تشجيع من الاستاذ وظل الخوف والشعور بالنقص وعدم الثقة يلاحقها بالرغم من ان الكورس انتهى وخذت فطامي امتياز في هذي المادة...
اما محمد فانشغل بداومة وبدى يكون نفسة وخذ له سيارة ويعني بدى يجمع شوية فلووس عشان يكون قد انه يتزوج فطامي..وفي ليلة من الليالي.. بعد نهاية الكورس الاول
فطامي: محمد انت مش ملاحظ شي
محمد: شو ياغناتي
فطامي: انت ماتحبني
محمد: فديت روحج من قال جي
فطامي: يالظالم كورس كامل اربع شهور مااحس انا صرنا نتكلم فيه مثل قبل لا يكون هونت
محمد: ياعمري فديتج من قالج..بعدين انتي كنت تداومين ست الصبح وترجعين سبع ونص المسا تعبانه يااادوب تتعشين وتنامين قوليلي بالذمة متى اكلمج انا
فطامي: حتى لو ياعمري.. المفروض بعد والا البعيد عن العين بعيد عن القلب
محمد: ياعمري..مستقبلي ضاع ودراستي راحت مابا أي شي يلهيج عن دراستج..اباج تسوين الي عجزت انا اسوية..
فطامي: لالالا مابي مستحيل
محمد: شو الي مستحيل بتكملين ان شالله وبفرح فيج يوم تتخرجين..مب كيفج
فطامي:لا يامحمد..انا مااقدر وماني رايحة الجامعه بعد اليوم
محمد:مش بكيفج..شو مش رايحة الجامعه وين احلامج وين طموحج وين احلامنا؟
فطامي: محمد والله تعبت انتي ماتعرف هالكورس كيف مر عليه غربة وتعبت والله الاساتذة يشرحون وانا قلبي وعقلي فالبيت اخاف ابوي يصير فيه شي بغيابي اخاف يحتاجون شي وانا مش موجودة..
محمد: فطامي ادري ان هذيلا اهلج بس بعد هذي حياتج لين متى بتظلين جي..باجر يوم بنتزوج بتعيشين معاي..لازم تغيرين تفكيرج انتي كبرتي ولازم تتعودين تعيشين بعيد عن اهلج..لازم تختلطين مع الناس وتحاولين تكونين علاقات الدنيا اكبر من الفريج الي عايشين فيه..
فطامي: محمد ارجوك انا ربيت على هذا الشي وانا راضية فيه وهالتطور وهالانفتاح ماابيه انا كذا راضية والجامعه وبلاويها والي يصير فيها مستحيل ارجع له تعرف شنو يعني مستحيل..والزواج هذا الي تتكلم عنه صارلنا سنتين وانت تقولي كلمت اهلك وكلمتهم ..وماشي غير امك جت تكلم امي..وابوك وينه كل هالمدة والا انا مش ماليه عينه..شو نحن اقل عنكم والا شوو بالضبط ابي افهم؟... اساسا يحمد ربه ابوك اذا ابوي وافق يزوجني اياكم
محمد: فطامي شو فيج حبيبتي شو صالج توج شو زينج
فطامي: حبيبي محمد..انا احبك بس بعد انا بنت ناس..معلقة من سنتين كل الحارة صارت تعرف ان امك مكلمة امي وانكم تبوني بس ماصار شي لين متى شغل واشتغلت وكونت نفسك وانا تخرجت من الثانوية والحين فالجامعه ولا تتوقع اني عاقة عمري عليك لاوالله..وفي نفس الوقت ادري انه مش ذنبك ولا اريد احملك فوق طاقتك بس لازم تتحرك او خلني اشوف حياتي..
محمد: فطامي دخيلج بس بس بروحي كرهت حياتي ويا ابوي الي مش راضي يسويلي شي..حتى لمن كنت ادور شغل وهو واسطاته كل مكان ما تنزل يكلم حد من ربعه عشان يعيني ..كانه يستحي لاني ولدة شو تبيني اسوي
فطامي: وانا بعد شو تبوني اسوي..
وصكت السماعه في ويه محمد وقعدت تصيح...وحست ان الدنيا صارت بلا طعم وان الامر يطول ويطول وهيه ومحمد شكلهم يتبعون سراب..ويرسمون احلانم بالرصاص سهل انها بلحظة تنمسح
حاول محمد يتصل بفطامي طول هالفترة لكن فطامي كانت تصدة وبقوة..طرش مسجات حاول حاول بكل الطرق..ومع ذلك فطامي بعدها عند موقفها تباني تدل بيتنا...فالوقت الي كان محمد يذل نفسه ذل عند ابوه ويقوله انه بس يروح لو مرة وحدة بس مرة وحدة روح كلم ابوها وبعدها خلاص مابي منك شي صدقني ماراح اطلب منك شي.. لكن سالم كان كل يوم يمشي محمد بموضوع مرة يقوله مشغول ومرة يقوله باجر ومره يقول انتظر ريال يروح معاي من اهلهم وكل يوم بحجة.. وعلى هالموال مرت الاجازة القصيرة الي هيه اجازة نص السنة بين الكورسين ...

::::::::::::::::نهاية الجزء العاشر ::::::::::::::::

القصه واقعية يعني حقيقية وكل احداثها صايرة بالفعل وبصراحة..انا حاولت قد مااقدر التزم فيها الشفافية والمصداقية...اغلب احداثها صايرة قدام عيني وفي فريجنا.. والسبب الي خلاني اكتب القصة اني كنت اتمنى يجي يوم وابطال هالقصة يقرونها.. وعالاقل يقدرون كم هم ضحوا اذا الناس ماقدرت تقدر... وحبيت انشرها فالنت لان النت عالم كبير والدنيا صغيرة والا مايجي يوم وتطيح القصة بين ايدين اي حد فيهم ويقراها ..

وعشان مااخليكم تملون نزلت بعد جزئين وان شالله المغرب او العصر بالكثير انزل باقي احداث السنة الخامسة ونكون وصلنا نص القصة... ع فكرة ترى الباقي مو كثيرة هيه السنة السادسة بس طويلة اما الباقي عادي...

*************************

بدى الكورس الثاني.. بدون لا يتغير معه شي..ولكن...الصبح وفي اول يوم من ايام الدوام بعد الاجازة..
موزة: فطامي امي حبيبتي قومي يلا عليج دوام
فطامي: امي امي ماعليه دوام اول اسبوع مايعطونا شي مابروح الكلية خليني انام .. اوكي اماية..
موزة: متاكدة ؟؟ والله يابنتي ماعرف شو اقولج بس اذا ماعندج شي خلاص لا تسيرين
فطامي قعدت تتحجج اول اسبوع كل يوم بشي عشان ماتروح الجامعه لكن بعد مانتهى اول اسبوع صار الموضوع كبير وماينسكت عليه وناصر وموزة يدرون ان فطامي ماتروح الجامعه وفي يوم السبت من الاسبوع الثاني..
موزة: فطامي يلا نشي سيري الجامعه
فطامي: (تضيع الوقت وعشان الباص يروح عنها تنتظر بس الساعه ست ونص تمر) امي امي كاني قمت بروح اتسبح..
وفالوقت الي كانت فطامي فيه قاعدة تتسبح لمدة ساعه
موزة: فطامي الباص برى شو اخرج يلا
فطامي: خلاص امي خليه يروحي انا توني حتى ماغسلت شعري
موزة: فطامي شو الي تسوينه بتسرين الجامعه غصبن عنج انا مب ياهل تضحكين عليه..
وطلعت موزة واشرت للباص يروح..
فالوقت نفسة كان ابو خالد جارهم برى البيت يشغل السيارة
موزة: مرحبا بو خالد وين تبى ساير..
بوخالد: والله بسير الجامعه تعرفين بعد مها تراها ماداومت ويا البنات بداية السنة اليوم يبدى داومها مع الكورس الثاني
موزة: زين والله عيل فطامي بعد راح عنها الباص..لو توصلونها الجامعه وياكم زين
بوخالد: افا عليج.. بنترياها حتى مها ماخلصت..
دخلت موزة في غرفة فطامي وفطامي ماصدقت يروح الباص ردت تغطت بالبطانية ونامت وموزة خلاااااااااص واصله حدها من تصرفات فطامي..
موزة: فطامي نشي نشي عن البزى الباص راح بس بوخالد يترياج برى بيودي بنته مها الجامعه وانتي بتسيرين عندهم ومب كيفج غصب
فطامي: مابا مابا مابا مابسير وقعدت تصيح
موزة: هالدلع مب عليه عنبو مها يحليها بتداوم يلا قومي سيري..
فطامي: امي قتلج مابا مابا يعني مابا ..والي فيها فيها
في هاللحظة كان فهد واعي يتلبس الدريس عشان بيروح الدوام..وسمع صريخ فطامي وراح صوب الغرفة
فهد: شو عندكن مسويات حشرة من الفير
موزة: تعال شوف اختك ماتبى تروح الجامعه
فهد: ليش ماتبين تسيرين الجامعه
فطامي: ماباها مابروح مابروح يعني ماباروح بعد شو..كيفك والا كيفك
فهد: لا سلامتج مابعد شي بس بهالخيزرانه على طول ظهرج
فطامي تناظر فهد وعيونها مليانه دموع بنظرات توسل
فطامي: لالا شو مابتضربني مب كيفك بخبر ابويه ..شوف عمرك انته اكبر عني وثالث اعداي .. وبعد تقولي انا اكمل مابا..عالاقل خلصت ثانوية وبسني
فهد: انا ريال وكيفي ..يلا تلبسي وسيري لا اكسر ضلوعج الحين خوانج اصغر عنج يشوفونج جي كيف تبينهم يكملون دراستهم
فطامي: عادي عيل انا اشوفك جي..بعد وكملت دراستي..
فهد: قومي لا اصفعج الحين ويمد ايده يبي يصفع فطامي وهنيه خافت وقامت تلبست ودموعها اربع اربع وطلعت ويا امها عشان توديها بيت بوخالد وتروح ويا مها الجامعه
في هذا الوقت كان خالد وفهد يالسين يشغلون سياراتهم بيسيرون ديبوت الدوام وفطامي تناظرهم بعيونها جنهن جمر .. وتحس نفسها بتقتل حد منهم وهم قاعدين يسولفون ويضحكون..
موزة : يلا فطامي ركبي عدال ربيعتج مها..
مها: فطامي شوفيج
فطامي: ايه انتي جب محد كلمج..عافانا الله
مها: بسم الله راكبه سيارتنا وتسبيني ماتبين تروحين مب غصب
فطامي: ليش قاللوج ياهل..مابا اروح الجامعه بعدين يلا سكتي..اونج توج اليوم مداومة وتحسبين عمرج جامعية انا مداومة من اول السنة يلا سكتي لا امشع شعرج الحين
بوخالد: حوو شو عندكن تتناقرن من الفير جنكن عدايل اصبحنا واصبح الملك لله..
وهنيه سكتت فطامي ومها ولاواحدة تكلم الثانية ولو مش بوخالد موجودة بيقومن بيمشعن كشيش بعض وبينقع البكـس
فطامي بوزها مادتنه شبر والخشم والخدود والثم الله لا يراويكم صايرات طماطة من كثر ما تصيح..
شوي ويريوس بوخالد بالسيارة خلاص متحرك صوب الجامعه لكنه وقف قرب فهد وخالد بيسلم عليهم وهناك عندهم موزة
بوخالد: هاشباب مداومين
خالد وفهد: هيه ياريال.. اقول وين تبى شالنهن العزبة.. بهالكروزر..
فطامي تطالعهم بنص ..عين وتقول في خاطرها..بعد مب كفاية اني ناشة من الصبح ومداومة بعد رايحة الجامعه بكروزر ومتروس حشيش لين قايل بس ..وهذيلا الاثنين شنغل ومنغل يطنزون من زينهم عاد..والدموع مسويات بحر..
وبوخالد يأشرلهم يسكتون بعد مافيه على حشرت فطامي كفايه انه مسكتينها بالغصب...وتحرك بسرعه وعيون فطامي فعيون امها ..واول ماتحركوا وراحوا
موزة: ااااااه ياخالد وفهد والله انه قلبي يقطعني على فطامي..اول مرة اشوفها تصيح من خاطرها جي ماادري شي صارلها كرهت الدراسة عين عين ماصلت عالنبي..
فهد: امي ودري عنج مب كل ماتدلع بنتج قلتي عين خليها تتادب وتداوم..
موزة: جان زين يابوك دلع .. عالاقل يهون..
هنيه ركبوا فهد وخالد سيارتهم وراحوا الدوام... وفالطريق للجامعه مها تطالع فطامي تريد تكلمها وخايفة والحبيب بوخالد يتحرى عمره بالروغه وقاعد يقصد من فير الله خير ... ومكيف ماشي والجامة مالت الكروزر مفتوح والنسيم ما شالله... وفطامي تطالع السيارات واونها متغشية والدموع بعدهن يغرغرن فعيونها.. ويوم حست نفسها انا وصلت وبدت تشوف سور الجامعه فجت حلجها وااااااااااااء وااااااااااااااااء وتصيح وترفس بريولها ماتبى تنزل وبوخالد مش عارف شو يسوي... مسكتها مها ونزلتها ودخلت وياها الجامعه وراحت مها في حالها نفدت بريشها وعقولتهم الشردة نص المريلة...
اما فطامي فقعدت تبكي بكاء مش طبيعي... ومرت عليها وحدة من البنات كانت معاها ايام الدراسة
شمسة: مرحبا فطامي بلااااااااااااج ويهج منعفس..عشى ماشر
فطامي: شمسة انتي هنيه انتي تداومين فالجامعه؟
شمسة : هيه من زمان ليش انتي ماتدرين
فطامي: لا ماكد شفتج غير اليوم
شمسة: هيه اداوم بس قوليلي شوفيج ويهج وعيونج حمرا شكلك كنتي تبكين
فطامي هنيه حست تخنقها العبرة وبدت تصيح
شمسة: فطامي خلاص عاد خبريني يمكن اقدر اساعدج انا وياج لاتمين تصيحين
حاولت فطامي تهدى خذتها شمسة ودتها الحمام وغسلت وييها وعيونها..عقب سارن الكافتيريا وطلبن ريوق..وهنيه بدت شمسة تسال فطامي عن السبب الي يخليها تبكي..
شمسة : فطامي يلا طمطوم قوليلي شو كان يصيحج
فطامي: ماشي
شمسة : كل هذا ماشي قولي وصدقيني برتاحين
فطامي: شمسة انا ماابا اداوم مااحب الجامعه الجامعه كبيرة وتعبت ومرات احس اني مضيعه مااعرف حد ولو بغيت شي مااقدر وو وايد تعبت والداوم طويل والجدول مش مرتب وابوي دومه مريض مااقدر اركز وانا جسمي هنيه وعقلي وفكري فالبيت بعدين احس شي بداخلي قوة اكبر مني تمنعني اكمل... والكلية مالتي اكرهها احس ان كل امالي تحطمت كل حلمي كان الطب مااقدر ادرس شي ثاني مااقدر
شمسة: الله يهديج يافطامي بس هذا زيغتيني...
فطامي هذا الحين شويةّّ!!
شمسة: فطامي يلا عاد بسج دلع شوفي الجامعه كلنا حسينا انا مضيعين وانها كبيرة بس حاولنا نتعرف على بنات ونمشي امورنا وغير جي الدنيا ماتوقف عند شخص واحد.. اما التخصص واحلامج فمش كل مايتمناه المرء يدركة ودايما خلي عندج التيرناتيف يعني بدائل يعني ماقبلوج طب خلاص خلي عندج بديل... مش كل شي نحصله بسهوله مش كل شي نريدة نحصلة ...فهمتيني
فطامي: ليش ليش شمعنى انا..وايد بنات يدخلون الطب نسبتهم اقل مني بس لانه عندهم واسطة.... وايد بنات جدولهم صباحي وداومهم مريح بس لانهم عندهم واسطة... وايد بنات يروحون الجامعه متى يبون ويرجعون متى يبون..بس لان ابوهم موافق يحطون دريول ليش ياشمسة ليش نحن في فريجنا الحياة غير...شوفي البنات شو يلبسن هنيه انا استحي اشوفهن والله انا اخاف على نفسي... مابا انجرف ..مابا اتغير
شمسة: حبيبي فطامي نحن فريجنا ناس بدوو ومحافظين والجامعه فيها اشكال واوالوان وصحيح منطقتنا بعيده بس قدامنا هدف ونريد نوصله ولازم نضحي عشانه...
فطامي: هدف بعدني لو كنت فالتخصص الي احبه كان عالاقل تحملت
شمسة: والبنات هذولا الي لبسهم وحركاتهم ماتعجبج الله عطاج العقل عشان تختارين الصح احنا شو النا فيهم وهم شو الهم فينا التزمي بلبسج وعاداتج وفرضي اسلوبج عليهم بدل لا يفرضون اسلوبهم عليج فهمتيني..
فطامي: مااقدر والله ياشمسة مااقدر.. واذا انتي صدق تعزيني ابا منج طلب
شمسة : امري ولو كم فطووم عندنا
فطامي: نروح ادارة القبول والتسجيل..يلا نشي عاد هذيه مش من بعدها خطوتين ورى الكافتيريا
شمسة: ها اشوفج تدلين فالجامعه انا الي ماعرف مكان ماقعدت اصيح مثلج..بس ماقلتيلي ليش؟
فطامي: بدون ليش بروح اسحب اوراقي
شمسة: اانتي ينيتي شو بعدين تعالي شاورتي اهلج
فطامي: ضحكتيني من قالج اهلي بيوافقون ومن قالج اني بشاورهم انا تعبت تعتب وايد ياشمسة..
شمسة: استهدي بالله ...وعالاقل صلي استخارة
فطامي: الاستخارة تكون لو كنت مترددة بس انا مصممة اني اسحب فهمتي بتروحين عندي والا اروح بروحي..
شمسة: انزين انا عندي لج حل
فطامي :شو هو رمسي..
شمسة: انتي روحي شاوري اهلج اليوم بانج توقفين كورس
فطامي: كيف يعني
شمسة: يعني كورس واحد اربع شهور ماتداومين وعقب ترجعين تكملين الجامعه
فطامي : مستحيل
شمسة: انتي وقفي كورس اذا حسيتي تبين ترجعين رجعي مابغيتي ترجعين خلاص مش خسرانه شي
فطامي: يلا عيل قومي
شمسة: واهلج
فطامي: شمسه دخيلج انا اعرف ابوي لو اموت مابيوافق بسير وبوقف
وفعلا راحت فطامي مع شمسة ادارة القبول والتسجيل واخذت طلب توقيف كورس كامل وعبت البيانات ولكن الادارة رفضت الموافقة..لحد مايجي الدكتور المسؤول ويقابل فطامي ويقتنع بسبب التوقيف وبعدين يوقع بالموافقة...

::::::::::::: نهاية الجزء الحادي عشر :::::::::::::::::::::

رجعت فطامي للبيت الظهر في باص الساعه 2ونص..دخلت غرفتها ونامت بدون لاحد يدري عنها..ولما صحت المغرب جات امها عشان تتطمن عليها..ولقتها بخير
موزة: ها فطامي.. شو سويتي اليوم
فطامي: حمدالله زين
موزة: يوم اقولج يابنتي داومي ماشي بينفعج غير دراستج..
فطامي: ان شالله
قامت فطامي عن امها وراحت وسوت العشى وتعشوا وبعد العشا كانوا يشوفون التلفزيون ويسولفون وفجاة صرخت فطامي..
فطامي: لااااااااااااا آآآآآآآآآآآء
وقعدت تتجلب وتصرخ واخوانها حولها وامها وابوها مش عارفين شو صار فجاة و بدون سبب.. وفطامي تصرخ وتصرخ وشوي تبكي وشوي تتقلب ومحد عارف شو فيها ..وناصر مسكين قاعد يحاول يهديها واحيانا يقرى عليها بس ماشي فايدة فطامي على حالها وتبكي وتبكي وتنفجر من البكي..
ونامت مكانها وهيه على هذي الحاله..
وفاليوم الثاني الصبح
موزة: امي فطامي انتي بخير...شو ياج البارحة
فطامي: ها امي..مافيني شي
موزة: يعني تقدرين تروحين الجامعه
فطامي اول ماسمعت ذكر الجامعه رجعتلها الحاله الي كانت عليها امس وقعدت تصرخ وتبكي بدون وعي
وموزة تقول الله ياخذ الجامعه وطاري الجامعه بنتي بتروح بين ايديني وانا مش قادرة اسوي الها شي..وراحت حق ناصر..
موزة: الحقني ياناصر فطامي فطامي بتروح من بين ايدين
قام ناصر وتحامل على عمره..وراح ولمن شاف فطامي قعد يبكي من بكاها كانت تأن بحرقة ومحد عارف شو فيها ولاحد يعرف شو السبب الي يخلي فطامي تبكي بهالطريقه مش معقول ان السبب هو الجامعه بس.!!.
قعد ناصر يقرى علي بنتة ويسمي عليها وهدت شوي ورجعت تنام..
وظلت فطامي على هالحال قرابة الثلاث ايام بدون تطور في حالتها بالعكس كانت كل ماتمر الايام تدهور حالتها المستشفى يقول مافيها شي ..ولكن حالتها تقول غير هالشي ..
محمد كان يتصل ومحد يرد عليه يقول معقول فطامي للحين زعلانه معقول صارت قاسية لهذي الدرجة... وقلبه قابضنه يحس انه شي صاير لفطامي..يحس احساس غريب..بس شو يقدر يسوي..مابيد حيلة ..قعد في غرفته رايح راد..وينتظر المسا بفارغ الصبر لانه قرر يروح صوب بيت فطامي عالاقل اما يمر قدام البيت او يمشي فالسكة يمكن يلقى شي يطمنه عن فطامي
موزة مش عارفة شو تسوي اذا فطامي ماتبى تروح الجامعه خلاص لا تروح المهم ترجع طبيعيه ..ولكن حتى لمن عرفت فطامي ان اهلها موافقين ماتروح الجامعه ماتحسنت حالتها والمستشفى ماسوى لها شي..
محمد انتظر لحد المسا تلبس وطلع من بيتهم وبسرعه البرق دخل فالسكة ومشى فالسكة قرب المطبخ وحاول يسمع شي يلمح شي مافي فايدة.. اما موزة فاتصلت باختها وقالت الها عن حالت فطامي..وهنيه اقترحت خالتها انهم يودونها عند مطوع.. لكن موزة قالت انها ماتعرف مكان هذا المطوع فقالت الها اختها انها بتخلي عوض يوديهم.. وفي اليوم الثاني الصبح
عوض شل الدنيا لمن عرف انه فطامي تعبانه وعلى طول مسك الخط رايح بيت خالته... ولمن وصل قعد يصارخ ليش تغصبون فطامي عالجامعه وهيه ماتباها شو هذا البنت بتروح من ايدينا وتفكيركم هو السبب..
وقام وخذ خالته وفطامي وراح عند المطوع..ولمن وصلوا ..عند المطوع نزلوا وعوض رفض ينلزن موزة وفطامي بروحهم وقال الا يدخل معهم.. خصوصا ان فطامي ابدا مش صاحية..كانت حاطة راسها على ريول امها ..
دخلوا عند المطوع وخبروه عن السالفة فقام المطوع بيحط ايده على راس فطامي ويقرى عليها لكن عوض قاله اصبر وفصخ غترته وغطى فطامي بالرغم من انها متغطية بشيلتها وعباتها... وبعد ماقرى عليها قام وياب ورقتين وشخبط فيهن وقالهم وحدة دخنوها فيها والثانية حجاب حطوها تحت المخدة
عوض لمن سمع هالكلام ثااااااااار دمة.. ويشل بنت خالته لاحية ولاميته بين ايديه ويطلع من عنده ويقوله خل حجابك حقك يلا خالتي طلعي..
وفالسيارة
موزة: عوض شفيك عالريال
عوض: انتوا الي شفيكم متى بتفهمون حرام هذا حرام شو حجاب ماحجاب شو هالتخاريف وتدخن ماتدخن..
المطوع اذا مايعالج بالقرآن يقعد في بيته احسن..كل هذي الاشياء شرك وحرام...وفطامي ماعليها شر ان شالله..انا اعرف كيف اعالجها..
موزة: انته؟
عوض : هيه انا فطامي من اليوم ورايح ماراح تروح الجامعه الا اذا هيه طلبت هذا الشي...ولو فكرت فطامي تروح الجامعه تحطولها دريول يوديها وييبها مش كل يوم تروح آخر الدنيا بالباص وتقعد لين تالي الليل ..الي اعرفه فطامي ماقصرت عليكم بشي فالبيت مستخسرين عليها حياتها..وهذا فهد ماله شغل فيها يبى يربي يربي نفسة بالاول
موزة: شفيك عوض عليه..
عوض: السموحة خالتي..بس تشوفين حال فطامي والله الي يشوفها مايقول فيها عرق حي..حرام عليكم والله حرام عنبو مافي قلبوكم رحمة..كل شي عندكم اوامر وتنفيذ بس !!

وصلوا البيت ونزلوا فطامي وصلوها الغرفة وهي نايمة.. وظلت على حالها اسبوع وفي هالاسبوع اتصل المسؤول عن التوقيف على بيت فطامي وردت امها عليه وطلب فطامي..المسؤول مايروح جامعة البنات غير يومين فالاسبوع وهو ياي مخصوص عشان فطامي ولكنها ماداومت.. وعشان هالسبب اتصوا ..المهم موزة خبرتهم بالظروف وحالة فطامي.. وبهالطريقة تفهموا الموضوع وتم توقيف فطامي كورس دراسي كامل مدته اربع شهور..
وبعد ايام بدت حالة فطامي تتحسن..خصوصا انها حست بان امها وابوها قربها..وكانت المرة الاولى الي تحس منهم بنوع من الاهتمام ...
واول مابدت تتعافى اتصلت على محمد..محمد الي عاش طول هالفترة لاحي ولاميت بس يبى شي أي شي يطمنه عن فطامي..لو يدفع عمره كله المهم يطمن عليها..
فطامي: حمودي
محمد: آآآآآآآآآآآآآآه آآآآآآآآآآآآه ياعيون حمودي... عنبو ياعمري ليش تسوين فيني جي حشى شهر مارمسج عمري شوفيج... والا بعدج زعلانه
فطامي: لا ياعمري انا فيني حيل للزعل الحين
محمد: بسم الله عليج ياروحي شوفيج
فطامي: ماشي صارلي جيه وجية
محمد: يابعدي في عدوينج ان شالله ياقلبي.. ماعليه عمري ان شالله دراستج بترديلها اهم شي صحتج الحين
فطامي: صدق والله ياحمودي يعني حياتي وصحتي تهمك انته وابوي وامايه
محمد: اكيد فديتج... وهم ضغطوا عليج مب لانهم مايحبونج بالعكس لانهم خايفين على مستقبلج..
فطامي: خلاص محمد طب السالفة كلمني في شي ثاني
محمد: فطامي عيوني لاتزعلين مني صحيح ابويه مب راضي يروح بيتكم يكلم ابوج..بس والله ياغناتي خلاص مايهمني احد لو تبين بيي بروحي..المهم ماتزعلين..والله انج يافطامي وردة في حياتي كل ماتكدرتي او تعبتي حسيتها ذبلت..
فطامي: ياقلبي ماقصدت جي انا والله ..بس ياعمري نحن لازم نسوي حدود لعلاقتنا..لان ابوك مش مقتنع فيني ..ودام السالفة جي لازم نقطع العلاقة لان الي قاعدين نسوية مب صح
محمد: فطامي حرام عليج شو تقولين عقب كل هالسنين عقب كل الي بنيته وادمر ورجعت ابنية من الصفر.. عقب كل الي شفناه وتحملناه تقولين نقطع علاقتنا والله مايكون..لو نظل طول عمرنا بدون زواج.. بتمين حبيبتي
فطامي: ياعمري الزمن تغير ونظرت الناس تغيرت ومب كل مرة تسلم الجرة
محمد: فطامي دخيلج ترى امي يات عندكم وكلمتكم وهذا اكبر دليل اني مااقص عليج بس ابوي شو اسوي فيه..
فطامي: انا ماقتلك تقص علي ولا اباك تسوي مشاكل ويا ابوك بسببي انا ماصدقت تهدى الاوضاع المهم اقولك انسى الموضوع احسن لان الكلام فيه مابيجيب نتيجة..
وفعلا استسلمت فطامي للامر الواقع.. ومحمد كذلك على امل انه ايي يوم ويحن قلب سالم ويروح ويكلم ناصر في موضوع فطامي ومحمد ويتزوجون...

:::::::::::نهاية الجزء الثاني عشر ::::::::::::::::

فطامي فالبيت لا شغله ولا مشغلة ..ملانه وبروحها اخوانها فالمدرسة الدنيا تغيرت واخوانها كبروا خصوصا انا صرنا في السنة الخامسة يعني 2001 وهنيه نذكر سالم الي صار عمره 13 هو حاليا فالال اعدادي وسلامة اخت فطامي الي اصغر منها على طول وصارت ثانوية عامه..اما هيفا فصارت في الصف الاول ثانوي في حين روضة صارت فالخامس واخيرا نورة آخر العنقود والي صارت فالصف الثالث ابتدائي..

في يوم من الايام فطامي قاعده بروحها فالبيت زقرها ابوها ناصر يبى يكلمها وطبعا مافيه شدة قاعد فالفراش..
ناصر: شوفي يابنتي فطامي..انتي الحين بنتي العودة وتشوفين مافيني شدة..واباج تساعديني يابنتي مابا منة الناس عليه.. وتشوفين حالتي وحالة اخوانج وانا دام الله مقدرني ماراح اقصر عليكم بشي.. وتحمليني ..انا تمنيت انج كنتي ولد ينشد فيه الظهر..وسامحيني لو اعتبرتج ريال فهالبيت واباج تتحملين مسؤولياته من اصغرها لين اكبرها..واباج تتحملين مسؤولية اخوانج..وتصيرين انتي المسؤول الاول والاخير عنهم..زمنا يابنتي تغير عن زمنكم ويمكن انتي كنتي دايما قريبة منا انا وامج وتحملتي لكن اخوانج طلعوا على زمن غير.. وتفكيرهم غير عن تفكيرنا ولو كلمتهم في شي بيزعلون وحتى طلباتهم صارت غريبة..
فطامي: افا عليك يابوي انت الخير والبركة..
ناصر: فطامي انا ماريد احرمج من حياتج لكن انا ابوج وحقي عليج تساعديني
فطامي: افا عليك ابوية الله يعطيك الصحة والعافيه واخواني والبيت لا تشيل همهم انا قدها وقدود
ناصر: الا اقول ابوية فطامي الحين انتي كم استوى عمرج
فطامي: اممم تقريبا توني دخلت ال19
ناصر: يعني ترومين تقدمين على ليسن
فطامي: ها مادري ابوي يصير خير يلا تامرني شي
ناصر: سلامتج يابنتي
طلعت فطامي..وهيه تكره انه ابوها يكلمها في سالفة الليسن.. وهيه طالعه من عند ابوها شافها فهد توه راجع من الدوام.. وناداها..
فهد: فطامي شو تسوين مشغوله؟
فطامي: لا اخويه بغيت شي
فهد: هيه اباج في موضوع
فطامي: ان شالله..
راحت فطامي عند فهد الغرفة سكر الباب وبدى يكلمها
فهد: فطامي شوفيه ويهج معفوس ومضيجة لاتقوليلي مليتي وتبين تردين الجامعه
فطامي: لا والله بس مستغربة منك
فهد : مني انا ليش
فطامي: يعني انته الحين المفروض تكون ريال البيت وشال المسؤولية واشوف العكس صاير المسؤوليه كلها على راسي..انت مب صغير الحين بتكمل ال23 سنة ليش تسوي جي..وبعدين ابوي الحين يقول انا لازم اخذ ليسن يعني عاجبنك؟؟
فهد: شوفي فطامي.. بالرغم من كل الي صار بينا ادري انج كبرتي وعقلتي هذا شي.. الشي الثاني انا مااقدر اتدخل في أي شي فالبيت تدرين انا اظل غريب ولو سويت شي خواتج الي من ابوج وحرمة ابوج ماراح يرضون لاني اظل غريب في نظرهم ومها صار ومهما استوى انا مااشل اسمكم ولا انتم تشلون اسمي..واذا على سالفة الليسن انا بعد رايي من راي ابوج خذي الليسن مافيها شي تسدين نفسج وخواتج..
فطامي: معقول يافهد انا اول مرة اشوف ابو واخو يغصبون اختهم تاخذ الليسن
فهد: وانا اول مرة اشوف وحدة اهلها راضين تاخذ الليسن وهيه رافضة..المهم خلينا من هذا الحين بغيتج في موضوع
فطامي: تفضل..!
فهد: شوفي يافطامي مثل ماسبق وقلتي الحين انا مب صغير وابوي كلمني في موضوع الزواج..يباني اخذ وحدة من بنات عمي..بس انا ماريد
فطامي: وليش
فهد: ابا اعيش هنيه عندكم في بيت امي ولو خذت وحدة من بنات عمي بضطر اني اعيش في بيت ابويه او فبيت بروحنا
فطامي: والحل يعني
فهد: ماشي حل دوريلي حرمة من فريجنا وترضى تعيش ويانا فالبيت او حتى وحدة من ربايعج
فطامي: طيب شو مواصفاتها..
فهد: أي شي المهم مااخذ بنت عمي
فطامي: يافهد ياخوي مايصير الزواج عشرة عمر.. وانت تعبت وايد في حياتك متلته بين امك وابوك لازم تختار الزوجة الي تقتنع فيها بتريحك بعد هالعذاب كله
فهد : خلاص شو رايج بتزوج مها
صرخت فطامي
فطامي: مهااااااااااااا ماغيرها
فهد: هيه مها ماغيرها بنت جيرانا واخت خالد..ليش فيها شي
هنيه فطامي ضحكت ضحكة قوية وبسخرية
فهد: بلاج تضحكين مااذكر اني قلت شي يضحك
فطامي: اضحك على الدنيا الغريبة..في يوم من الايام انا وانت وخالد ومها كنا مثل الاخوان ومن سابع المستحيلات انه واحد فينا يفكر فالثاني كزوج واليوم خالد قلب الدنيا لاني رفضته وانت تبى تزوج مها معقول وين احساس الاخوة الطاهر
فهد: خلينا من هالكلام الحين شو رايج
فطامي: هذي حياتك وانت حر فيها..بس الي سمعته انه في ناس متقدمين لمها من طرف وحدة ربيعتها وباعتقادي الللية بيروحون يخطبون ..لكن ماادري اذا اهل مها موافقين او لا..
فهد: مش مشكلة انتي كلمي امي تروح تخطبها... بس قبل اقنعي امي تكلم ابوي عشان يوافق اني اتزوج غير بنت عمي بعد تعرفين ابوي محد يقدر ييب راسة غير امي
فطامي: ان شالله بغيت شي ثاني..لامشكورة سيري حطي الغدى
فطامي: ان شالله

قامت فطامي وراحت تحطت الغدى حق فهد وهيه تفكر في حال الدنيا الغريب...وتفكر في نفسها واخوانها الي صارت مسؤولة عنهم حتى فهد الي هو اكبر منها وامها وابوها وزوجة ابوها حست انه الكل في رقبتها.. ومن يومها قررت تكون مسؤولة عنهم وعن البيت خصوصا انها فاضية واهم شي اخوها سالم واخواتها ماتريدهم يحسون بالي عانت منه ماتريدهم ينحرمون من شي.. حاولت تعوضهم حنان الام بالرغم من ان امهم موجودة لكن بما ان ناصر تعبان فهو محتاج احد يراعيه اكثر من الاولاد نفسهم وفعلا اهتمت فطامي باخوانها وبدراستهم.. واخلاقهم وكل شي...وكلما كانت تشوفهم يكبرون قدام عينها بدون لا يقترفون خطا هيه ارتكبته يوم من الايام كانت تفتخر ان هذولا اخوانها هذولا هم تربيتها
اما بخصوص فهد ..فعلا فطامي كلمت امها وامها بدورها كلمت ابو فهد.. وبطلوع الروح اقتنع.. وراحوا وخطبوا مها بالرغم من الناس الي متقدمين لها..الا انها وافقت على فهد ومحد غير فهد.. وفي هذا الوقت بدت فطامي..تنشغل اكثر بالتجهيز لزواج فهد..وكانت دايما تطلع السوق مع فهد ومها عقب الملجة عشان يحضرون للعرس..بدون لاتحس بالفراغ الي تركته الدراسة في حياتها...

:::::::::::::نهاية الجزء الثالث عشر ::::::::::::::::::::

************************************************** *****
الكل مشغول بالتحضير للعرس بالرغم من انه العرس تقرر موعدة يكون في شهر ثمانية وخالد مش مقصر مع فهد باي شي وفي يوم من الايام كانوا رايحين ياخذون اثاث حق البيت من الشارقة وفالطريق..
فهد: ها ياخالد متى بنفرح فيك
خالد: ليش نسيت اني متزوج
فهد: لا مانسيت بس بالله عليك تسمي هذا زواج
خالد: يلا ماعندي شي اخسرة يوم بشبع منها بطلقها
فهد: ياخالد بنات الناس هب لعبة... وهذا مايتسمى زواج لا طعم ولا ريحه انت ماتحبها واهلك مايدرون بزواجك لين متى ؟؟ ماتبى تستقر ماتبى تيب عيال؟؟
خالد: استقر ليش هيه اختك خلت فيها استقرار
فهد: ياخالد فطامي تغيرت وكانت ياهل.. وهذيج السوالف ودرتهن.. انت بس طلق وان شالله نفرح فيكم انته وفطامي
خالد: فهد واللي يرحم والديك سكر عالموضوع انا طلاق بطلق لاني اساسا مش مقتنع بهالزواج...لكن اني ارجع لفطامي ..او اني اتزوج زواج رسمي وعرس وفرح هذا من سابع المستحيلات
فهد: الله يهديك بس.. وحياتك حرام انت بعدك شاب
خالد: شوف فهد... انا اشتغل وحمدالله مستورة فالجيش وثانوية عامة تراني مسجل منازل الله يستر ويسهل هالسنة وانجح..والحرمة بطلقها مافيني على ويع الراس ابا اركز فالثانوية عنبو هذي ثالث سنة اعيدها
فهد : هيه والله حتى سلامة السنة هذي ثانوية عامه يالله الله يوفقكم وتنجحون
خالد: ان شالله..سلامة بعد مش مقصرة تطرشلي مذكرات وتعطيني الحلول وان شالله معزم هالسنة انجح وبنسبة وادخل الجامعه بعد
فهد: اووووب اوووووووب شو هالتطور مرة وحدة
خالد: ليش تشوف ناقصني شي..
فهد: لاحشاك الله يوفقك...

ووسط الترتيبات للعرس ... ووسط انشغال سلامة اخت فطامي وخالد بالثانوية ..كانت العلاقة بين محمد وفطامي.. في قمة حلاها.. والحب الي بينهم كان يكبر يوم عن يوم.. مرت ايام الدراسة للثانوية ومابقى للامتحانات غير كم يوم.. وفي يوم واحد ستة اليوم الي عمره ماراح ينمحي من ذاكرت وقلب فطامي ومحمد كانوا يرمسون ..
فطامي: حمودي تدري كل ماتمر الايام كل مايزيد غلاك ياقلبي..
محمد: وانتي اكثر ياعمري..تدرين اباج الحين تسمعيني يكون هالليل النا انا وانتي ابا ارسم وياج حياتي وحياتج احلامي واحلامج ويكونن واحد ويكون اخر بعد فالكون بالنسة لج هو انا واقرب شي فالكون هو انا ابا حدود حياتج كامله مايكون فيها غيري...وحدود حياتي كامله مايكون فيها غيرج
فطامي: ان شالله ياقلبي..
محمد: شوفي فطامي بعد عرس فهد على طول نحن لازم نعرس... ومن الحين قولي لي وين تبين نسكن في بيتنا في شقة او في بوظبي
فطامي: حووو شوفيك ماصار شي رسمي
محمد: قولي عشان الحق ابني النا قسم فالبيت اذا تبين تسكنين عندنا
فطامي: شوف بالرغم من انه ابوك مايطيقني بس لو صار وتزوجنا انا ابا اسكن وياكم فالبيت مااريد اسكن في بوظبي مااتخيل اطلع من العين.. وبعدين مااحب الوحدة احب اللمة والعايلة...
محمد: غناتي الي يريحج.. واذا تبين ربيعي بيتزوج وقاعد يبني فله الحين ..عادي انا اخذ النص الثاني وابنية لج وبكذا نكون بروحنا ونفس الوقت مانطلع من العين ولو حسيتي بوحدة تقدرين تروحين ويا زوجته..
فطامي: يصير خير
محمد: وعن الدراسة انا بحاول اكمل في جامعه خاصة بس بعد الزواج لاني حاليا ماريد اصرف أي مبلغ اجمعه وعقب الزواج بحاول اكمل دراستي... اما انتي.. بكفيج..انا ماراح اقصر عليج بشي اذا حبيتي تكملي دراستج كان بها مابغيتي ..انا ماراح اغصبج..واوعدج انه ماراح يقصر عليج شي..
فطامي: محمد تصدق مشتاقه لك وايد ياعمري والله
محمد: غناتي فديتج وانا اكثر والله احسني بصيح عنبو يالدنيا كيف قاسية تذكرين متى اخر مرة شفتج
فطامي: تصدق مااذكر... ههههه حشى من كثر ماطولنا ..بس تعال شو تغير فيك
محمد:ولاشي زاد وزني
فطامي: كالعاده لاجديد..دب دب دبدوب
محمد: اقول فطامي حبيبتي..اليوم كنت في دبي اتمشى ويا ربيعي ومرينا محل وشفت ملاااااابس خبال ..من اليشمك ورحت وخذت لج كندورة تخبل... وانا ظاهر لقيت محل اطقم جي كريستال وخذت لج طقم اكسسوارات نفس لون الكندورة ...خاطري اشوفهم عليج
فطامي: اونه اونه متفيج اسميك..
محمد: والله ياعمري انتي بس اطلبي تمني كل الي تبينه الي اقدر عليه والي مااقدر عليه بيب لج انا كم فطامي عندي..
فطامي: فديت روحك ياقلبي وشو المناسبة
محمد: وفي مناسبة اغلى من ذكرى هاليوم ياقلبي
فطامي: هيه والله ياقلبي فديت روحك انا ياعمري فديت حسك فدييييييييييييتك
محمد: بس يابوج خفي عليه..يلا سمعي الحين بطرش احمد ييبلج الهدية ويا صلاة الغرب عشان محد يشوفه تدرين الكيس كبير ..لا بعد احمدووة مب هين صاير مب راضي يروح صوب بيتكم اونه كبر ويستحي... ويالله ياخوفي يكون صدق كبر ويفهم وانا مابيستوي عندي طريقة اوصلج الاغراض
فطامي: هههه دورلك راعي دكان ثاني والا اقولك الحين الدور عالخدامات
محمد: لا لا دخيلج عاد الخدامات ثرثارات باجر بتلقين السالفة في كل الفريج
فطامي: صدقك والله يلا عيل اجلب ويهك بروح اتريا احمدووة فديته
محمد: طالع هاي تتفدى اخوي جدامي صدق ماتستحين
فطامي: حوو ايه انته ياهل هذا ياهل ..
محمد: ادري انزين بس بعد اغار..
فطامي: اونك انته المهم يلا متشوقة ابا اشوف الهدية يلا بااااااااااي
وطراخ فالوية قبل لا ايرد محمد وكالعاده يقول في خاطره هذي متى بتتعلم تكون رقيقة مثل البنات متى بيستوى عندها برستيج الله يصبرني عليها ... وربي احبها..
وصل احمد بالاغراض ..وخذتهن فطامي وركضت الغرفة ولبست اللبس وطلع يجنن عليها وطبعا الدنيا حر واللبس للمناسبات لفت الاغراض في الكيس وحطتهم مع باقي الهدايا الي كانت توصلها من محمد..
وبين سوالف محمد وفطامي... بين تجهيزات فهد ومها... وبين امتحانات خالد وسلامة ... اسدل الستار على السنة الخامسة من احداث جرح الزمن... ومازال للجرح بقية (2000-2001)

::::::::::::: نهاية الجزء الرابع عشر ::::::::::::::::::::::::

مرت ايام امتحانات الثانوية على خالد وسلامة بكل خير... سلامة كانت تدرس بجدية..فالوقت الي حاولت فطامي قد ماتقدر تهيأ لها الجو المناسب عشان ماتمر سلامة بالي مرت فيه فطامي بالرغم من انه سلامة قسم ادبي.. اما خالد فكان الغش عنده شغال.. ماتعب نفسه راح وخذله سماعه مخصوص عشان يغش ومها كانت تنقله اول باول وحمدالله انه محد كشفة او مسكة والا كان راح فيها..وخالد مش غبي عشان حد يمسكة كان مرتب امورة فاختار لجنه بعيده وقرر يمتحن في منطقة "الوقن" عشانها بعيدة واي مسؤول من الوزارة مايكلف نفسه يضرب خط لان المنطقة نائية.. خلصت الامتحانات على خير والكل في انتظار النتايج..
الكل على اعصابه..قامت فطامي من نومها مبكر عشان تنتظر نتيجة اختها سلامة... واول مافتحت باب الصالة طالعه من غرفتها لقت امها وسلامة وخالد موجودين قرب التلفون..ينتظرون صديقة سلامه تطلع النتايج من الانترنت والكل على اعصابه..طبعا خالد مايعرف احد فالثانوية لانه منازل ف اول ماقام من النوم راح بيت فطامي لانه يدري انه حد بيطلع نتيجة سلامة فقال بيطلعون نتيجتي وياها.... وبما ان فطامي ماتكلم خالد ظلت واقفة عند الباب تنتظر معاهم وهنيه رن التلفون وكانت صديقة سلامة الي متصلة فخبرتهم انه خالد نجح وياب نسبة 77 ولمن درى خالد صرخ بكل مافيه من حيل ونط نطة لدرجة انه لمس السقف من الفرحة وسلامة تنتظر وخبروها انها يابت نسبة 74... قالت حمدالله على النجاح مع انها في داخلها مقهورة الحين خالد التعبان الي كان يغش خذ نسبة اعلى منها يلا مب مشكلة..المهم انها يابت النسبة الي تدخلها الجامعه... طلع خالد رايح بيتهم بعد مابارك لسلامة.. اما فطامي ف حتى ماقالت له كلمة مبروك راحت وباركت لاختها..ودخلت غرفتها...

بعد ما الكل تطمن على خالد وسلامة..بدى التجهيز حق العرس.. عرس فهد ومها.. وهنيه قررت فطامي ووعدت فهد انه عرسة يكون اكبر عرس ويظلون اهل الفريج يتكلمون عنه لبعد عشر سنوات..واصرت انه العرس يكون فالفريج مايكون في صالة او فندق..عشان يحسون بطعمه..
فطامي مرتبشة تجهز صديقة العمر مها الي بتصير زوجة اخوها فالمستقبل... اما خالد وسلامة مشغولين فالتسجيل فالجامعه ..سلامة دخلت كلية العلوم الانسانية..و خالد دخل كلية التربية... ومن هنيه كلن بدى مشوار حياته على حدة...
فطامي من قلبها كانت تجهز لفرح خالد..وكانت مسؤولة عن كل صغيرة وكبيرة من نوعية الخيام واختارت البداد والفرقة وزهبة العروس وغرفة النوم وكل شي..اهتمت فيه وكانه زواجها هيه..بغض النظر عن شوو سوى فيها فهد.. المهم انه يكون فرح ماينسى طول العمر لاخوها الغالي.. اما محمد فكانت تكلمة بين فترة وفترة...ولاشي فبالها غير زواج فهد.. لحد ما جا يوم العرس...

الكل مربووووووش خيام وعياله وناس وعالم.. والبنات طبعن كلهم رايحين الصالون .. ماعدا فطامي الي قررت تقعد فالبيت ..عشان لو احتاجتها امها في شي... وعشان جذا جابت الها كوافيرة تعدلها فالبيت..اما مها راحن معاها خواتها وخوات فطامي... وبعد ما وصلن البنات دخلت فطامي الخيمة وسلمت عالحريم وركبت الكوشة... وكلمت المسؤولة عن الاغاني وطلبت اغنية راشد الماجد مشكلني والخيمة بتتشقق من الدق والطبل وفطامي مسوية جو جنان عشان يدخلون العرووس وبعد دقايق دخلوا مها وكانت قطعه مثل القمر...وطبعا مهره الي دخلت مها...
قعدت مها عالكوشة وقامت فطامي حطت اغنية شرين وجدي أه ياليل والرقص والدق لدرجة انها فطامي سحبت مها ترقص معاها... قعدن يرقصن وجان تشوفهن موزة وتي تركض
موزة: حوو بنات شياكن تخبلتن عروووووووووس ترقص وين عايشين نحن
فطامي: امي بلاااااااج خلينا شو علينا نحن فرحانين نرقص ياخي عروس هذي ليلتها خليها تفرح
موزة: يابنتي الناس بيتكلمون علينا بيقولون شو ماصدقت انتي ماتشوفين العرايس مبوزات زين مايصيحن وحرمتنا ترقص!!
فطامي: اخييييييييييج يامي انتوا مال اول برايهم اقول امي خلينا نرقص حد ماخد منها حاجة
وفعلا ردت شغلت فطامي نفس الاغنية وكملن رقص فطامي وخواتها ومها مسكينه مربوشه وياهن زين ماطاحت طرحتها من هذاك الرقص.. ومن يسمع اغنية شرين ومايرقص..!!

وبعد ساعه ... قرروا يدخلون فهد الخيمة عشان يصور ويا العروس... وفهد مستحي وصاير طماطة وقاعد برى الخيمة مش راضي يدخل وموزة مش قادرة تقنعه..
قامت فطامي وراحت عشان تزفة داخل الخيمة والحبيب فهد متمسك في خالد كانه ابووه اونه يستحي يدخل الخيمة وهوريال واحد بروحة..
وطبعا فهد عليه حركات يبى يجمع فطامي وخالد باي طريقة..ولمن طلعت فطامي عند الباب مسكت فهد من ايدة تسحبها
فطامي: فهد امحق معرس عنبو شو يستحي بك اخييييييييييج عالرياييل .. بتدخل والا اسحبك غصب..
فهد: لاااااااحول يلسي فضحتينا بدخل بدخل..خالد تعال وياي..
وفعلا قام فهد ومسك خالد بايدة اليمين ومسك فطامي بايدة اليسار ودخلوة الخيمة ولمن وصلوا الكوشة فهد سوى حركة نذاله ..فج ايد خالد وايد فطامي وشبكهن في بعض وركض على درج الكوشة رايح صوب العروس
فطامي لمن شافت ايدها فايد خالد فجتها بسرعه البرق مثل الواحد لمن يلمس شي حرقة وخالد نفس الشي وفطامي تقول في خاطرها بلاه اخوي تجنن هالكثر ماثر عليه العرس... المهم طلعوا خالد وفطامي عالكوشة والكل قعد يصور وبعد دقايق طلع خالد من الكوشة... عشان قرايب فهد ياخذن راحتهن فاللبس اما فطامي فاستغلت الفرصة وخلتهم يحطون اغنية ميحد حمد (حنا عرب زايد اذا

تبغي العلم )ومسكت العصى وقعدت تيول وساحبه فهد معاها.. لحد مادار راسها وفي هاللحظة ياتها موزة تركض
موزة: فطامي بلاااااااج مستوية خريش اليوم يابنتي عقلي عقلي العقل زينه والناس ماتعطي خير
فطامي: امي بلاااااااااااج عرس اخوي خليني افرح
موزة: فرحي بس مب جي يلا لفي شعرج ونزلي تحت ويلسي ع الطاولة وتعشي وان شفتج عالكوشة تراقصين فوق ياويلج مني..
فطامي: ( ماده بوزها شبر ) انزين خلاااااااااااص توبه..
نزلت فطامي من ع الكوش والخيمة فل بالحريم ومب لاقية حتى طاولة تقعد عليها ومن بعيد شافت شيخة ام محمد قاعده بروحها وراحت وسلمت عليها ويلسن يسولفن وبالرغم من الدق والطبل والحشرة الي فالخيمة الا ان شيخة ارتاحت لفطامي وفضفت لها عن كل الي فقلبها وكانها ربيعتها مب وحدة قد بناتها.. فطامي حبوبة وتنحب بسرعه وتدخل القلب من غير استاذان حتى ان شيخة حبتها ولو ان محمد مايباها كانت بروحها خطبتها لمحمد.. قعدت شيخة تسولف لفطامي كانها تعرفها من زمان لدرجة انها سولفت لها حتى عن مشاكلها هيه وريلها سالم..
الناس تعشت وروحت... والعروس خلصت تصوير وصار لازم تنزل عشان الزفة... وفطامي مشغولة ويا شيخة ..تكلمها.. لازم هذي عمة المستقبل
اما برى الخيمة هناك فهد مسولهم قضية يبي يسوي زفة لكن ابو مها مش راضي لان باب بيت مها وبيت فهد بينهم اقل من خمسين متر يعني مايحتاي زفة ...بس تطلع من الخيمة وتدخل البيت...وابو مها مافيه على عوار الراس خصوصا ان الشباب مايصدقون تستوي زفة الا قامو يحرقون التواير ويصيحون ويلات ..ومافيه عالحشرة والا انه حد يسوي حادث..لاسمح الله
الدنيا مخبوصة ومها مسكينه ينزلونها من الكوشة عشان الزفة ويرجعونها مرة ثانية مب كنها عروس كنها قطوة رايحة راده..
فطامي استاذنت من شيخة ولبست عباة الراس فوق لبسها وطلعت بتشوف السالفة .. ولقت فهد خلاص بيصفع أي حد جدامه وعيونه صايرات جمرة..وكانه حابس دموعه.. سارت صوبه وقالتلهم خلونا بروحنا انا واخوي.. وفعلا الكل راح وخلوهم بروحهم
فطامي: فهد بلاك شو مضيجبك حرام فديتك تضايج هذي ليلة العمر
فهد: وهم يخلون حد يستانس شوفي ربعي مجهزين سياراتهم بيزفون ..وابوها مش راضي..شو اسوي حتى ليلة عرسي بينكدون عليه
فطامي: بس هذا الي مضيجبك ولايهمك خله عليه انا المهم انت ماتضايج خصوصا اليوم ولاتضيع تعبي بلاااااااش بس قولي فاي سيارة بتزفون مها في سيارتك..؟؟
فهد: لا انا بركب ويا خالد ومها وامي ويانا..
فطامي خلاص ثواني... خله كله علي روح اركب السيارة وجدمها عند باب الخيمة وخل الباقي عليه

راحت فطامي عن فهد في طريقها صوب ام مها وابو مها
فطامي: عمي وعمتي شوفوا كله ولا فهد يوم عرسوا عيالكم مااذكر انه حد تدخل والحين مها حرمة فهد وهو صاحب العرس وهو حر يزف حرمته والا لا ولو سمحتوا ماابغي حد ينكد على اخويه في ليلته اخزوا بليس وخوزا عن دربة.. طبعا ابو مها وامها يعزون فطامي وايد لكن بعد ماعجبتهم الرمسة سكتوا عن فطامي وراحوا فالوقت الي راح فهد وكلم خالد والشباب يتجهزون وركب فهد ويا خالد وجدم الاستيشن مالت خالد صوب باب الخيمة..
دخلت فطامي الخيمة ونادت مهره ونزلن مها من ع الكوشة وغطنها بالعباة وطلعنها برى عند السيارة ..فطامي فتحت باب السيارة الي ورى عشان تركب مها على اساس انه فهد وخالد جدام لكن فهد صرخ على فطامي
فهد: حووو وين تبين هاتيها جدام
فطامي: حوو انته وين تبى وين احطها على راسك تراكم انتوا جدام خالد يسوق وانته عداله
فهد: مالج شغل هاتيها
فطامي: الحين انا مالي شغل صدق دنيا... انزين انزين بيبها
وفعلا سارت فطامي وفجت باب السيارة الي جدام عشان تركب مها.. اما فهد مستوي قطو راكب على صندوق الشريطات الي بين الكرسيين يعني قاعد بين مها وخالد وفطامي تقول في خاطرها حمدالله والشكر صدق العقل زينه عنبو مب عرس هذا الي خبل فيك.... ركبت موزة ومهره معاهم وخوات فهد والسيارة صارت فل وفطامي برى جنها طرارة لا ومش بس جذا لمن سكرت فطامي الباب خالد شحف التاير وسوى صوت خلى فطامي ترد عشر خطوات ورى وهيه في خاطرها تتحلف الهم .. اما هم فيضحكون عليها وهيه قاعدة تحترق من الضيجة و تحركوا وعطوا اشارة حق سيارات الشباب يتحركن وراهم وبدت الزفة
وفطامي مسكينه تحوط فالشارع ...الكل روح وهيه الي سوت هذا كله اخر شي معقوقة في الشارع وتتحرطم في خاطرها وتقول صدق نذاله عنبو انا انا فطامي يخلوني ويروحون عني صدق بموت لو ماشفت الزفة وتدور وتدور عقب يلست عالرصيف وحطت ايدها على خدها تنتظر الفرج ... وبعد شوي شافت نيسان كريل كحيان يتقرقع موديل 96 لا وبعد متروس يواني سبوس..حد يسير العرس بهاليواني عنبو ماشي وقت ...لا اله الا الله شو هالقحط ماشي غير هذي السيارة هنيه وشوي وتسمع هرن بيب بيب..وفي خاطرها يااااااااسلام واخيرا جا الفرج ركضت صوب السيارة ... وينزل الجامه ويطلع واحد من جيرانهم شيييييييييييبة ريوله والقبر..
الريال: ها بنتي شو تدورين
فطامي: اخيييييييج انت بعد ماادور شي... فرحت يحليلي قلت بتوديني الزفة... تشوفهم صدق مايستحون راحوا عني وخلوني بروحي ...مسكينه صح ( وكالعاده تمد البوز متر..من القهر صايرة تكلم أي حد )
الريال: افا عليج كم فطامي عندنا ...يلا ركبي شو تترين بنلحقهم
فطامي (فاجة حلقها شبر وتقول لو عندك سيارة مثل العالم والناس مابتقولي ركبي صدق نحاسة وبعدين لو يدرون اني سرت عند هالشيبة بيقتلوني... والا اقول برايهم حد قالهم يروحون عني بعدين مسكين هذا شيبة لا يضر ولا ينفع زين مايموت فالطريج..بس كيف يعرف اسمي مب جنها غريبة..فديتني مشهوره) شووووووووو نلحقهم اخييجج عمي وين تبى هذي السيارة تسير زفة اخاف تبند نص الشارع
الريال: بدينا فالغلط يالله انتي ركبي وتمسكي زين لا تطيرين..شدراج القديم اصيل انتي بس ماتعرفين شي
فطامي: هيه ماعليه.. وبعدين الشواب مايعرفون يسوون ويلات وحشرة وانا اريد استانس حرااااام ماريد
الريال: تشوفيني شيبة انا اصلن شاب اصغر عنج يلا ركبي اشوف وانتي بتشوفين ..
فطامي: شو اسوي بعد لاحول ولاحيله بركب..
ركبت فطامي وحتى ان فستانها نشب فالباب وانشق.. بس مش مشكلة الحين كل يهون اهم شي تلحق عالزفة..بيذبحها الفضول اذا ماشافت
واول ماركبت فطامي الجامات طبعا مفتوحة.. ماشي مكيف .. ويدعس الشيبة عالبترول اخر شي ويلحق الزقة وقعد يتجاوز السيارات وفطامي قلبها واقف فاي لحظة تخاف تنقلب السيارة .. الشيبة طلع مب هين
فطامي: حووو عمي شو فيك بتذبحنا الناس ماتسرع فالزفة
الريال: مب نحن المعاريس خلااااااص خلينا لازم نكون جدام لو ان السيارة ماتساعد
فطامي في خاطرها زين عرفت انها ماتساعد...وكله كوم وشكل فطامي وهيه تهبها الريح وتطير شعرها من الجامه كوم ..مب كانها طالبه جامعيه وبنت رقيقة رايحة زفه الا كنها عجوز رايحة العزبة... وشوي ويلّصق الشيبة السيارة في سيارة المعاريس ويعطي هرن بببببيب بيييييب وفطامي تصرخ عليهم من الجامعه وفهد منزل الجامه ومطول عالمسجل عالاخر وفاج حلجة وفي خاطره يقول من وين يابته فطامي هالشيبة واعي لين الحين ..صدق خبلة ..الدنيا ربشة وفالوقت الي كانت فطامي تصرخ على فهد من الجامه يقوم هالشيبة ويسوي حركة حرق التواير وهنيه صريخ فطامي شل الشارع.. والويلات والتفحييط ماعند حد خلصت الزفة على خير ووصلوا البيت
فطامي:مشكور حجي... الصراحة طلعت مب هين اسميها مب زفة الا فلم رعب..الله ستر وردينا احياء
الشيبة: لا بعدج ماشفتي شي بعدين شوفيج طايحتبي عمي وحجي من كبري انا..
فطامي: لاحشاك..مب شيبة..بس لو ماكنا متنا من سواقتك كنت مت عالفراش خخخخخ بعد مايبالك وقت مع السلامة مع السلامة
ركضت عن الشيبة وتقول حشى لصقة.. صدق فيني نذاله مسكين موصلني فيه الخير والله
اما هناك في سيارة خالد نزلوا مها وركضت الها فطامي.. وحطت الهم العشا وتعشوا مع بعض حتى ماخلت المعاريس يتعشون بروحهم قاعده على راسهم وعقب العشا تمسك شعر مها وتلعب فيه لعب تقول انها قاعده تبطل التسريحة يعني مجرد مساعدة والله اعلم..اما مها كانت عادية جدا يعني مش مستحية ولاشي بالعكس ماخذه حريتها جدا قامت وياها فطامي ورتبت شنطها وطلعت الها ثياب النوم ورتبت غرفتهم بعد ماتعشوا ودخنتها وعطرتها... وطلعت راحت تنام عنهم... ولكن..!!

:::::::::::::: نهاية الجزء الخامس عشر ::::::::::::::::

بعد ماخلص العرس والكل راح ينام وفطامي راحت غرفتها بتنام لكنها للاسف ماقدرت... حتى كانت رايحة بتكلم محمد وتقوله عالي صار فالعرس بس وين ... حالة فطامي رجعت الها مرة ثانية وقعدت تصرخ طول الليل تعبانه... وقامت سلامة وخبرت امها ...موزة مش عارفة شو تسوي لفطامي الي حست انها فاي لحظة ممكن تروح من ايديها موزة تقول في خاطرها نحن ماصدقنا ترجع فطامي مثل اول... قعدت فطامي على حالها لحد مااذن الفجر.. عقب هدت ونامت وظلت فطامي على هالحال اسبوع كامل.. كل ما يصير الليل تقعد تصيح وتصرخ بدون لااحد يعرف السبب وبدون حتى لا هيه نفسها تدري شو صار وبعد مايبان النور ويطلع الصبح ترجع طبيعية وتنام وكان شي ماكان..
اما فهد ومها كانوا مستانسين في شهر العسل صحيح ماسافروا برى البلاد ..بس كانوا كل يوم في مكان ومرة من المرات كان فهد يكلم خالد..
خالد: ها المعرس شو الاخبار..
فهد: ياااااااااااسلام شو الاخبار عسل ياريال ثرة العرس حلوو
خالد: الله يهنيك... اقول فهد شو رايك نروح البر
فهد: البر وين عاد أي مكان
خالد : صوب عمان تعرف العبيلة.. ووداي الجزي
فهد: اكيد
خالد: خلاص شو رايك يوم الجمعه نتغدى هناك
فهد: تم الساع بس منو بيسير ويااك
خالد: شو منو بيسير بنسير كلنا عايلتنا وعايلتكم ..هب مشكلة سيارتي وسيارتك وسيارت ابوي واخوي راشد ها شو قلت يكفن!!
فهد: خلاص ياريال غايته...
وفعلا بدى التجهيز للرحلة... حتى مهره اخت خالد قررت تروح معاهم ولمن استاذنت مهره من زوجها الي هو اخو محمد كان محمد موجود .. وسمعها فالوقت نفسة كانت فطامي متصلة على محمد عشان تخبرة
فطامي: مرحباااااااا حمودي كييييييفاااااااااك
محمد: حمدالله عيوني انتي شحالج..
فطامي: ترتوبيشن..
محمد: ما شالله المعنوية مرتفعة اليوم شو السالفة
محمد: ماشي فديتك بس بغيت اخبرك اني بروح ويا هلي رحلة البر وبنروح صوب عمان يعني تلفوني يمكن يكون مغلق وقلت اخبرك عشان ماتحاتي
محمد: اها ومنو بيروح وياكم ياحلوة
فطامي: محمد نحن وقوم مها
محمد: هيه زين زين لا تتاخرون
فطامي: محمد بلاااااااااااااك لا اله الله لا تناحس عاد
محمد: ماقلت شي الحين انا انزين ... يلا عمري روحي واستانسي ادري خالد بيسير ..بس حاولي تكونين بعيده عنهم
فطامي: محمد بلاااااك لين متى بتم جي يابني الولد كان جدام عيوني قبل لا اعرفك واخترتك انته وخليته هو لا تم تسويلي فيها تغار
محمد: هذا كان اول
فطامي: شو قصدك يعني لازم كل يوم نتضارب
محمد: يابنت الحلال خلاص روحي..وديري بالج على نفسج ويوم بتردون بنتفاهم..
فطامي: ان شالله يلا سلاااااااام
سكرت فطامي عن محمد وراحت تساعدهم عشان تحط الاغراض فالسيارة وبعد ماخلصوا ترتيب الاغراض توزعوا على السيارات وطبعا فطامي ركبت ويا ابوها وفهد في نفس السيارة والبقية توزعوا مع جيرانهم وتحركن السيارات الساعه عشر الصبح...وقبل الظهر بشوي وصلوا المنطقة الي راحين الها نزلوا الاغراض وفرشوا ... اليهال راحوا يلعبون ..فالوادي... والبنات والحريم راحن يسون الغدى ... الرياييل يتقهويون والشباب شلوا نياسينهم وطلعوا فوق على الرمله ...وبدى اللعب..
خالد شل شوق حرمة اخوه راشد ومسكينه كانت حامل خلاها تركب معاه وهيه ماتعرف وين شالنها ويطلع فيها فوق الرملة وقعد يلعب بالنيسان لعب وتقحيط ..وهيه مسكينه تصارخ والكل قاعد يضحك عليها.. وحتى ريلها راشد مايقول شي..
اما فطامي ويا مها ومهره وسلامة كانن يسون الغدى حد يشوى لحم وحد يشوي دياي وحط يقطع سلطة وحد يسوي العيش... الجو يخبل والكل مربووش..
بعد ماجهزن البنات الغدى فرشوا الحصير وحطوا الغديات... في كذا صينية ...وقعدوا يتغدون البنات مع بعض والشباب مع بعض والحريم مع بعض والصغار بروحهم... وخالد كان مستانس وايد على الغدى..
كراتين الروب كانت عند البنات... وفهد يبي رروب فقال حق مها تعطية الكرتون وقبل لا تعطية سالت اذا حد يبى زيادة
مها: فطامي انتي ماعندج روب ماتبين...؟
فطامي: لا انا مااحب اكل روب ويا العيش
فقامت مها وعطت فهد وهنيه فهد قام يسألهم اذا يبون رووب..
فهد: حد يبى رووب خالد ماتبى روب زيادة؟
خالد: لا انا مااحب اكل الروب ويا العيش
هنيه الكل سكت وفجاة نقعت سلامة من الضحك وقالت سبحااااااااااااان الله ...يامحاسن الصدف والله عندنا اثنين مايحبون الروب مب جنها غريبة؟؟!!
هنيه فطامي حست انها بتصفع سلامة...
فطامي: اقول لا غيرت رايي ابا ابا روووووب لا صدفة ولاشي اصلن انا احب الروب هاتولي رووب
الكل يعرف انها فطامي لو تموت من اليوع وماشي قدامها غير الروب متسحيل تاكله لانها ماتحبة ولو كلته بترجع..
مها مسكينه صدقت وقامت يابت روب حق فطامي.. وفطامي تحط روب وتاكل بالغصب وعيونها بتطلع من وييها من كثر ماتغصب على نفسها تاكل رووب بس عشان تعاند خالد..
اما خالد فكان يشوفها ويضحك ويبى يشووف شو كثر تقدر تستحمل على هالحال ..وفجاة تكلم
خالد: يم يم محلى هالديااااااااااي منو الي شاونه...طعهمة يجنن ولا مطعم الملاح
مها: هذي فطامي..مسوية الدياي ذوق اللحم انا مسويتنه
خالد: هيه جيه الطبيخ والا بلاااااااااش تعلمن كيف تطبخن...
فطامي: اقوووووول ... مب جني نسيت احط ملح حق الدياي طعمه مب حلوو عطوني لحم
خالد: يوووووووووة ملح ملح وايد مالح الدياي
هنيه فهد ومها يطالعون بعض حسوا انها بتستوي حرب بين فطامي وخالد كل واحد قاعد يعاند الثاني من بعيد لبعيد.. شوي وبيشوتون بعض بالصحون..فحاولا يهدوو الموضوع...او حتى يغيروا السالفة
فهد: فطامي ..ابا بيبسي ممكن تروحين تنزلينه من السيارة خليته هناك عشان مايسخن
فطامي: ان شالله..
قامت فطامي من على الغدى وراحت يابت غراش البيسي الحجم الكبير ومعاهم الاكواب..
فطامي: فهد اصبلك بيبسي الحين والا تبى بعدين..
فهد: لا الحين ماعليج امر..
قامت فطامي وصبت بيبسي حق فهد... وراحت بتكمل غدى ويا البنات..
خالد: اقول فطامي بما انج واقفة ابا ماي ماعليج امر..
فطامي من ورى خاطرها وهيه ماده بوزها شبر وتقول في خاطرها كني اشتغل عندك وانا مادري بعدين قالت له ان شالله وقامت بتصب ماي فالكوب وتوها حطت نص الكوب ماي... صرخ خالد
خالد: لالا نسيت قصدي ابا بيبسي ..
هنيه فهد التفت صوب مها وهز راسة في خاطره يقول الحين بتقوم فطامي وبتصفع خالد... غمض عيونه لا يشوف الصاعقة... لانهم يعرفون طبع فطامي عصبية ودفشة..وراشد ناقع من الضحك
اما فطامي .. ف ناظرت خالد بنص عين وبكل بروود قالت له فالللللك طيب بو وليد ماطلبت.. وراحت ويابت غرشة البيبسي وصبتها على نفس الكوب الي كان فيه ماي... وراحت صوب خالد
فطامي: تفضل اشرب يلا اشووووووف مب انته طلبت بيبسي اشرب يلا شو تتنتظر يلا ارشب اشوف
فهاللحظة الكل كان يطالع صوب خالد وخالد مب عارف شو يسوي الماي الي فالكوب اكثر من البسسي والطعم الله لا يراويكم
قام خالد وشرب الكوب وعيونه بتطلع ..مب طايق يبلعه..
اما فهد فقعد يضحك عليه..ويقوله احسن حد قالك تبدى ..اشرب الحين..
قعدوا كلهم يضحكون على خالد...
اماخالد على باله انه كلام فهد صح...وانه فطامي غلطت لمن عرفت محمد والحين كبرت وعقلت وتركته... وان سالفة خطوبة فطامي لمحمد هذي بس من صوب اهل محمد اما فطامي مش موافقة هذا كان ظن خالد بالرغم من انه كان غلطان...فهد بعد نفس الشي كان متاكد مليون فالمية انها فطامي تركت محمد وعن قناعه بعد..

وبعد الغدى الكل راح يتمشى الي راح صوب الوادي والي طلع فوق الجبل والي راح ياخذله قيلولة اما تحت الشجرة او فالسيارة... اما فطامي فحست انها اشتاقت لمحمد..وقررت تكلمة... خذت تلفونها وراحت بعيد عشان تكلمة ونفس الوقت عشان التلفون يلقط ارسال... وحاولت تبعد قد ماتقدر عشان محد يشوفها لان محد يدري انها عندها موبايل..وراحت قعدت تمشي بين الشجر فالوادي وتطالع وراها لين وصلت مكان بعيد...مكان مفتوح قدامة وادي ووراه شجر يعني محد يشوفها الشجر مغطي المكان..هنيه دقت لمحمد وقعدت تكلمة... ولكن ماكانت تعرف انه حد كان يتبعها..
فطامي ترمس بصوت عالي..وماتسمع شي لان التلفون كان يقطع ومادرت الا بسيارة تقطع الوادي ويطيش المااااااي بقوة عليها... ثيابها صارت كلها ماااااااااي والسيارة كانت سيارة فهد لكن الي فيها كان خالد..
تبع فطامي بالسيارة..حتى لمن كانت تمشي فالوادي كان لاحقنها ولمن وصل قربها زاد السرعه لحد مارتفع الماي..فطامي التفتت وتشوف خالد فالسيارة ناظرته بنص عين بدون لا تكلمة اما هو ف شغل الها اغنية..( مجبور برحل عنك مجبور مجبور ابين لك خطاياك ..كم قلت لك ولاتعصي الشور حب الذي حبك ويهواك..طبعك عديم وفاقد شعور غرك جمال وخير يكساك بتدور بك الايام بتدور وبتذكر محب صادق وياك..) ورجع ولف مرة ثانية وسوى نفس الحركة مر بسرعه كبيرة وارتفع الماي مرة ثانية ويطش على فطامي في ويها..والماي كان متقطع يعني مليان طين..
وهنيه فطامي قاعدة تناظر خالد بكل احتقار لو بايدها تقتله..فقررت ترجع تقعد مع خواتها واهلها..فطامي جاية من بعيد وثيابها صايرة غبرا من الطين ..شافها فهد..
فهد: حوو فطامي شو ياااااااااج صايرة غبره جنج طالعه من مقبرة تحريني بخليج تركبين السيارة وانتي جذا
فطامي: (وهيه مادة بوزها شبر)ماشي رحت امشي فالوادي زلقت بالطيع وطحت ع ويهي..
خالد قاعد يسمع فطامي..وهيه تخبر فهد وتجذب عليه ..فقام سوى حركة نذاله...
خالد:اقول فطامي شو احلى طعم الطين والا طعم بيبسي مخلوط بماي..
فطامي تمسح ويها من الطين..وتطالع خالد... وتقوله..
فطامي: اقول خالد...تعرف انك رزة انا اكلم اخوي انت شو دخلك... ليش ماتعرف انها رزة الفيس من طبايع. ال ....
فهد: فطامي خلاص روحي عند البنات..
فطامي: ماتشوف ربيعك..حاط دوبة من دوبي شو تتحراني..وبعدين انته ليش جي صاير بارد هاه لو حد غير خالد يرمسني بتشل الدنيا... واونك تخاف عليه ومحافظ ليش خالد بعد ريال وبعد غريب والا حلال على ناس وحرام على غيرهم
فهد: انتي شو ناوية تقلبينها نكد بس مب منج مني انا الي فكرت اطلعكم
فطامي: يالله عاد الي يسمع وايد عليك حمدالله ابوي مب مقصر علينا بشي ونخيس فالبيت احسن من المذله..وماغصبناك تودينا..لو سرت انت وحرمتك وفكيتنا من ويه هذا السبال الي عند ابرك..
هنيه تعقدت الامور وانقلب الفرح هواشة وضرابة.. والسبب كالعاده فهد خالد وفطامي...يات مها بتهدي الامور.. بس مافي فايدة..
قعدوا شوي يلين ماتهدى الامور...وفطامي خلااااااااص تثور تثور بتقتل حد ..وناصر وبو خالد مساكين مايدرون عن شي... فقامت فطامي وراحت السيارة وطلعت البريق وشوية نعناع وكبريت وسكر واكياس ليبتون.. وخذتهم مع دبة ماي وطلعت الجبل وجان تشوفها موزة
موزة: حوو فطامي وين تبين بالبريق
فطامي: شو بعد رايحة اسوي جاهي ..
موزة: والناس تسوي جاهي فوق الجبل اول مرة اسمع ابها هذي
فطامي: امي احسلج خليني كيفي كفي ماتقدرون تخلوني بكيفي..
موزة: بسم الله سكنهم في مساكنهم.. خلاص يابوج لا تاكليني سوي الي يريحج محد بيقولج شي..
وفعلا طلعت فطامي مسافة مرتفعه شوي فالجبل وجمعت شوية حطب وشعلت النار ويابت ثلاث حصى شوي كبير ومرتب عشان تحط عليهم البريق.. وبطلوع الروح ولعت النار صبت الماي فالبريق وبدت تسوي الجاهي..
اما فهد وخالد قاعدين يتمشون..ومعاهم مها...وشوق وراشد قاعدين يتمشون فالوادي والشواب قاعدين يرمسوون..
خالد: فهد دخيلك شوف اختك وين قاعده تسوي جاهي هذا ويهي اذا ماطاحت هيه وجاهيها
فهد: خالد اووهوو شوفيك انته ماتوب طبها ياريال مافينا على الصدعه ..خلها تسوي الي تباه بعد مافيني على كلامها الي مثل السم..
خالد: شوف شوف انزين تشوف البريق على جانب والله شكله بيطيح من فوووووووق خخخخخخخخ

اما فطامي فكانت تطالع وتشوفهم انهم يضحكون ويطالعونها حست انهم قاعدين يحشون فيها.. وهيه معصبة خلااااص..وخالد ياشر عليها ويضحك.. هيه قاعده تطالعه بحقد وشوي رايحة تزيد حطب تحت البريق وهيه تناظر خالد مب البريق جان يضرب عود الحطب فالبريق ويطيح البريق من فوق راس الجبل وطخ طخ طخ طخ طرباخ طييييييييييخ لحد ما وصل قدام ريل فهد وخالد ..لكنه وصل بدون ملامح جنه قوطي تونه
هنيه خالد خلااااااااااااص ماقدر يمسك نفسة من الضحك نقع ضحك بكل مافيه من قوة وهو يرفع البريق... وصلت فطامي..صحيح شكلها يخوف وعيونها صايرة جمره بس الضحك الي في خالد اكبر خلااااااص مايقدر بعدين الكل قام يضحك مب بس خالد.. بس خالد نذل قام ورفع البريق في ويه فطامي..وقالها
خالد: اقول مسكين هالبريق لا تحاولين تدخلينه العناية المركزة لانه عقب هالحادث ماظني يعيش..
فطامي: والله ماادري من الي ماظني يعيش..اصبر عليه شوي...
وتقوم وتركض ورى خالد وهو يركض جنهم توم وجيري وهيه تركض وخالد يركض...وموزة تهز راسها وناصر وبو خالد في سابع نومه وفهد يقول حق حرمته..انا مب مسؤول عن اخوج لو صارله شي هو الي جنى على نفسة
فطامي من كثر القهر والغيض الي فيها ماتعبت اما خالد فكان يلهث من التعب وفطامي تركض وراه خلاص بتقتله تركض وراه بدون لاتعرف اصلن ليش وشو مثلن بتسوي فيه لو مسكته وهو هارب بدون لايعرف ليش وشو ممكن اصلن يصير لو مسكته فطامي.. قعد خالد مسكين يركض.. ويطالع ورى يشوف قربت منه فطامي والا بعدها بعيدة وفجاة ينزلق ويطيح فالوادي ويستوي ويهه ابيض من الطين هنيه وقف ووقفت فطامي..
فطامي: احسن هااااااااااااااه تستاهل شفت الله فوق ومايضرب بعصى..يلا الحين قول شو احلى الجاهي والا الطين
خالد: انتي احلى من الاثنين..
طالعته فطامي وفي خاطرها تبى تضحك على شكله وعلى كلامه..وقالت
فطامي: انت شكلك ماتوب احسن لي ما ااتعب نفسي وياك..
وراحت فطامي صوب اهلها عشان خلاص بيروحون وقعدوا يجهزون الاغراض وخالد قاعد يمشي من بعيد..
فهد: اوهو بلاكم اليوم انتوا كل ساع ايني واحد مستوي اغبر جنه طالع من المقبرة..
خالد: ياريال زلقت فالطين وطحت..
فهد: اخاف سالفةالزلق فالطين اليوم الا مثل سالفة الروب الي على الغدى.. قم قم عق كندورتك واركب سيارتك بنروح...
وفعلا قاموا ولموا اغراضهم..وركبوا السيارات وقعدوا يتداعسون لين طلعوا من البر.. الجامات مفتوحه والمسجلات مطول عليهن عالاخر والدنيا ربشة والكل يضحك مب كانهم الي قبل شوي كانوا يتضاربون..وبينهم حرب داحس والغبراء
:::::::::::::: نهاية الجزء السادس عشر:::::::::::::::::::::

بعد مارجعوا من الرحلة ..راحت ام خالد لخالد غرفته...
ام خالد: خالد شو اخبار احم احم زواجك الي كان بالسر
خالد: ايوووووووة امي بعدج تتذكرين ياحرمة خلااااااااص من زمان مطلقنها من قبل لا ابدى امتحانات الثانوية..
ام خالد: هيه توك خالد ولدي الي اعرفه وان شالله ترد لعقلك .. الا اقول شو رايك في فطامي ..انتوا من يوم كنتوا صغار تبون بعض واليوم بعد..شفتك حاط دوبك ودوبها ادريبك بعدك تحبها وتباها
خالد: امي فطامي..خلاص نفسي طابت منها..وبعدين انتي ماتدرين انه نسيبج محمد حاط عينه عليها..والا ماقالت لج نسيبتنا شيخة ...بروحج قلتيلي انها راحت تكلم موزة عشان فطامي
ام خالد: هيه ادري بس موزة ماردت عليهم وبعدين الرياييل مايو ...عيل هم نفس الشي خبطوا منا مها وناس متقديمن النا وبدينا فهد ..وزوجناه..
خالد: والله كيفج اذا قدرتي تقنعينهم واذا فطامي واقفت يصير خير ( طبعا خالد يدري انها فطامي مستحيل توافق بس كان يبى يتاكد انها قطعت علاقتها بمحمد ويشوف ردت فعلها..)وفي هاللحظة دخلت شوق..
شوق: عمتي تعالي شيخة نسيبتنا ياية بتسلم عليج..
ام خالد: ان شالله هذوني ياية..
دخلت ام خالد الميلس وسلمت على شيخة..
ام خالد: شيخة بلاه ويهج معفوس جي عسى ماشر لا تقوليلي بعد الضغط والسكر
شيخة: والله شو اقولج... هلكت من هالضغط ولا الريال ولا العيال راضين يرحموني..وكله كوم وصدعت محمد كوم
ام خالد: ليش شو فيه محمد مب ياهل بعد يبى حد يداريه
شيخة: والله نحن شالين تعبهم صغار وكبار..
ام خالد صدقتي والله ..بس ماقلتيلي بلاه محمد..
شيخة: تذكرين يوم ييتج وقتلج بسير اخطب فطامي حق محمد ..وسرت ورمست اهلها ومحمد لين اليوم يالس عراسي متى بملج متى بملج..وانتي تدرين بسالم مب طايع يسير وشكلي بموت بين سالم وولده تعبت لا محمد راضي يخلي البنت ولا سالم راضي يسير يخطبها شو اسوي بالله عليج..
ام خالد: بس جذا انا اقولج على حل يريحج ويخلي محمد ينسى فطامي..ويعاف طاريها وبروحه بيي يقولج امي دخيلج لا تيبين طاري فطامي ويومها
شيخة : وشو هالحل لا تقولين ازوجة غيرها مابيطيع..
ام خالد: لالا مب جي الحل اسهل بوايد
شخية شو تقصدين..؟
ام خالد: ولاشي.. انا اعرف ريال في عمان.. اظني ساكن في صور وبيسوي حق محمد كتاب وبيخليه يعاف فطامي ويومها..
شيخة: استغفر الله انتي شو تقولين بسم الله مهما كان هذا ولدي واخاف عليه لا يابوج حشى
ام خالد: عيل خلج في مشاكلج شوفيج انتي ياحرمة هذي شغلتنا ومتمرسين فيها ماعليج الريال شاطر بعدين شوفي شوق..
شيخة: شوق بلاها
ام خالد: تشوفين عليها شي مريضة تعبانه شي
شيخة: بالعكس ما شالله عليها..
ام خالد: انا كنت رايحة عند نفس الريال وقتله يسوي كتاب حق شوق يوم كان راشد متعلق فيها وهيه ماتباه وشوفيها الحين صايرة مثل الخاتم فايده وماضرها شي..يلا توكلي ع الله وعلى انا اروح للريال وادفع فلوسة بعد هاه شوقلتي
شيخة: والله قلبي ناغزني ياام خالد مااقدر
ام خالد: عيل تمي بعوار الراس بين محمد وابووة..
شيخة : خلاص توكلي ع الله وسيري وكم يطلب بعطيه بس دخيلج كله ولا محمد مابى شي يضرة
ام خالد: افا عليج اصلن حتى انا مايهون عليه محمد شي يصيرلة..
شيخة استاذنت وراحت.. وام خالد حست انها ضربة عصفورين بحجر وفعلا بدت تجهز عشان تروح عند الريال..
اما فطامي فبدت تجهز للجامعه..ونفسيتها صارت احسن وقررت ترجع خصوصا انه الحين وياها اختها سلامة ومعاهم مها بعد... كانن دوم يطلعن السوق ويجهزن للجامعه.. وفهد مرتاح ويا مها وناسي سالفة فطامي مولية... اما محمد فكان فرحان انها فطامي بخير..وبترجع الجامعه... موزة كانت حايرة بين زوجها ناصر الي صحته يوم تدهور ويوم تتحسن وبين زوجته الثانية الي حالها من حال ناصر بعد تبى مراعاه...اما اخوان فطامي الباقين فكانت فطامي مدلعتنهم دلع صايرة الهم الام والابو ..وماتخليهم يحسون ان وقت امهم كله ويا ناصر..وماخلتهم يحسون باي نوع من الحرمان او أي شي ينقصهم مثل مانقصها...

بدت الجامعه...مها وسلامة توهم اساسي..اما فطامي فكانت تاخذ مساقين اساسي ومساقين ثقافة وجدولها مريح وصباحي... في حين محمد انتقل دوامة بوظبي وهو مرتاح لها الشي وفطامي بعد....لانه صار يبى يبعد عن الحارة والشباب الي فيها باي طريقة..كل مايقعد معاهم يتذكر المشاكل خصوصا ان معظم شباب الحارة بدون هدف سهر لين الصبح ورقاد لين بالليل..وشغلات نياسين وهدرز وازعاج خلق الله..
فطامي قررت تبدى بمعنويات عاليه وكلام صديقتها شمسة بعده يرن فاذنها.. وصلت مها وسلامة قاعاتهم ..وتطمنت عليهم لان فطامي ماتريد مها وسلامة يحسون بالي حست فيه من ضياع ووحدة فكانت معاهم على طول.. عقب راحت فطامي كلاسها دخلت وسلمت وانتظرت الاستاذ...
وخلال المحاضرة فطامي تشوف البنات كلهم صغار كلهم في سن اختها سلامة ولما جت ورقة الغياب كل البنات ارقامهم الجامعيه دفعة 2002 ماعدا فطامي 2001 ومن ضمن الاسماء شافت اسمين قدامهم واحد 2001 والثاني 2000 وحاولت تحفظ الاسماء..
وبعد المحاضرة تحركن ثلاث بنات باتجاه فطامي..
مريم: مرحبا ...شفت رقمج الجامعي في ورقة الغياب 2001 انتي؟
فطامي: هيه وانتوا؟
مريم: انا بعد 2001 تصدقين ارتحت يوم شفتج كل البنات دفعة 2002 اصغر عنا استحيت..
فطامي: تصدقين نفس الشعور وهذيلا ربايعج؟
عليا: انا عليا 2000 عيوز معمره فالجامعه ... اصلي من عمان وداخله الجامعه بالواسطة وحتى يوم ارسب مايشوتوني ههههههه
سمية: وانا سمية... واصلي عيمية من ايران ... وافتخر... واما الدفعه انا 2001 بس اصغر منكم ومنهم بوايد انا توني 17
فطامي: شووووووووو كيف؟
سمية : ولاشي مدرسة خاصة..
فطامي : طيب انا عندي محاضرة الحين تقنية معلومات(2) وانتوا
مريم: تصدقين حتى انا وعليا ... لايكون في نفس الشعبة ..
فطامي: لحظة بشوف انا 102 وانتم
عليا ومريم: ونحن بعد
سمية: نو نو انا عيل ماعندي شي الحين عندي بريك..مخلصتنه هالمساق من زمان..بروج اشيت
فطامي: شو يعني اشيت هذي بعد
سمية : اقعد عالجات
فطامي: انزين شو يعني جات
سمية : هههههههههه الحين من صدقج ماتعرفين جات خلاص روحي المحاضرة وعقب بخبرج
فطامي: لحظة ماقلتلي ليش معمرات فالجامعه يعني ليش متاخرات مثلي
عليا ومريم وسمية مع بعض : كنا موقفين وانتي؟
فطامي: ههههههه وانا بعد كنت موقفة..

ومن هنيه بدت علاقة فطامي ب سمية ومريم وعليا وكانت صداقتهم كل يوم عن يوم تكبر... لدرجة انها فطامي عرفتهم على سلامة ومها..وحتى ان فطامي صارت تكره الاجازات وووجود صديقات الها فالجامعه شجعها تكمل.وتحب الدوام بس عشان تظل ويا صديقاتها الجدد.. وبعد ماانضمت فطامي للشلة وصارن اربع.. عليا تقربت من سمية.. ومريم تقربت من فطامي..وكانن كل ثنتين يصارحن بعض لكنهن ظلن اربع مع بعض كشلة وحدة...ومن هنا تبدى دوامة الضياع ...

:::::::::::: نهاية الجزء السابع عشر :::::::::::::::::::::

في يوم من الايام فطامي راجعه من الجامعه وفالباص وبما انه الطريق طويل فكرت انها تدق لمحمد
فطامي: هلا والله غناتي حبيبي فديت روحك..
محمد: فديت عمرج.. حياتي ماشا الله اسمع صوتج زين ان شالله مرتاحة فالجامعه
فطامي: واااااااي وااااااااااااااااي ياحمودي اكثر مما تتخيل.. وبعد سمعت كلامك والحين صار عندي صديقات
محمد: ياسلام لا صدق فيه تطور بس لايكونن هالبنات من الي خبري خبرج
فطامي: افا ولو يامحمد انا فطامي..اعرف كيف اختار البنات بس حمودي!!
محمد: خير امري قلبي بغيتي شي
فطامي: هيه اليوم سمية ربيعتي قالتلي تبى رقم موبايلي ولمن قلت لها ماعندي ضحكت حمودي عادي يعني اعطي صديقاتي رقم موبايلي..
محمد: عادي فديتج هذيلا صديقاتج وانتي واثقة فيهن بعدين ماريدج تحسين انج اقل من احد وحتى لو ماعاجبنج الجهاز الي عندج الحين اجيبلج واحد توه يديد وفيه كاميرا بعد
فطامي: حمودي لاااااا دخيلك بيفصلوني من الجامعه اساسا الموبايل العادي ممنوع فما بالك ايب بوكاميرا ..
محمد: خلاص الي يريحج ..غناتي..واباج دوم جي فرحانه وابى درجاتج عاليه.. متى بتتخرجين وافرح فيج
فطامي: ماعليك ان شالله قريب انت لا تستعيل بس ..
محمد: تصدقين فطامي... هنيه عندنا فالفريج الدنيا مغيمة وما شالله نازل مطر وااااااااايد بشكل مااتيخلين اول مرة ينزل مطر جي فالصيف
فطامي: هيه حتى هنيه فالعين غبار بس بعده مانزل مطر..
محمد: ياااااااااااه يبالنا نروح البر الحين تلقين الوديان في كل مكان
فطامي: جان زين والله...
محمد: يلاعمري عيل انا امي تناديني بسير اتغدى تامريني شي
فطامي: بالعافية قلبي وسلامت روحك..
محمد راح يتغدى وفطامي بعد نص ساعه وصلت البيت نزلت من الباص ..ولقت فهد قاعد يشغل سيارته..مها وسلامة بعدهن فالجامعه دوامهن يخلص العصر..
فطامي: فهد وين تبى توك ياي من الدوام ... ليش ماترقد
فهد: شو ارقد يابنت الحلال شوفي الجو والمطر تبيني ارقد لا يابوي بروح البر صوب عمان اشوف الوديان
فطامي: وانا انا ابا ارووووووح وياك مايخصني بروح بروح بروح
فهد: وين تروحين انا مها حرمتي ماشليتها... بسير ويا الشباب نخمس فالدوار وين تبين..مااشل بنات انا
فطامي: افا يافهد ..انا فطامي حرام مسكينه ماطلعت من زمان.. بعدين تشوفني الحين انا شاطرة واداوم الجامعه بدون لاحد يقولي يلا عاد...
فهد: لاحول يانتن البنات...صدق ان كيدكن عظيم
فطامي: لاحول الحين استوى كيدي عظيم بس لاني بغيت اسير اشوف الوادي..
فهد: يلا انزين سيري لبسي ..وشوفي اخوانج اذا حد بيسير وهاتي سالم وياج... وخبري امي
فطامي: شو البس يكفيني الي علي ماببدل بدخل كتبي وبشوف الي واعين ويببهم وبخبر امي
دخلت فطامي ولقت اخوانها يالسين روضة ونورة وسالم وهيفاء.. وسلمت عليهم وقالتلهم اذا يبون يروحون البر يشوفون الوادي... عقب راحت لامها
فطامي: مرحبا امي
موزة: هلا فطامي فديتج ييتي من الجامعه
فطامي: هيه امي والحين بروح
موزة: وين تروحين؟
فطامي: بنروح انا ونورة وروضة وهيفا وسالم ويا فهد نشوف الوادي
موزة: لا ماشي روحة
فطامي: امي يااااااربي شوفيج انتي جي مناحسة .. انا بطلوع الروح اقنعت فهد لين ماوافق وتين انتي تعارضين ليش امي هاه اصيح اصيح الحين ؟
قعدت فطامي تدلع على امها بس موزة رافضة رفض قطعي
موزة: فطامي امي لاتسوين جي والله انا اباكم تطلعون بس المشكلة ان المطر بعده ماوقف ولو رحتوا البر الوديان قوية..واخاف عليكم يشلكم الوادي..
فطامي: امي شوفيج نحن ما بنروح مكان بعيد..بعدين يمكن اصلن ماشي وادي شو دراج يلا عاد امي... لاتخافين انا عاقلة ويا فهد مابخليه يسوي شي والا يتهور
موزة: واخوانج كلهم بتشلينهم
فطامي: هيه امي حليلهم محد يطلعهم بس مها وسلامة بعدهن فالجامعه
موزة: خلاص فديتج..انا مابخبر ناصر ,,ادري مابيطيع بس انتوا بعد لا تتاخرون مافيني عالحشرة ولاتخلين فهد يدخل السيارة فالوادي..والله لو انتظرتوا لين يوقف المطر جان زين
فطامي: خلاص امي توج موافقة بعدين يالله نحن مرة فالسنة نشوف مطر قحط عافانا الله خلينا بلاااااااج
موزة: حشى يهالبنت خلاص روحوا ..بس مثل ماقلتج لا تروحون بعيد..

طلعت فطامي وشلت اخوانها ... ركب سالم عدال فهد جدام وروضة وفطامي وهيفا ونورة قعدوا ورى.. وطبعا فهد كان طالع بالنيسان... مشوا صوب حدود عمان عشان يشوفون الوديان... والدنيا كانت فاضية ولا مخلوق فيها
فطامي: فهد غريبة محد فالبر فاضي..
فهد: خبله انتي حد يحوط فهالجو الناس تروح تشوف الوادي بعد مايوقف المطر يخافون يكون الوادي قوي في اوله ويشل..
فطامي: هااااااااااا خيبة ...يعني نحن غبين وبعدين انت ليش تودينا دام السالفة كذا
فهد: والله انا ماوديتكم بروحكم ركبتوا انا ساير العب ويا الشباب فالدوار بالسيارات
فطامي: لا هب مشكلة حلوة المجازفة اقول شغل شغل مسجل..
قام فهد وشغل المسجل وحط اغنية فاضل شاكر ( ضحتك الدنيا واخيرا لقيناك... رفع الصوت ع الاخر ودق طبل ومرتبشين ويغنون والحاله حاله والجامات مفتوحة ...
فهد: اقول وين تبونا نروح مااشوف شي وادي هنيه
فطامي: فهد تدري انا يوم كنت صغيرة كنت اتمنى شي لو بتسوية انت اليوم جان زين
فهد: اونج عاد وشو ها الشي يا الانسة الحالمة
فطامي: تعرف يوم كنت اشوف الوادي كنت اريد اعرف من وين يطلع كيف يتكون ويي حتى كنت اتوقع انه يوم يصير صوت الرعد يكون هذا انفجار الوادي
فهد: تصدقين حتى انا ابا اعرف من وين يطلع الوادي
فطامي: شوف عيل شو رايك نروح بعيد اخر شي ونشوف من وين يطلع الوادي صدقني الحين بيطلع الوادي لانه المطر ينزل غزير
هنيه هيفا تقول في خاطرها ( الحين هذي الي قايله انها عاقلة وهيه بتنصح فهد ومابتخليه يتهور... وينج يامي تعالي شوفي عز الله رحنا فيها وطي )
طبعا فطامي لعبت براس فهد وما شالله الخبال متولف فهد قعد يمشي بالسيارة وكل مايشوف ماي متقطع او غدير يمشي اكثر لحد ماوصل مركز عمان..
فهد: اخييييييييج شو هذا ماعندنا جوزات الحين كيف بنمر
فطامي: عادي لاتدخل عمان انته بس امشي من الطريج الثاني الي على الحدود
فهد: بس مااعرف اول مرة اروح
فطامي: عادي بنرد من وين يايين لا تخاف..
وهنيه كانت الكارثة...
مشى فهد بالسيارة لحد مالقوا نفسهم في منطقة مقطوعه فالبر ..والوديان توها بادية وقوية بشكل فضيع.. وهم الوديان تحيط ابهم من كل جانب مافي مخرج ابدا حتى لمن شافوا المكان الي يايين منه صار كله ماي..
فطامي: ياربي الحين شو نسوي ياهاي نشبة ندق تلفون حق حد
حاولوا بس ماشي فايدة التلفونات مافيهن ارسال حتى تلفون فهد بالرغم من انه خط بس للاسف مب راضي يفتح لا شبكة عمان ولا شبكة الامارات والحين شو الحل..نورة خافت وقعدت تصيح... وبكاها مش مخلي حد يقدر يفكر.. فهد مش عارف شو يسوي ..فقرر يجازف..
فهد: سالم اسمع انت انزل من السيارة انزين وامشي فالوادي وشوفة اذا وايد عميق خله واذا لا خبرني عشان بنزل بالسيارة فالوادي ماشي حل غير جذا
فطامي: لاااااااااااااااااااااااااااا شو تسوي فهد انت تخبلت تبى الوادي يشل سالم لا حرام عليك
فهد: يعني شو تبيني اسوي لو نظل لين باجر عالقين هنيه محد راح يدري عنا او حتى يشوفنا الدنيا مقطوعه ولازم نسوي جي هذا اذا نريد نعيش..
فطامي: انا بنزل خلاص
فهد: نزلي من السيارة وشوفي سالم وهو يمشي فالوادي عشان لو صار شي لا سمح الله.. بس هاه لاتنزلين الوادي معاه
فطامي: خلاص ان شالله..
سالم مسكين نزل ريولة فالوادي ولما حس انه حركت الماي قوية خاف ورجع
اما فطامي صدق فااااااااضية الناس في شو وهيه في شو فطامي لمن نزلت من السيارة شافت ضب وقعدت تركض وراه ..
فهد: فطامي شوفيج انتي اذبحج الحين صدق فاضية نحن ندور مكان نطلع منه وانتي قاعده تركضين ورى ضب..
سالم: انا ماريد اموت هنيه تبى تنزل انزل انت واختك انا مابنزل فالوادي اخاف... محد قالكم تيبونا هنيه
فهد: مالت عليكم وعالي ياخذكم معاهم..قعدوا فالسيارة ولا تتحركوا تسمعون..وانتي فطامي الخبله مب اخليج عند اخوانج تعقلينهم تروحين تجننيبهم ..
فطامي: ان شالله يلا روح بس لا تتاخر
فهد: الي يسمع يقول مسافر مب نازل اشوف عمق الوادي
نزل فهد فالوادي ومشى لين نصة وحس انها قوة الوادي خفت ركب السيارة..
فهد: اسمعوني تمسكوا زين ولو حسيتوا انها السيارة ترتفع فوق لاحد يقعد يصارخ انا بمشي بقوة فالوادي لان الماي يرفع التواير فوق تسمعون وسكروا الجامه
الكل: ان شالله

وفعلا قام فهد وغطس النيسان فالوادي والماي وصل لنص السيارة ودعس عالبترول وفي
اوسط الوادي حس انها السيارة غرزت بس ظل داعس عالبترول لحد ماطلع من الوادي بطلووع الروح...لكن هذا ماكان نهاية الامر...
مشو بالسيارة بطريق مايعرفون وين يوديهم..المهم انهم قاعدين يمشون على يابس مب وادي.. لحد ما وصلوا مكان فيه مسجد في منطقة مقطوعه.. ووقفوا على امل انهم يقعدون يفكرون في حل... وبعد خمس دقايق نزلت هيليكوبتر... على بعد كيلو منهم..
فطامي: فهد شوف شوف ياسلاااااااااام احس كاني فالرسوم المتحركة والحين هذيلا يايين ينقذونا خخخخ صدق انا شخصيات مهمة
فهد: اقول فطامي بسالج متى بتعقلين انتي..
فطامي: شوفيك انته ماتشوف الهوليكبتر
فهد: اشوفها.. بس هذي مب حقج..هذي تشوفينها فيها شيوخ يايين بيشوفون الوادي وبيروحون مب حقج يالخبله
فطامي: فهد شوف نحن الحين نريد حد يساعدنا والهوليكبتر مش بعيده شو رايك اسيرلهم ياسلام وبنصير نعرف شيووخ كشخة صح شفت افكاري وين توديكم
فهد: عيل ماشفت شفت ونص..
وعقب دقايق طارة الهوليكبتر..
فهد: والله ماشي غير افكار فطامي الي بتخلينا نموت مكانا اليوم
نورة من سمعت هالكلام نقعت صياح والباقين ساكتين كان على رؤوسهم الطير..وهنيه كان الفرج ..رن تلفون فهد والكل صرخ من الفرح اخيرا فتح التلفون
ركض فهد بيرد وكانت امه متصلة
موزة : ( وهيه قاعدة تصيح..) انتوا وين من متى اتصل والتلفون مغلق
فهد: امي لاتخافين هنيه نحن قريب البيت الحين يايين
سمعت موزة صياح نوره كانت تبى تكلم امها
موزة: انت تكذب على منو يافهد ... نحن هنيه قرب الحدود ثلاث سيارات شلهم الوادي ومن ضمنهن شاحنه تصدق شاحنه شالها الوادي وتقولي انتوا بخير..فهد لا تجذب عليه ونورة ليش تصيح اكيد خايفه
فهد: انزين يامي هيه نحن مضيعين هنيه ومش عارفين الطريق شو نسوي يعني
موزة: انزين انتوا وين بالضبط
فهد: هنيه قرب مسيد
موزة: بسك عرفته اقول امشي يمين وبتوصل يلين الوادي بتشوف سيارات الشرطة والانقاذ يبون يطلعون الناس الي كانوا فالاستيشن وقاعدين يطلعون الشاحنه لا تتخطى الوادي تم عالجهة الثانية تسمعني
فهد ان شالله..
وفعلا فهد سوى مثل ماقالت له امه ومشى.. لحد ماوصل الجهة الثانية من الوادي.. وشاف العالم محتشدين هناك يحاولون يطلعون السيارات والشاحنه والشرطة والانقاذ معاهم..بالرغم من انه لما كان فهد واخوانه رايحين هذا المكان كان فاضي وحتى وادي مافيه...وموزة وناصر كانوا من ضمن الناس... ولمن موزة شافت نيسان فهد ارتاحت ورجعت اتصلت له وتقوله لا تتخطى الوادي تريا لحد ما الشرطة تطلع السيارات ..لكن وين فهد فيه صبر ينتظر... متهورة وهذا حال الشباب...يعني تشوف شاحنه وزنها ماادري كم طن جرفها الوادي تقوم انته عندك نيسان توايره خفيفه تبي تقطع الوادي..
موزة قلبها واقف وقاعده تناظر عيالها من الجانب الثاني والكل مشغول يساعدون الناس عشان تطلع وفجاة... يقوم فهد ويغطس النيسان فالوادي... هنيه موزة غمضت عيونها وقلبها وقف خلاص مش قادرة تشوف..
الماي يجي من فوق النيسان والسيارة تميل خلاااااااااص بتنقلب فالوادي ... والبنات يصارخن فالسيارة حتى الشرطة مذهولين مش قادرين يسون شي من هذا المتهور الي يسوي جذا.. وفهد يدعس بترول قد مايقدر بس وين السيارة غطس نصها فالماي والتواير تزلق وترتفع...حاول حاول..ماشي فايدة السيارة تطلع صوت بين انها تنقلب وين انها غطست وهنيه صارت معجزة انه فهد قدر يطلع السيارة من الوادي... الناس كلهم كانوا حاطين ايدهم على قلبهم خلااااااااص..اما فهد بكل تهور قالهم عادي مب اول مرة اسوي هالحركة اليوم... وبعدها تابت موزة تخليهم يطلعون بروحهم..في مثل هذا الجو بس هم مستحيل يتوبون ...

:::::::::: نهاية الجزء الثامن عشر:::::::::::::::::::::

فاليوم الثاني راحت فطامي الجامعه..وكالعاده اول محاضرة رياضيات..وهناك لقت عليا وسمية .. بس مافي اثر حق مريم معقول تكون غايبة.. انتظرت فطامي مريم... الساعه صارت ثمان ونص والمحاضرة باقي عليها ربع ساعه وتنتهي ..وفجاة باب القاعه ينفتح بقوة... ودخلت مريم
مريم: السلام عليكم...
الاستاذ: وعليكم السلام...آآي مرياام كم مرة قت ليكي ماتجي متاخره ..( الاستاذ سوداني)
مريم: آسفة استاذ ... بس سويت حادث ..وتاخرت فالمرور..
هنيه شهقت فطامي.... بقوة..
فطامي :حااادث خيبة تعورتي انتي ليش تسوقين بسرعه..هاه
اما مريم فخلاص وجها صار طماطة فيها ضحك وتبى تنفجر بس مش قادرة الاستاذ قدامها
الاستاذ: ياااااكتر الحوادس الي بتساويها يا مريم طيت دي آخر مرة..
مريم : ان شالله
ودخلت مريم وقعدت قرب فطامي..
مريم: يا خبله يافطامي شوفيج دوم اكذب عالاستاذ ماسويت حادث ولاشي بس تاخرت فالنوم كنت بضحك وبينكشف كل شي... مرة ثانية لو اقول حق الاستاذ مت لاتخافي تراني اكذب فهمتي والا لا..فطامي تهز راسها مثل الهنود ..هيه فهمت تووبه
وبعد شوي سالت مريم عن سمية وعليا... فطامي ومريم فالكراسي الي قبل الاخيرة اما عليا وسمية فالكرسي الاخير التفتن مريم وفطامي عشان يشوفن سمية وعليا ...وطبعا فطامي محد يقولها شي التفتت وشافت عليا وسمية قاعدات تحت الطاولة يتمكيجن والاستاذ مسكين يشرح ومايدري شو يصير بالكراسي ورى هنيه فطامى على طول فتحت فمها بتصرخ..بس مريم بسرعت البرق سكرت على فمها
مريم: فطامي شوفيج حشى جرس على طول جاهزة الصرخة عندج بتودينا فمصيبة كم مرة اقولج لو تشوفين أي شي تعودي تسكتين فهمتي..
فطامي: ( تهز راسها ) فهمت
الاستاذ: انتوا الرباعي المرح الي ورى ممكن تسكتوا وتسيبوني اكمل شرح..
فطامي: مريم درستي حق الكويز
مريم: أي كويز انتي بعد..شو تحلمين..
فطامي : مااحلم ويا ويهج... سالي حتى عليا وسمية
مريم لحظة ... عليوو سميوو صدق شي امتحان اليوم
عليا: هيه شي شو يعني ماتدرين ولو دريتي كنتي بتدرسين يعني ... مب مشكلة سمية شاطر بتغششنا
سمية: فالكن طيب... ارقد وامن
وبعد ماخلص الاستاذ الشرح وزع ورقة الامتحان كان فيها مسألة وحدة قامت سمية وحلت الامتحان ونسخت الحل في ورقة ثانية كسفتها ورمتها في شنطة فطامي.. نقلت فطامي الحل وعطته مريم ومريم عطته عليا...ومن زود الكر م بعد ماخلصن غش..مررن الورقة على الكلاس كامل وطلعن..
وفي الممر
عليا: انا ما بحضر المحاضرة روحن انتن..
فطامي: عليا بلااااااج هذي ثالث مرة تعيدين المادة وفيها طرد
عليا: أي طرد حبيبتي صحيح انا عمانية بس الواسطة الي عندي قوية ...يعني بالعامية انتوا تنطردون وانا لا
مريم: هيه والله دنيا نحن هل البلاد لو نرسب ثلاث مرات برى...وانت لو ترسبين عشر محد يقدر يقولج شي.. طيب وسمية شو بتسوين
سمية: انا بروح اشيت ويا عليووه يلا برايكن..
فعلا راحت سمية وعليا مختبر الحاسب الالي عشان يدخلن الجات.. اما مريم وفطامي فراحن وقعدن ع العشب ينتظرن المحاضرة الثانية تبدى..
فطامي: يوووة يا مريم لو تدرين امس سويت مغامرات ..
قعدت فطامي تحكي الي صارلهم امس فالوادي حق مريم... الي كانت سرحانه بعيد وبعد ماخلصت فطامي..شافت مريم مبوزة ماتتفاعل معاها شو السالفة
فطامي: مريوم بلااااااااااج مضايجة من شوو
مريوم: ماشي بس عبدالله مايرد علي
فطامي: منو عبدالله هذا
مريوم: عبدالله هذا واحد من راس الخيمة .. تعرفت عليه من الشات واكلمة بالتلفون ... وصارت بينا قصة حب
فطامي: شات شات شات كلكن تقولن شات شو يعني شات
مريوم: هذي غرفة محادثة
فطامي: غرررررررررررررررررررررررررفة!!!!!!!!!
مريم: اوهو علينا انتي مرة ماتعرفين شي فطامي شفيج..غرفة محادثة يعني فالانترنت يوم تدخلين النت انزين تدخلين موقع هذا الموقع فيه دردشة يعني تدخلين باسم أي اسم انزين وتتكلمين تكتبين الكلام ويظر الهم تشوفين كلامهم ويشوفون كلامج وفيه محادثة كتابية ومحادثة بالصوت يعني يسمعون صوتج ولازم يكون عندج كاميرا ويشوفن صورتج
فطامي: خيييييييييييييييييييييبة عيب شو هذا
مريم: فطامي بسالج انتي ياية من زمن الديناصورات ..قوليلي من مايدخل الجات هاه من مايعرف النت
فطامي: انا
مريم: محد غيرج يابنتي العالم تغير.. الحين الناس تزوج من النت
فطامي: تتزوج...كيف
مريم: عادي بنت تتعرف على ولد ويحبها ويتزوجون
فطامي: مثلج انتي وعبدالله
مريم: هيه..
فطامي: بس كيف تثقين فيه وكيف كيف يعني احس انه شي غلط
مريم: غلط والا صح هذا ادمان وانا وسمية وعليا مدمنين على النت..واذا مش مصدقة انا اقعد 10 ساعات واكثر الجات لدرجة اني اداوم الجامعه مواصلة سهرانه عالجات..والسبب ان كل الي يدخلون الدردشة بطاليه لا شغل ولا دراسة فمااقدر الاقيهم غير بالليل..
فطامي: صدق دنيا غريبة.. طيب والحين شو عن عبدلله
مريم: ماشي المهم سمعيني اباج ماتدخلين الجات هذا تسمعين
فطامي: هههههههههههههاي انا ادخل جات لاحبيبتي فديتج .. مب انا الي اسوى هالحركات وبعدين عندي حمودي فديته الي يغنين عن العالم كله .. ومستحيل اسوي شي غلط عشانه بس
مريم: من هذا محمد بعد ومن وين تعرفينه
فطامي: محمد يصير حبيبي صارلنا خمس سنين نعرف بعض ..ولاعرفته من جات ولا من هالخرابيط ..ولد يرانا رابين جدام عيون بعض..
مريم: يووووووووة يافطامي هاك انتوا ميتين بعيد عن العالم ..ولد جيرانا وللد عمي... يلا قوليلي قصتكم
وفعلا قعدت فطامي تحكي قصتها كامله حق مريم وفتحت الها قلبها مريم بعد نفس الشي ومن يومها صارن صديقات مقربات لبعض جدا واسرارهن كلها مع بعض وبعدن شوي عن عليا وسمية..
رجعت فطامي للبيت.. وكالعاده فالطريق اتصلت لمحمد..

فطامي: هلا بروحي وعمري فديت روحك يامحمد صدق الدنيا كبيرة بس والله انها ولاشي بدونك..
محمد: فديتج ياعمري..
فطامي: حمودي اقولك تعرف الجات
محمد: جات لا شو هذا بعد جني سامع عنه
فطامي: خخخخخخخخ انت الا مثلي ماتعرف شي... بس انتوا عندكم كمبيوتر فالبيت
محمد: هيه بس مافيه انترنت
فطامي : عيل ماتعرفه..
محمد: وانتي من قالج عنه اشوف من دخلتي الجامعه قمتي تعرفي مصطلحات..ياخوفي عليج من بنات الجامعه
فطامي: حبيبي والله حمودي.. صحيح اشوف اشياء وايد غلط وحركات البنات وبلاويهن... بس ياعمري دامني احبك اساسا مااقدر اغلط.. حبيبي عندي وهو بخير يعني احس اني ملكت الدنيا... البنات والشباب الي يدخلون النت هذولا عندهم فراغ يبون يسدونه باي طريقة فيتعرفون على بعض من النت.. اما انا عندي حبيبي حمودي حياتي وحياته وحدة..احلامنا وحدة... بالعكس انا دايما احاول اكون الاحسن عشان اكبر في عينك وتقوم تقولي اني ممكن اغلط
محمد: فديتج ياعمري اصيله فديتج ادري عنج
فطامي: محمد ..انته بالنسبة لي مثل الاساس الي يستند عليه أي بيت بدونك انهار واضيع كل صغيرة وكبيرة في حياتي مرتبطة فيك..ومافكرت شو بيصير لو في يوم تبعد عني.. انا هدفي اكون احلى وحدة واحسن وحدة.. بس عشان اكون الوحيدة بعينك
محمد: فديتج ياعمري..ومافي داعي تفكرين بيوم بدوني لانا مستحيل نفترق..وانا واثق فيج مثل مانتي واثقة فيني... والزواج ان شالله قريب
فطامي: ياعمري اذا الله كاتبلنا نتزوج بنتزوج رغم رفض ابوك واذا الله مب كاتب صدقني مراح يصير حتى لو ابوك وافق..
محمد: ادري غناتي..وان شالله خير..

في نفس اليوم المغرب راحت ام خالد بيت شيخة...
ام خالد: هلا والله بشيخة عنبو بلاج قطعتينا مرة وحدة..
شيخة: ياحمة مشاغل البيت والعيال تعرفين انتي بعد
ام خالد: هيه والله حتى انا توني فضيت وقلت اوصلج اسلم عليج وبروح..
شيخة: افا عليج يلسي البيت بيتج
ام خالد: تسلمين بس انا ييت يبتلج الغرض..
شيخة: أي غرض
ام خالد: شو نسيتي رحت حق الريال وخبرته عن سالفة محمد وفطامي... وسوالي هذا الكتاب حطيه تحت فراش محمد...وحلف انه محمد ماعاد يفكر في فطامي لو شو مايصير..
شيخة خافت وخذت الغرض من عند ام خالد بسرعه وحطته في جيبها..
راحت ام خالد بيتهم وشيخة دخلت غرفة محمد فالوقت الي كان فيه محمد يتسبح وهيه خلاص عرقانه من كثر الخوف حطت الغرض تحت فراش محمد بحيث يظل فالسرير بدون لايدري محمد... ومن هنا بدأت المأساه..

:::::::::::::::::::::::::نهاية الجزء التاسع عشر::::::::::::::::